នៅថ្ងៃ៩​ ខែឧសភា មេដឹកនាំផ្តាច់ការ​កូរ៉េខាងជើង គីម ជុងអ៊ុន បានចុះពិនិត្យ​ដោយ​ផ្ទាល់ នូ​វ​ការធ្វើសមយុទ្ធយោធា ដើម្បី​ហាត់​សមការទប់ទល់ ចំពោះការវាយប្រហារដោយ​អាវុធនុយក្លេអ៊ែរ ពីសំណាក់សត្រូវ​។ គួរបញ្ជាក់ដែរថា កាលពីថ្ងៃទីព្រហស្បតិ៍​ទី​៨ឧសភា កូរ៉េខាងជើង បានបាញ់សាកល្បងនូវ​មីស៊ីល​បាលីស្ទីកទំនើប ជាច្រើនគ្រាប់ ហើយ​បើយោងតាម​ការសង្ស័យពី​អ្នកវិភាគ ក៏ដូចជាអ្នកជំនាញ​កូរ៉េខាងត្បូង គឺអាវុធនិងមីស៊ីលទាំងនេះ កូរ៉េខាងជើងកំពុងតែផលិត​ដើម្បីបញ្ជូនទៅជួយ​រុស្ស៊ី​។

កងទ័ពកូរ៉េខាងជើង​បានបើក​សមយុទ្ធ​ ទប់ទល់ជាមួយ​ការវាយ​ប្រហារ​ដោយ​ប្រើអាវុធនុយក្លេអ៊ែរ ពីសំណាក់សត្រូវ​។ ផ្អែកតាម​ទីភ្នាក់ងារ​ព័ត៌មានរដ្ឋកូរ៉េខាងជើង KCNA សត្រូវទាំង២នោះ គឺកូរ៉េខាងត្បូង និង​សហរដ្ឋអាមេរិក​។ មេដឹកនាំផ្តាច់ការ​កូរ៉េខាងជើង មានវត្តមានដោយ​ផ្ទាល់ ដើម្បី​ពិនិត្យ​និងចាត់ចែងការធ្វើសមយុទ្ធ នៅ​ថ្ងៃសុក្រទី​៩​ឧសភា​​។

ប្រភពដដែល​នេះបាន​ឲ្យដឹងថា ការធ្វើសមយុទ្ធនេះ គឺមានប្រើដោយ​ប្រព័ន្ធ​បាញ់រ៉ូកែត មីស៊ីលបាលី​ស្ទិកតាក់ទិក ដោយ​អនុលោមទៅតាមនីតិវិធី និង​​វិធាន​ការ​ឆ្លើយតបរហ័ស វាយទប់ទល់​ក្នុងករណីមានការវាយប្រហារដោយ​អាវុធនុយក្លេអ៊ែរ។ KCNA អះអាងថា​ លទ្ធផល​នៃការធ្វើសមយុទ្ធគឺបានជោគជ័យដូចការគ្រោងទុក ដោយ​ប្រព័ន្ធប្រតិកម្មរហ័ស​ទប់ទល់នុយក្លេអ៊ែរ បាន​ស្ទុះប្រតិបត្តិ​ការ​យ៉ាងមានប្រសិទ្ធភាព​។

សូមបញ្ជាក់ថា សមយុទ្ធ​សង្គ្រាមនុយក្លេអ៊ែររបស់កូរ៉េខាងជើងនាពេលនេះ គឺធ្វើ​ឡើង​១ថ្ងៃប៉ុណ្ណោះ បន្ទាប់របបផ្តាច់ការនេះ បាន​ធ្វើបាញ់​បង្ហោះសាកល្បង​នូវមីស៊ីល​បាលីស្ទិកចំងាយ​ខ្លីជាច្រើនគ្រាប់ កាលពីព្រឹក​ថ្ងៃព្រហស្បតិ៍​ ទី​៨​ឧសភា​​។ មីស៊ីលទាំងនេះ បានធ្លាក់​ក្នុងសមុទ្រជប៉ុន ចម្ងាយប្រមាន​៨០០គីឡូម៉ែត្រពីឆ្នេរ។

គួរកត់សំគាល់ថា សកម្មភាពផលិត​អាវុធយុទ្ធភណ្ឌ និង​ការធ្វើលំហាត់សឹករបស់កូរ៉េខាងជើង គឺមានភាពសកម្មខ្លាំងណាស់ ប៉ុន្មានខែមកនេះ​។ កាលពី​ថ្ងៃទី​២៨មេសា កូរ៉េខាងជើងបានបង្ហាញ​នាវាចម្បាំងប្រភេទថ្មីមួយគ្រឿង ឈ្មោះថា Choe Hyon។ នៅថ្ងៃអួតបង្ហាញ នាវា​​ដែល​​មានទម្ងន់​៥០០០តោននេះ​ បាញ់មីស៊ីលបាលីស្ទិកក្រ័រស្យែជាច្រើនគ្រាប់ថែមទៀតផង​។ ហើយបើយោងតាមការវិភាគរបស់អ្នកជំនាញខ្លះ នាវានេះ អាចមានសមត្ថភាពបាញ់​មីស៊ីល​នុយក្លេអ៊ែរ​​តាក់ទិក​ ថ្វីបើ​សម្រាប់ពេលនេះ កូរ៉េខាងជើងនៅមិនទាន់​អួត​អះអាងថា ខ្លួនអាច​មានសមត្ថភាព​បំព្រួញ​គ្រាប់នុយក្លេអ៊ែរ​ឲ្យតូច​ ដាក់ក្នុង​មីស៊ីលក្រ័រស្យែនៅឡើយ​។ ហើយកាលពីដើមសប្តាហ៍នេះ មេដឹកនាំផ្តាច់ការ គីម ជុងអ៊ុន បានចុះទៅ​ពិនិត្យ​មើល​រោងចក្រផលិត​រថក្រោះ ផលិត​គ្រាប់កាំភ្លើង​តូចធំថែមទៀតផង​។ សកម្មភាពរោងចក្រ​​ផលិត​គ្រាប់ ដែល​បាន​កើនឡើងយ៉ាងសកម្មភាព​ នាប៉ុន្មានខែចុងក្រោយ​នេះ​ ទៅតាមការ​ចង់បាន​របស់​ លោក គីម ជុងអ៊ុន​។

ផ្អែកការសង្ស័យ របស់​កងទ័ពកូរ៉េខាងត្បូង ក៏ដូចជាការវិភាគរបស់អ្នកជំនាញ គ្រាប់មីស៊ីល ក៏ដូចជាគ្រឿងសព្វាវុធ​​ ដែលរបប​ផ្តាច់ការ​​កូរ៉េខាងជើងកំពុង​ខំផលិតយ៉ាងសស្រាក់សស្រាំនេះ​ គឺកូរ៉េខាងជើងគ្រោងបញ្ជូន​ យកទៅជួយ​រុស្ស៊ី ដែលកំពុងធ្វើសង្គ្រាមនៅអ៊ុយក្រែន​។ កូរ៉េខាងជើងនិងរុស្ស៊ី បានចុះកិច្ចព្រមព្រៀង​សម្ព័ន្ធភាពយោធាជាមួយគ្នា កាលពី​ខែមិថុនា​២០២៤។ មិនត្រឹមតែបញ្ជូន​ទាហានទៅជួយច្បាំងរុស្ស៊ីប៉ុណ្ណោះទេ កូរ៉េខាងជើង​បាន​បញ្ជូន​អាវុធទៅជួយថែមទៀត។ ជាក់ស្តែង លោកហ្សេឡេនស្គីបានអះអាងថា រុស្ស៊ីបានបាញ់មីស៊ីលបាលីស្ទិក​​មួយគ្រាប់របស់​កូរ៉េខាងជើង សម្លាប់ប្រជាជន​ស៊ីវីលអ៊ុយក្រែន ចំនួន​១២នាក់នៅទីក្រុងកៀវ កាលពីថ្ងៃទី​​១២មេសា​។ ​អ្នកជំនាញបានអះអាងដែរ​ថា នាវាចម្បាំងថ្មីទំនើបរបស់កូរ៉េខាងជើងឈ្មោះ Choe Hyon គឺរុស្ស៊ីបានជួយសាងសង់ តាមរយៈការប្រគល់បច្ចេកវិទ្យា​ ជាថ្នូរនឹងការ​​ដែលកូរ៉េខាងជើង បញ្ជូនទ័ពបញ្ជូនគ្រាប់ទៅជួយរុស្ស៊ី នៅឯសមរភូមិអ៊ុយក្រែន​៕

ដោយ៖ម៉ម ពិសី/ RFI ខេមរភាសា