សៀមរាប៖ យុវជនមកពីបណ្ដាក្រុង-ស្រុក ក្នុងខេត្តសៀមរាបសរុប២០០នាក់ ទទួលបានការបណ្ដុះបណ្ដាលជំនាញបដិសណ្ឋារកិច្ច ដោយសិក្សារយៈពេលខ្លី ដែលរៀបចំឡើងដោយ សមាគមក្លឹបទេសចរណ៍​សៀមរាប (STC)។ នេះជាវគ្គសិក្សាទី៣ហើយ ដែលសមាគមរៀបចំឡើង   ដើម្បីរួមចំណែកស្ដារឡើងវិញនូវវិស័យទេសចរណ៍ខេត្តសៀមរាប។

 

វិបត្តិកូវីដ១៩ ធ្វើឱ្យធនធានមនុស្សក្នុងវិស័យបដិសណ្ឋារកិច្ចនេះ​ ចាកចេញយ៉ាងគំហុកទៅប្រកបរបរការងារដទៃ។ ការណ៍នេះ  បណ្ដាលឱ្យមាន​កង្វះធនធានជាច្រើន ខណៈដែលវិស័យនេះងើបឡើងវិញក្រោយស្ងប់ស្ងាត់ជំងឺឆ្លងនេះ។ 

លោក សែត កៅ ប្រធាន STC

ដោយមានការគាំទ្របដិភាគហិរញ្ញវត្ថុពីមូលនិធិអភិវឌ្ឍន៍ជំនាញ (SDF) នៃក្រសួងសេដ្ឋកិច្ច និងហិរញ្ញវត្ថុ និងដោយប្រើប្រាស់កម្មវិធីបណ្ដុះបណ្ដាលហូកា (HOKA) របស់ក្រសួងទេសចរណ៍ សមាគមក្លឹបទេសចរណ៍សៀមរាប ចាប់ផ្តើមបើកជ្រើសរើសយុវជន​ដើម្បីចូលរៀនក្នុងវគ្គបណ្ដុះបណ្ដាលជំនាញបដិសណ្ឋារកិច្ច ដែលចាប់ផ្តើមដំបូងនៅឆ្នាំ២០២៣។ បើតាមលោក សែត កៅ ប្រធានសមាគម​ STC ក្នុងវគ្គទី១ មានសិក្ខាកាម៣០០នាក់ វគ្គទី២ ២០០នាក់ និងវគ្គទី៣នេះ មានចំនួន ២០០នាក់ ដែលចាប់ផ្តើមចូលរៀនពីដើមឆ្នាំ២០២៥មក។ 

អ្នកឯកទេសអភិវឌ្ឍន៍ជំនាញនៃមូលនិធិអភិវឌ្ឍន៍ជំនាញ លោក ញ៉ែម ដាវីត បានលើកឡើងថា ចាប់ពីឆ្នាំ២០១៨ ដល់២០២៤ SDF បានផ្តល់ថវិកាបដិភាគដើម្បីគាំទ្រដល់កម្មវិធីបណ្ដុះបណ្ដាល​មូលធនក្នុងវិស័យទេសចរណ៍ក្នុងទំហំទឹក ប្រាក់ជិត ៤លានដុល្លារ ដែលមានសិក្ខាកាមជាង៤ពាន់នាក់។ ក្នុងនោះ ស្រី្ត២ពាន់នាក់ ស្មើនឹងជិត ៥០ភាគរយ។ 

ពិធីបើកវគ្គបណ្ដុះបណ្ដាល នៅថ្ងទី៨ ខែឧសភា ឆ្នាំ២០២៥។

ចំពោះការគាំទ្រដល់សមាគមក្លឹបទេសចរណ៍សៀមរាបដល់វគ្គទី៣នេះ SDF បានសម្រេចអនុម័តគម្រោង សំណើរចំនួន៩រួចមកហើយ ដែលចាប់ពីឆ្នាំ២០២៣មក សរុបថវិកាប្រមាណ៩០ម៉ឺនដុល្លារ ដែលមានសិក្ខាកាមសរុប ៧០០នាក់ ក្នុងនោះស្រ្តី ៤២០នាក់។

លោក ប៉ាក់ សុខុម រដ្ឋលេខាធិការក្រសួងទេសចរណ៍ និងជាប្រធានគម្រោង ហូកា​ បានសាទរដល់ SDF ដែលបានរួមចំណែកស្ដារឡើងវិញនូវវិស័យទេសចរណ៍ខេត្តសៀមរាប។ របាយការណ៍របស់លោក ប៉ាក់ សុខុមបានបង្ហាញថា​ តាមរយៈការបណ្ដុះចំនួន២លើក របស់ STC នាពេលកន្លងមក ក្នុងចំណោមសិក្ខាកាម ៥០០នាក់ គឺសុទ្ធសឹងទទួលបានការងារគ្រប់ៗគ្នា។ ពួកគេបាន និងកំពុងចូលរួមបម្រើការងារ នៅតាមសណ្ឋាគារ និងភោជនីយដ្ឋានក្នុងខេត្តសៀមរាប និងបណ្ដាខេត្ត/ក្រុងមួយចំនួន។ 

ជាមួយគ្នានេះ លោក ប៉ាក់ សុខុម បានផ្តាំផ្ញើដល់យុវជនដែលជាសិក្ខាកាមទាំងអស់ ត្រូវតស៊ូ និងអត់ធ្មត់ ក្នុងការសិក្សាឱ្យបានចប់ចុងចប់ដើម ដើម្បីទទួលបានជំនាញ និងការងារដ៏ល្អមួយនាពេលអនាគត។ បន្ថែមពីនេះ លោករដ្ឋលេខាធិការក៏បានណែនាំដល់យុវជន សិក្សាភាសាអង់គ្លេស និងរៀនប្រើកុំព្យូទ័រ ដើម្បីភាពងាយស្រួលពេលចេញធ្វើការផងដែរ។

គួរបញ្ជាក់ថា វគ្គបណ្ដុះបណ្ដាលជំនាញបដិសណ្ឋារកិច្ចវគ្គទី៣ ដែលរៀបចំឡើងដោយ STC ត្រូវបានរៀបចំពិធីបើកជាផ្លូវការនៅថ្ងៃទី៨ ខែឧសភា នៅសណ្ឋាគារមេម៉រ ផាឡេស រីសត និងស្ប៉ា។  ជំនាញបដិសណ្ឋារកិច្ច​ដែលសិក្ខាកាមរៀន រួមមានជំនាញការិយាល័យជួរមុខ គេហកិច្ច សេវាកម្មម្ហូបអាហារនិងភេសជ្ជៈ និងចុងភៅ។ សិក្ខាកាមនឹងសិក្សាទ្រឹស្តីរយៈពេល៤ និងចុះហាត់ការ៤ខែ។ ក្រោយបញ្ចប់វគ្គ ពួកគេនឹងទទួលបានវិញ្ញាបនបត្របញ្ជាក់ការសិក្សា​ពី​ក្រសួងទេសចរណ៍៕