ពាណិជ្ជកម្មសកលបានធ្លាក់ចុះក្នុងល្បឿនដ៏លឿនបំផុតនៅខែមេសា ក្នុងរយៈពេលជាង ២ឆ្នាំ។ នេះបើយោងតាមការស្ទង់មតិសន្ទស្សន៍អ្នកគ្រប់គ្រងការទិញសកល (PMI) របស់ S&P Global។

ការស្ទង់មតិ PMI សកលធ្វើឡើងដោយ S&P Global Market Intelligence បានបង្ហាញថា សន្ទស្សន៍ការបញ្ជាទិញនាំចេញថ្មីសកលបានធ្លាក់ចុះដល់ ៤៧,៥ក្នុងខែមេសា ពី ៥០,១ក្នុងខែមីនា។ នេះគឺជាកម្រិតទាបបំផុតចាប់តាំងពីចុងឆ្នាំ២០២២ និងទាបជាងមធ្យមភាគរយៈពេលវែង។ PMI ក្រោម ៥០ បង្ហាញពីសកម្មភាពផលិតកម្មធ្លាក់ចុះ។

បន្ទាប់ពីមានស្ថិរភាពនៅចុងត្រីមាសទី១ លក្ខខណ្ឌពាណិជ្ជកម្មអន្តរជាតិកាន់តែអាក្រក់កាលពីខែមុន ដោយសារតែផលប៉ះពាល់នៃពន្ធបន្ថែមដែលដាក់ដោយរដ្ឋបាល ត្រាំ ។ នេះបើយោងតាមក្រុមហ៊ុនវិភាគទិន្នន័យអាម៉េរិក។

ការ​នាំ​ចេញ​ទំនិញ​ក៏​បាន​វិល​ទៅ​រក​និន្នាការ​ធ្លាក់​ចុះ​ដែរ ដោយ​បញ្ចប់​រយៈពេល​ខ្លី​នៃ​ស្ថិរភាព។ ការធ្លាក់ចុះនេះគឺខ្លាំងបំផុតចាប់តាំងពីខែសីហា ឆ្នាំ២០២៣។

ក្រុមហ៊ុនដែលបានស្ទង់មតិបាននិយាយថា ពួកគេកំពុងចាប់ផ្តើមមានអារម្មណ៍ថា មានផលប៉ះពាល់នៃការប្រកាសពន្ធគយទៅវិញទៅមករបស់អាម៉េរិកនៅថ្ងៃទី២ ខែមេសា។ ទោះជាយ៉ាងណា ស្ថានភាពអាចនឹងកាន់តែអាក្រក់ទៅៗ ដោយសារប្រតិបត្តិការកាលពីខែមុន នៅតែត្រូវបានគាំទ្រដោយអាជីវកម្មដែលទាញយកអត្ថប្រយោជន៍ពីការនាំចូលទំនិញអំឡុងពេលផ្អាករយៈពេល ៩០ថ្ងៃ។

អ្នកសេដ្ឋកិច្ចព្យាករថា ស្ថានភាពប្រញាប់ប្រញាល់នាំចូលនឹងបន្ត។ លោក Christopher Rupkey ប្រធានសេដ្ឋវិទូនៅ FWDBonds បាននិយាយថា ៖« អាជីវកម្មកំពុងស្វែងរកនូវពេលវេលាដែលមិនធ្លាប់មានពីមុនមក ប៉ុន្តែអ្វីដែលអាក្រក់បំផុតមិនទាន់មកដល់នៅឡើយ»។

ដូច្នេះ ទំនុក​ចិត្ត​អាជីវកម្ម​ក្នុង​វិស័យ​ផលិតកម្ម​បាន​ធ្លាក់​ចុះ​យ៉ាង​ខ្លាំង។ សន្ទស្សន៍នៃការរំពឹងទុកទិន្នផលនាពេលអនាគត បានធ្លាក់ចុះដល់កម្រិតទាបបំផុតចាប់តាំងពីខែតុលាឆ្នាំ ២០២២ ដោយខិតជិតដល់កម្រិតនៃឆ្នាំ ២០១៩ ដែលជាពេលវេលានៃការគាំពារពាណិជ្ជកម្មនៅក្នុងអាណត្តិដំបូងរបស់លោក ដូណាល់ ត្រាំ ។

ការនាំចេញសេវាកម្មក៏បានធ្លាក់ចុះនៅក្នុងខែមេសាជាលើកដំបូងចាប់តាំងពីចុងឆ្នាំ ២០២៣។ អត្រានៃការធ្លាក់ចុះនេះ គឺតិចតួច ប៉ុន្តែវានៅតែជាកម្រិតខ្លាំងបំផុតចាប់តាំងពីខែធ្នូ ឆ្នាំ២០២២។

ក្នុងចំណោមប្រទេសសេដ្ឋកិច្ចពាណិជ្ជកម្មធំបំផុតទាំង ១០ របស់ពិភពលោក មានតែឥណ្ឌាប៉ុណ្ណោះដែលបានកត់ត្រាការកើនឡើងនៃការនាំចេញនៅក្នុងខែមេសា។ ប្រទេសនេះ មានការកើនឡើងខ្ពស់បំផុតទីពីរនៃការបញ្ជាទិញពីបរទេសក្នុងរយៈពេលជាង ១៤ឆ្នាំ ដោយសារដៃគូរប្រញាប់ប្រញាល់ដើម្បីធ្វើការបញ្ជាទិញមុនពេលពន្ធកើនឡើង។

ផ្ទុយ​ទៅ​វិញ ​អង់គ្លេស​បាន​ឃើញ​ការ​ធ្លាក់​ចុះ​ខ្លាំង​បំផុត​ក្នុង​ការ​នាំ​ចេញ​ទំនិញ​នៅ​ក្នុង​ចំណាត់​ថ្នាក់​កំពូល​ទាំង ១០ តាម​ពី​ក្រោយ​ដោយ​​កាណាដា។ ការនាំចេញទំនិញរបស់អាម៉េរិកបានធ្លាក់ចុះខ្លាំងបំផុតក្នុងរយៈពេលជិតពីរឆ្នាំ។

បើតាមការស្ទង់មតិរបស់ Reuters របស់អ្នកសេដ្ឋកិច្ចចំនួន ៣២នាក់ តម្លៃនៃការនាំចេញរបស់ប្រទេសចិននៅក្នុងខែមេសាត្រូវបានព្យាករថា នឹងកើនឡើងត្រឹមតែ ១,៩ភាគរយ បើធៀបនឹងរយៈពេលដូចគ្នាក្នុងឆ្នាំ ២០២៤ គឺធ្លាក់ចុះយ៉ាងខ្លាំងពី ១២,៤ភាគរយនៅក្នុងខែមីនា។ តួ​លេខ​នាំ​ចេញ​ផ្លូវការ​របស់​ប្រទេស​នេះ​ត្រូវ​បាន​គេ​រំពឹង​ថា​នឹង​ចេញ​នៅ​ថ្ងៃ​ទី ៩ ខែ​ឧសភា៕