ប្រធានាធិបតីអាម៉េរិក លោក ដូណាល់ ត្រាំ បានពណ៌នាថ្ងៃដំបូងនៃការចរចារវាងអាម៉េរិក និងចិនថា«មានការរីកចម្រើនដ៏អស្ចារ្យ»។ យ៉ាងណាមិញ លោកមិនបានទម្លាយខ្លឹមសារនៃកិច្ចប្រជុំទាំងនោះឡើយ។

« កិច្ចប្រជុំល្អណាស់នៅថ្ងៃនេះ ជាមួយភាគីចិនក្នុងប្រទេសស្វីស។ បញ្ហា និងខ្លឹមសារជាច្រើនត្រូវបានពិភាក្សា និងយល់ព្រម»។ ប្រធានាធិបតីអាម៉េរិក លោក ដូណាល់ ត្រាំ​ បានបង្ហោះខ្លឹមសារបែបនេះ នៅលើបណ្តាញសង្គម Truth Social ជុំវិញថ្ងៃដំបូងនៃការចរចាររវាងគណៈប្រតិភូពាណិជ្ជកម្មអាម៉េរិក និងចិន នាថ្ងៃទី១០ ខែឧសភា។

យ៉ាងណាមិញ លោកមិនបានបង្ហាញពីវឌ្ឍនភាពជាក់លាក់ណាមួយ ដែលត្រូវបានបង្កើតឡើងនោះទេ។ ផ្ទុយទៅវិញ លោក បានអំពាវនាវឱ្យចិនបើកទូលាយដល់អាជីវកម្មរបស់អាម៉េរិក ដើម្បីជាប្រយោជន៍ដល់សេដ្ឋកិច្ចប្រទេសទាំងពីរ។

នៅថ្ងៃដំបូងនៃការចរចា ឧបនាយករដ្ឋមន្ត្រីចិន លោក He Lifeng បានជួបសន្ទនាដោយផ្ទាជាមួយរដ្ឋមន្ត្រីក្រសួងរតនាគារអាម៉េរិក លោក Scott Bessent និងអ្នកតំណាងពាណិជ្ជកម្ម លោក Jamieson Greer នៅ Villa Saladin ក្បែរទីស្នាក់ការអង្គការសហប្រជាជាតិរហូតដល់រយៈពេលជិត៨ម៉ោង ។ នេះជាទំនាក់ទំនងកម្រិតខ្ពស់លើកដំបូង ចាប់តាំងពីប្រទេសទាំងពីរ បន្តដាក់ពន្ធសងសឹកលើសពី១០០ភាគរយ លើទំនិញរបស់គ្នាទៅមក។

កិច្ចប្រជុំបានបញ្ចប់នៅម៉ោងប្រហែល៨យប់ ម៉ោងក្នុងស្រុក នាថ្ងៃទី១០ ខែឧសភា។ ​ភាគី​ទាំង​ពីរ​ មិន​បាន​ធ្វើ​សេចក្តី​ថ្លែង​ការណ៍​ជា​ផ្លូវ​ការ​ ឬ​បង្ហាញ​ពី​ដំណើរ​ការ​ជាក់​លាក់ណាមួយ​ឡើយ។ សារព័ត៌មាន AP បានសរសេរថា ការចរចាបន្តនៅថ្ងៃទី១១ ខែឧសភា។

ភាពតានតឹងពាណិជ្ជកម្មរវាងប្រទេស ដែលមានសេដ្ឋកិច្ចធំទីពីររបស់ពិភពលោក បានផ្ទុះឡើងនៅក្នុងខែកុម្ភៈ បន្ទាប់ពីការដំឡើងពន្ធជាបន្តបន្ទាប់របស់លោក ត្រាំ បានជំរុញឱ្យមានការសងសឹកយ៉ាងខ្លាំងពីទីក្រុងប៉េកាំង។ ទីក្រុងវ៉ាស៊ីនតោន ចង់កាត់បន្ថយឱនភាពពាណិជ្ជកម្មទំនិញចំនួន ២៩៥ពាន់លានដុល្លារ ជាមួយទីក្រុងប៉េកាំង។ ទន្ទឹមនោះ ក៏បានបញ្ចុះបញ្ចូលប្រទេសចិន ឱ្យបោះបង់ចោលគំរូសេដ្ឋកិច្ច ដែលផ្តោតលើការនាំចេញរបស់ខ្លួន និងរួមចំណែកកាន់តែច្រើនដល់ការប្រើប្រាស់សកល។

ទីក្រុងប៉េកាំង បានច្រានចោលនូវអ្វីដែលខ្លួនមើលឃើញថា ជាការជ្រៀតជ្រែកពីខាងក្រៅ ហើយបានស្នើឱ្យក្រុងវ៉ាស៊ីនតោនកាត់បន្ថយពន្ធ បញ្ជាក់ពីអ្វីដែលខ្លួនចង់ឱ្យចិនទិញបន្ថែមទៀត និងចាត់ទុកជាដៃគូស្មើភាពគ្នានៅលើឆាកអន្តរជាតិ។

សារព័ត៌មានចិន Xinhua បានសរសេរថា៖ « ការរំលោភបំពានពន្ធដោយមិនប្រុងប្រយ័ត្ន» របស់អាម៉េរិក បានធ្វើឱ្យមានអស្ថិរភាពដល់សណ្តាប់ធ្នាប់សេដ្ឋកិច្ចពិភពលោក។ ប៉ុន្តែក៏បានលើកឡើងថា ការចរចាគឺជាជំហានវិជ្ជមាន និងចាំបាច់ ដើម្បីដោះស្រាយភាពខុសគ្នា និងការពារការកើនឡើងបន្ថែមទៀត ។

កាលថ្ងៃទី៩ ខែឧសភា លោក ត្រាំ បានប្រកាសថា ពន្ធ៨០ភាគរយលើទំនិញរបស់ចិន «ហាក់ដូចជាសមហេតុផល»។ លោក​អះអាង​ថា ការ​ចរចា​ត្រូវ​បាន​ផ្តួចផ្តើម​ដោយ​ចិន​លើក​នេះ។ ទន្ទឹមនេះ ទីក្រុងប៉េកាំងបញ្ជាក់ថា អាម៉េរិកគឺជាអ្នកស្នើការចរចា ហើយថាគោលនយោបាយប្រឆាំងពន្ធរបស់ចិននៅតែមិនផ្លាស់ប្តូរ។

អ្នក​វិភាគ​សេដ្ឋកិច្ច​មិន​រំពឹង​ច្រើន​ពី​ការ​ទម្លាយរឿងរ៉ាវ​នោះ​ទេ។ អ្នកជំនាញយល់ថា ចិនប្រហែលជាកំពុងស្វែងរកការបន្ធូរបន្ថយរយៈពេល ៩០ថ្ងៃ ដូចទីក្រុងវ៉ាស៊ីនតោន បានផ្តល់ឱ្យប្រទេសផ្សេងទៀតអំឡុងពេលចរចា។

រដ្ឋមន្ត្រីសេដ្ឋកិច្ចស្វីស លោក Guy Parmelin បានជួបភាគីទាំងសងខាង នៅទីក្រុងហ្សឺណែវនាថ្ងៃទី៩ ខែឧសភា ហើយសង្កត់ធ្ងន់ថា កិច្ចចរចាបានទទួលជោគជ័យ។ បើតាម លោក Guy Parmelin ប្រសិន​បើ​ផែនទី​បង្ហាញ​ផ្លូវ ​អាច​ត្រូវ​បាន​គេ​បង្កើត​ឡើង ហើយ​ពួកគេ​សម្រេច​ចិត្ត​បន្ត​ការ​ចរចា ភាព​តានតឹង​ពាណិជ្ជកម្មនោះ​នឹង​ធូរស្រាល​។

ឧបនាយករដ្ឋមន្ត្រីចិន លោក He Lifeng  ក៏ត្រូវបានគេរំពឹងថា នឹងជួបជាមួយលោកស្រី Ngozi Okonjo-Iweala  អគ្គនាយកអង្គការពាណិជ្ជកម្មពិភពលោក (WTO) នាអំឡុងពេលស្នាក់នៅទីក្រុងហ្សឺណែវ ផងដែរ។ លោកស្រី បានសាទរចំពោះកិច្ចប្រជុំនេះថាជា «ជំហានវិជ្ជមាន និងស្ថាបនាឆ្ពោះទៅរកការបន្ធូរបន្ថយភាពតានតឹង» ហើយបានអំពាវនាវឱ្យប្រទេសទាំងពីររក្សាការសន្ទនាជាបន្តបន្ទាប់៕