ឥណ្ឌា និងប៉ាគីស្ថានបានចោទគ្នាទៅមក ពីការរំលោភលើកិច្ចព្រមព្រៀងបទឈប់បាញ់មួយ ប៉ុន្មានម៉ោងបន្ទាប់ពីបានយល់ព្រមកាត់បន្ថយភាពតានតឹង។ នេះបើតាមសារព័ត៌មាន AP ។

ក្រសួងការបរទេសប៉ាគីស្ថាន បា​នចេញសេចក្តីថ្លែងការណ៍មួយនៅព្រឹកថ្ងៃទី១១ ខែឧសភា  ដោយអះអាងពីការអនុវត្តយ៉ាងខ្ជាប់ខ្ជួននូវបទឈប់បាញ់ និងចោទឥណ្ឌា ពីបទរំលោភលើកិច្ចព្រមព្រៀង ដែលបានសម្រេចពីមុន  ព្រមទាំងបានព្រលយពាក្យថា កងកម្លាំងប៉ាគីស្ថាន កំពុងអនុវត្តការអត់ធ្មត់ និងដោះស្រាយស្ថានការណ៍ដោយការទទួលខុសត្រូវ។

«យើងជឿជាក់ថា បញ្ហាណាមួយដែលកើតឡើងអំឡុងពេលអនុវត្តបទឈប់បាញ់ គួរតែត្រូវបានដោះស្រាយតាមរយៈការសន្ទនាក្នុងកម្រិតសមស្រប។ កងកម្លាំងនៅក្នុងតំបន់ជម្លោះគួរតែអនុវត្តការអត់ធ្មត់ផងដែរ»។ សេចក្តីថ្លែងការណ៍ក្រសួងការបរទេសប៉ាគីស្ថានបញ្ជាក់ដូច្នេះ។

ទន្ទឹមនេះ រដ្ឋមន្ត្រីការបរទេសឥណ្ឌាលោក Vikram Misri កាលពីយប់ថ្ងៃទី១០ ខែឧសភា ក៏បានចោទប៉ាគីស្ថានថា «រំលោភបំពានម្តងហើយម្តងទៀត» ចំពោះកិច្ចព្រមព្រៀងដែលសម្រេចដោយភាគីទាំងពីរ។ លោកបន្ថែមថា ទីក្រុងញូវដែលីបានចាត់វិធានការសងសឹក។ «យើងអំពាវនាវឱ្យប៉ាគីស្ថានចាត់វិធានការសមស្រប ដើម្បីដោះស្រាយការរំលោភនេះ និងដោះស្រាយស្ថានការណ៍ឱ្យបានល្អិតល្អន់ និងទទួលខុសត្រូវ»។ លោក Misri បញ្ជាក់ដូច្នេះ។

ចំណែក ប្រធានាធិបតីអាម៉េរិក លោក ដូណាល់ ត្រាំ បានប្រកាសនៅថ្ងៃទី១០ ខែឧសភា ថា ឥណ្ឌា និងប៉ាគីស្ថាន បានយល់ព្រមលើបទឈប់បាញ់គ្នាភ្លាមៗ។ ក្រោយ​មក ប្រទេស​ទាំង​ពីរ​បាន​យល់​ព្រម​លើ​បទ​ឈប់​បាញ់​គ្រប់​ជ្រុងជ្រោយ។

តែយ៉ាងនេះក្កី ប៉ុន្មានម៉ោងក្រោយមក អ្នកស្រុកនៅក្នុងទីក្រុង Srinagar ក្នុងតំបន់ Jammu និង Kashmir របស់ឥណ្ឌាបានឮសំឡេងផ្ទុះជាច្រើន ហើយលើកឡើងថា ទីក្រុងនេះបានរងការដាច់ចរន្តអគ្គិសនី។ រូបភាពដែលថតដោយ អ្នកយកព័ត៌មាន AP នៅ Srinagar បង្ហាញពីការបាញ់កាំជ្រួចជាច្រើនគ្រាប់ពីលើដី។

លោក Omar Abdullah មន្ត្រីកំពូលរបស់ឥណ្ឌាប្រចាំតំបន់បានបង្ហោះនៅលើបណ្តាញសង្គមថា «តើមានអ្វីកើតឡើងចំពោះបទឈប់បាញ់? ការផ្ទុះបានឮគ្រប់ទីកន្លែង! មិនមានបទឈប់បាញ់ទេ»។

មន្ត្រីម្នាក់នៅក្នុងផ្នែកដែលគ្រប់គ្រងដោយប៉ាគីស្ថាននៃតំបន់ជម្លោះ Kashmir បានបញ្ជាក់ថា ភាគីទាំងពីរនៅតែផ្លាស់ប្តូរការបាញ់ប្រហារគ្នានៅតាមខ្សែបន្ទាត់គ្រប់គ្រង (LoC) ដែលជាបន្ទាត់កំណត់ព្រំដែនដែលបែងចែកតំបន់។

គួរបញ្ជាក់ថា ឥណ្ឌាបានចាប់ផ្តើមប្រតិបត្តិការ Sindoor នៅព្រឹកព្រលឹមថ្ងៃទី៧ ខែឧសភា ដោយវាយលុកទីតាំងចំនួន៩ ដែលខ្លួនចាត់ទុកជា «មូលដ្ឋានភេរវករ»នៅក្នុងទឹកដីប៉ាគីស្ថាន និងតំបន់ Kashmir ដែលគ្រប់គ្រងដោយទីក្រុង Islamabad ។ បើតាមភាគីឥណ្ឌា នេះជាការឆ្លើយតបទៅនឹងការបាញ់ប្រហារដែលបានសម្លាប់មនុស្ស ២៦នាក់នៅជិតទីក្រុង Pahalgam កាលពីថ្ងៃទី២២ ខែមេសា។ ប្រទេសនេះធ្លាប់បានចោទប៉ាគីស្ថានថា បានគាំទ្រក្រុមសកម្មប្រយុទ្ធដែលបានធ្វើការវាយប្រហារ ប៉ុន្តែទីក្រុង Islamabad បានបដិសេធ។

ក្រសួងការពារជាតិប៉ាគីស្ថានបានប្រកាសថា កងកម្លាំងរបស់ខ្លួនបានបាញ់ទម្លាក់យន្តហោះយោធាឥណ្ឌាចំនួន ៦គ្រឿងនៅព្រឹកព្រលឹមថ្ងៃទី៧ ខែឧសភា រួមទាំងយន្តហោះចម្បាំងពហុតួនាទី Rafale ចំនួនបី យន្តហោះចម្បាំងធុនស្រាល MiG-29 យន្តហោះចម្បាំងធុនធ្ងន់ Su-30MKI និងយន្តហោះគ្មានមនុស្សបើករយៈកម្ពស់មធ្យម Heron ។

ក្រោយមក ប្រទេស​ទាំង​ពីរ​​បាន​វាយប្រហារ​ម្តង​ហើយ​ម្តងទៀត​លើ​ទឹកដី​ព្រំដែន​របស់​គ្នា​ទៅ​វិញ​ទៅ​មក ។ ការបាញ់បោះខ្លាំងគឺនៅយប់ថ្ងៃទី៩ ខែឧសភា នៅពេលឥណ្ឌាបានវាយប្រហារជាបន្តបន្ទាប់លើមូលដ្ឋានទ័ពអាកាសប៉ាគីស្ថាន រួមទាំងអាកាសយានដ្ឋានដែលមានចម្ងាយប្រហែល ១០គីឡូម៉ែត្រពីរដ្ឋធានី Islamabad។

យោធាប៉ាគីស្ថានបានចាប់ផ្តើមប្រតិបត្តិការសងសឹកមួយដែលមានឈ្មោះថា Bunyanun Marsoos នៅព្រឹកព្រលឹមថ្ងៃទី១០ ខែឧសភា ដោយផ្តោតលើអាកាសយានដ្ឋានយោធាឥណ្ឌាជាបន្តបន្ទាប់ ហើយបានអះអាងថាបានបំផ្លាញឃ្លាំងផ្ទុកមីស៊ីលល្បឿនលឿនជាងសម្លេងនៅក្នុងទីក្រុង Beas ។

ជម្លោះ​រវាង​ប្រទេស​ទាំង​ពីរ​ក្នុង​រយៈពេល​ប៉ុន្មាន​ថ្ងៃ​ចុង​ក្រោយ​នេះ ​បាន​ធ្វើ​ឲ្យ​មនុស្ស​ជិត ៧០នាក់​ស្លាប់៕