.png)
.png)
.jpg)
.jpg)
ចរចាពន្ធគយ ៖ ជប៉ុននឹងមិនធ្វើសម្បទានជាមួយអាម៉េរិកទេ
- ថ្ងៃអាទិត្យ ទី១១ ខែឧសភា ឆ្នាំ២០២៥ ម៉ោង ៨:៣០ នាទី យប់
នាយករដ្ឋមន្រ្តីជប៉ុន លោក Shigeru Ishiba ។ រូបភាព ៖ JIJI
ទោះបីជាជប៉ុន តែងតែរក្សាអាកប្បកិរិយាបត់បែន និងចាត់ទុកកិច្ចព្រមព្រៀងពាណិជ្ជកម្មដែលសម្រេចបានរវាងអាម៉េរិក និងអង់គ្លេសជាគំរូវិជ្ជមានក្នុងការចរចារពន្ធជាមួយអាម៉េរិក ក៏ខ្លួននៅតែប្រុងប្រយ័ត្ន និងប្តេជ្ញាមិនធ្វើសម្បទានជាមួយទីក្រុងវ៉ាស៊ីនតោនឡើយ។
ទាក់ទិននឹងការយល់ព្រមរបស់អង់គ្លេសនូវលក្ខខណ្ឌជាច្រើន ជាថ្នូរនឹងកិច្ចព្រមព្រៀងជាមួយអាម៉េរិក រដ្ឋមន្ត្រីក្រសួងសេដ្ឋកិច្ច និងអភិវឌ្ឍន៍របស់ជប៉ុន លោក Akazawa Ryosei បានលើកឡើងថា ប្រទេសនីមួយៗមានទស្សនៈខុសគ្នា។ ដូច្នេះ ខ្លឹមសារនៃកិច្ចព្រមព្រៀងក៏វានឹងខុសគ្នាដែរ។
ចំណែក រដ្ឋមន្ត្រីសេដ្ឋកិច្ច និងឧស្សាហកម្ម លោក Muto Yoji បានលើកឡើងស្រដៀងគ្នាថា កិច្ចព្រមព្រៀងរវាងអាម៉េរិក និងអង់គ្លេស គ្រាន់ជាគំរូឯកសារយោងប៉ុណ្ណោះ។ នេះបើតាមសារព័ត៌មាន The Japan News ។
ជាពិសេស ជប៉ុនក៏ប្រយ័ត្ន ចំពោះការសម្រេចចិត្តរបស់អង់គ្លេសក្នុងការលើកលែងសាច់គោចំនួន ១៣ ០០០ តោន ដែលនាំចូលពីអាម៉េរិកពីពន្ធគយ។ ឆ្លើយតបនឹងសារព័ត៌មានលើបញ្ហានេះ រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទជប៉ុន លោក Eto Taku បានបង្ហាញអាកប្បកិរិយាយ៉ាងម៉ឺងម៉ាត់ថា៖«អាម៉េរិកគឺអាមេរិក អង់គ្លេសគឺអង់គ្លេស។ ចំពោះផលិតផលកសិកម្ម ជប៉ុននឹងបន្តអនុវត្តគោលនយោបាយបច្ចុប្បន្ន»។
នាយករដ្ឋមន្ត្រីជប៉ុនលោក Ishiba Shigeru ក៏បានបង្ហាញអាកប្បកិរិយាកាន់តែម៉ឺងម៉ាត់ និងតឹងតែងចំពោះគោលនយោបាយរបស់សេតវិមាន និងចលនាក្នុងការចរចា ដោយសង្កត់ធ្ងន់ថា ពន្ធលើរថយន្តនាំចូលពីអាម៉េរិកគឺពិតជាមិនអាចទទួលយកបាន។ បើតាមនាយករដ្ឋមន្រ្តី Ishiba ជប៉ុនមិនប្រញាប់ចរចាជាមួយអាម៉េរិកទេ៕
អត្ថបទទាក់ទង
© រក្សាសិទ្ធិដោយ thmeythmey.com
Tag:
.gif)