ភ្នំពេញ៖ មន្ទីរបរិស្ថានខេត្តព្រះវិហារ បដិសេធព័ត៌មានបទល្មើសព្រៃឈើកើតមាន ក្នុងតំបន់ដែនជម្រកសត្វព្រៃឆែប-ព្រះរការ ក្នុងខេត្តព្រះវិហារ។ មន្ទីរបរិស្ថានខេត្តព្រះវិហារអះអាងថា នឹងចាត់វិធានការច្បាប់ ហើយស្នើឱ្យប្រព័ន្ធផ្សព្វផ្សាយ បញ្ឈប់ការផ្សាយព័ត៌មានមិនពិត។ ប៉ុន្តែ អ្នកតាមដានសង្គម បានស្នើទៅនាយករដ្ឋមន្ត្រី រួមទាំងមន្ត្រីជំនាញបរិស្ថាន ស្រាវជ្រាវឱ្យលម្អិត ដើម្បីប្រយោជន៍រួមនៃសង្គម និងបរិស្ថាន ជាជាងទាញករណីនេះ ទៅពាក់ព័ន្ធនឹងរឿងនយោបាយ។

នៅលើទំព័រហ្វេសប៊ុករបស់សហគមន៍ជនជាតិដើមភាគតិចកួយ ស្ថិតក្នុងឃុំប្រមេរ បានបង្ហាញក្ដីបារម្ភបែបនេះ៖«ពួកយើងដែលជាសមាជិកសហគមជនជាតិដើមភាគតិចកួយ ដែលអាស្រ័យផលលើអនុផលព្រៃឈើតាមរយៈការប្រមូលជ័រទឹក បេះផ្លែឈើ ប្រមូលទឹកឃ្មុំដើម្បីប្រកបរបរចិញ្ចឹមជីវិតជាប្រចាំថ្ងៃ ពិតជាមានសេចក្តីសោកស្តាយជាខ្លាំង ចំពោះការអនុវត្តផែនការក្នុងការល្បាតការពារព្រៃពីសំណាក់ក្រសួងបរិស្ថាន ដែលមិនអាចទប់ស្កាត់បទល្មើសបាន។»។ 

ពួកគេ អំពាវនាវសារដល់ អាជ្ញាធរមូលដ្ឋាន និងក្រសួងបរិស្ថាន ឱ្យបញ្ឈប់ការរារាំងសិទ្ធិសេរីភាពក្នុងការចូលរួមចំណែកការពារព្រៃឈើ ធនធានធម្មជាតិរបស់ប្រជាពលរដ្ឋមូលដ្ឋាន ជនជាតិដើមភាគតិច និងសាធារណជន។ លើសពីនេះ ត្រូវពង្រឹងការអនុវត្តច្បាប់របស់មន្ត្រីមូលដ្ឋានប្រកប ដោយប្រសិទ្ធិភាព តម្លាភាព និងការទទួលខុសត្រូវ។ ពួកគេទទូចបន្ថែមបែបនេះ៖ «សំណូមពរដល់លោក អ៊ាង សុផល្លែត រដ្ឋមន្ត្រីក្រសួងបរិស្ថាន ចុះពិនិត្យដោយផ្ទាល់ក្នុងព្រៃការពារ ជាជាងចាំតែយករបាយការណ៍ពីមន្ត្រីថ្នាក់ក្រោម ដែលអាចមិនមានព័ត៌មានពិត ពីការបំផ្លាញធនធានធម្មជាតិក្នុងដែនជម្រកសត្វព្រៃមួយនេះ»។ 

ថ្មីៗនេះដែរ លោក ម៉ា ចិត្រា សកម្មជនបរិស្ថាន ដែលបានផ្ដល់បទសម្ភាសដល់វិទ្យុ អាស៊ីសេរី (RFA) ក៏បានលើកឡើងពីបទល្មើសព្រៃឈើ នៅដែនជម្រកព្រៃព្រះរការដែរ។ ករណីនេះ នៅថ្ងៃទី១០ ខែឧសភា ទាំងក្រសួងបរិស្ថាន និងមន្ទីរបរិស្ថានខេត្តព្រះវិហារ ក៏បង្ហាញសេចក្ដីព័ត៌មានថា លោក ម៉ា ចិត្រា និយាយព័ត៌មានមិនពិត ពាក់ព័ន្ធនឹងបទល្មើសព្រៃឈើនៅដែនជម្រកសត្វព្រៃឆែប-ព្រះរការ។ ជាមួយគ្នាដែរ មន្ទីរចាត់ទុកការផ្សាយព័ត៌មានពីបទល្មើសព្រៃឈើ ក្នុងដែនជម្រកព្រៃព្រះរការនេះ គ្មានមូលដ្ឋានច្បាស់លាស់ ដោយប្រើប្រាស់ព័ត៌មានចាស់ រូបភាពចាស់ ហើយមិនឆ្លុះបញ្ចាំងពីការពិតនៃស្ថានភាពព្រៃឈើនាពេលបច្ចុប្បន្នឡើយ។ 

​បញ្ហានេះ មន្ទីរបរិស្ថានខេត្តព្រះវិហារ សង្កេតឃើញលោក ម៉ា ចិត្រា តែងតែចូលតំបន់ការពារដោយគ្មានច្បាប់អនុញ្ញាត ហើយបង្កើតព័ត៌មានមិនពិត មានចេតនាញុះញង់ ប៉ុនប៉ងបង្កឱ្យមានបញ្ហាសណ្ដាប់ធ្នាប់ក្នុងសង្គម ដើម្បីបម្រើឱ្យនយោបាយ នៃក្រុមអគតិក្រៅច្បាប់នៅក្រៅប្រទេស។ លើសពីនេះ មន្ទីរបរិស្ថាន បានស្នើនិងព្រមានបន្ថែមដូច្នេះ៖ «មន្ទីរបរិស្ថានខេត្តព្រះវិហារ នឹងចាត់វិធានការតាមផ្លូវច្បាប់ទៅលើបុគ្គល និងក្រុមខិលខូចចំពោះករណីខាងលើ និងស្នើសុំសារព័ត៌មាន បញ្ឈប់ការផ្សាយព័ត៌មានមិនពិត និងត្រូវគោរពក្រមសីលធម៌វិជ្ជាជីវៈសារព័ត៌មានឱ្យបានត្រឹមត្រូវ ដើម្បីជៀសផុតពីការទទួលខុសត្រូវផ្នែកព្រហ្មទណ្ឌ»។ 

ជុំវិញករណីនេះ លោក ឱក សេរីសោភក្តិ៍ អ្នកជំនាញផ្នែកអភិបាលកិច្ច ក៏បានតាមដានករណីខាងលើដែរ។ លោកជំរុញឱ្យមានការស៊ើបអង្កេត ករណីនេះ នៅលើភូមិសាស្ត្រ និងតាមកាលបរិច្ឆេទជាក់ស្តែង ពាក់ព័ន្ធបទល្មើសព្រៃឈើក្នុងតំបន់ព្រៃព្រះរការ។ អ្នកជំនាញរូបនេះ យល់ថាសម័យឌីជីថល ឥឡូវមិនពិបាក ក្នុងការផ្ទៀងផ្ទាត់ រូបចាស់ ឬជារូបថតបច្ចុប្បន្នឡើយ។ ទន្ទឹមនឹងនេះ លោកណែនាំឱ្យ ញែកសំណុំរឿងបរិស្ថាន និងនយោបាយដោយដាច់បែបពីគ្នា។ 

លោក ឱក សេរីសោភក្តិ៍ អ្នកជំនាញផ្នែកអភិបាលកិច្ច។ រូបពី ហ្វេសប៊ុក​ លោក ឱក សេរីសោភក្តិ៍ 

លោក ឱក សេរីសោភក្តិ៍ បានសរសេរលើបណ្ដាញសង្គមហ្វេសប៊ុករបស់ខ្លួនយ៉ាងដូច្នេះ៖ «ការផ្សារភ្ជាប់សំណុំរឿងដូច្នេះ(បរិស្ថាននិងនយោបាយចូលគ្នា) មានលក្ខណ:គំរាមកំហែង និងបង្ហាញដោយស្វ័យប្រវត្តិនូវភាពកម្សោយ នៃអំណះអំណាងយោង»។ ទាក់ទិននឹងការហាមមិនឱ្យ ប្រព័ន្ធផ្សព្វផ្សាយព៌តមាន ផ្សាយអំពីសំណុំរឿងនេះ ទាំងដែលមិនទាន់មានការស៊ើបអង្កេតច្បាស់លាស់ លោកយល់ថា វាមានលក្ខណៈគំរាមកំហែង ហើយរឹតតែធ្វើឱ្យមតិសាធារណ: មានមន្ទិលសង្ស័យ។

«ក្នុងឋាន:ជាអ្នកតាមដានបញ្ហាសង្គម ក្នុងវិស្ស័យអភិបាលកិច្ច ខ្ញុំសង្កេតឃើញថា រាជរដ្ឋាភិបាលអណត្តិទី៧នេះ មានឆន្ទ:នយោបាយមុតមាំក្នុងរឿងអភិបាលកិច្ច តែគម្លាតរវាងឆន្ទ:នយោបាយនោះ និងការអនុវត្តរបស់មន្ត្រីថ្នាក់ក្រោម នៅឆ្ងាយពីគ្នានៅឡើយ។ អភិបាលកិច្ចជាមូលដ្ឋានគ្រិះ នៃទំនុកចិត្តរបស់ប្រជាពលរដ្ឋទៅលើរាជរដ្ឋាភិបាល។ ដូច្នេះហើយទើបមានអភិក្រមទី៥»។ លោក ឱក សេរីសោភក្តិ៍ ពន្យល់ពីសារៈសំខាន់នៃអភិបាលកិច្ច រវាងថ្នាក់ជាតិនិងថ្នាក់ក្រោមជាតិបែបនេះ ហើយលោក បានស្នើឱ្យនាយករដ្ឋមន្ត្រីស្រាវជ្រាវបន្ថែមពីករណីខាងលើ។ 
ប្រធានកម្មវិធីបណ្តាញនិងតស៊ូមតិ នៃអង្គការភាពជាដៃគូដើម្បីបរិស្ថាននិងការអភិវឌ្ឍន៍ លោក សាន ម៉ាឡា និង លោក លោក ម៉ើ ចាន់ដារ៉ា ប្រធានស្ដីទីនៃសមាគមបណ្តាញយុវជនកម្ពុជា(CYN) ក៏យល់ឃើញដូច សេរីសោភក្តិ៍ ដែរ គឺស្នើឱ្យមានការផ្ទៀតផ្ទាត់ឱ្យបានល្អិតល្អន់។ អ្នកទាំងពីរ បន្តថា ក្នុងករណីមន្ត្រីជំនាញបរិស្ថាន មិនទាន់បានផ្ទៀតផ្ទាត់ឬចុះពិនិត្យផ្ទាល់ជុំវិញការលើកឡើងរបស់សកម្មជនបរិស្ថានផង ក៏ចេញសេចក្ដីបំភ្លឺ ដោយបដិសេធ រួមទាំងចោទប្រកាន់នោះ គឺជារឿងមិនសមហេតុផលឡើយ។ 

មន្ត្រីសង្គមស៊ីវិលទាំងពីររូប សង្កេតឃើងសហគមន៍មូលដ្ឋាន និងសកម្មជនបរិស្ថាន តែងតែបង្ហាញព័ត៌មានបទល្មើសព្រៃឈើ ដោយភ្ជាប់ជាមួយនឹងរូបភាព និងទីតាំងជាក់ស្ដែង រីឯ មន្ត្រីជំនាញបរិស្ថានក៏តែងតែបដិសេធ មិនទទួលស្គាល់ ទាញភ្ជាប់ទៅនឹងរឿងនយោបាយដដែលៗ។ 

លោក ខ្វៃ អាទិត្យា អ្នកនាំពាក្យក្រសួងបរិស្ថាន ផ្ដល់បទសម្ភាសនាពេលកន្លងមក។ រូបពី ក្រសួងបរិស្ថាន 

ប្រធានស្ដីទីនៃសមាគមបណ្តាញយុវជនកម្ពុជា(CYN) អះអាងប្រាប់សារព័ត៌មានឌីជីថលថ្មីៗតាមប្រព័ន្ធទូរស័ព្ទនៅថ្ងៃនេះថា៖ «តាមរបាយការណ៍របស់សហគមន៍ព្រៃព្រះរការ ឃើញនៅតែបន្តមានការកាប់បំផ្លាញព្រៃឈើសឹងតែរាល់ថ្ងៃ ហើយយើងក៏សង្កេតឃើញដូចគ្នាដែរ តំបន់ព្រៃរការនេះ នៅតែបន្តកើតមានបទល្មើសព្រៃឈើ។ សួរថាបើបទល្មើសនេះ នៅតែបន្តមានរាល់ថ្ងៃ តើប្រជាពលរដ្ឋ ដែលអាស្រ័យលផលព្រៃសហគមន៍នេះ អាចពឹងផ្អែកលើអ្វីបានទៀត»។ 

ពាក់ព័ន្ធនឹងករណីនេះ លោក លោក ខ្វៃ អាទិត្យា អ្នកនាំពាក្យក្រសួងបរិស្ថាន ឆ្លើយតបវិញថា នឹងមានការស្រាវជ្រាវបន្ថែម ហើយអះអាងពីកិច្ចខិតខំប្រឹងប្រែងការពារព្រៃឈើរបស់មន្ត្រីបរិស្ថាន រួមទាំងការអនុវត្តច្បាប់បានយ៉ាងតឹងរឹង។ លោក ប្រាប់សារព័ត៌មានឌីជីថលថ្មីៗនៅថ្ងៃយ៉ាងដូច្នេះ៖ «យើងបន្តតាមដានលើការគ្រប់គ្រងធនធានធម្មជាតិ នៅតំបន់ការពារបន្ថែមទៀត ព្រោះកន្លងមកនេះ មានការផ្សព្វផ្សាយព័ត៌មានមិនពិត។ អ៊ីចឹង យើងនឹងបន្តអង្កេតបន្ថែមទៀត ដើម្បីផ្ទៀតផ្ទាត់ជាមួយព័ត៌មាននេះ ដោយសារកន្លងមកនេះ មានការផ្សព្វផ្សាយព័ត៌មានទើបយើងចេញសេចក្ដីបំភ្លឺជូនសាធារណជន ក៏ដូចជាតំបន់ផ្សេងទៀត យើងនឹងត្រួតពិនិត្យកិច្ចការបច្ចេកទេស ជាមួយស្ថានភាពជាក់ស្ដែង។ អ៊ីចឹង ក្រុមការងារនឹងបន្តធ្វើរឿងហ្នឹង បន្ថែមទៀត»។
ជុំវិញរបាយការណ៍ បទល្មើសកន្លងព្រៃឈើក្នុងតំបន់ព្រៃព្រះរការ ដែលកើតមានកន្លងមក លោក ខ្វៃ អាទិត្យា ថាក្រុមការងារមិនទាន់បានបូកសរុបនៅឡើយទេ៕