សៀមរាប៖ ការប្រកួតប្រជែងអង្គភាពផ្ដល់សេវាសាធារណៈគំរូ ក្នុងវិស័យអប់រំ និងសុខាភិ​បាលឆ្នាំ២០២៥ សម្រាប់សាលាបឋមសិក្សា អនុវិទ្យាល័យ និងមណ្ឌលសុខភាព នឹងធ្វើ​ឡើងក្នុងពេលឆាប់ៗនេះ។ លោក សាត ថា នាយកអនុវិទ្យាល័យភ្នំយ៉ាត ក្នុងខេត្តប៉ៃលិន ដែលជាម្ចាស់ជ័យលាភីលេខ១ កាលពីឆ្នាំ២០២៣ ប្ដេជ្ញាពង្រឹងសមត្ថភាព គុណភាព​ អង្គ​ភាព​​ខ្លួន ពិសេសអនុវត្តតាមស្តង់ដាគំរូរបស់ក្រសួង​ ដើម្បីរក្សាតំណែងជ័យលាភី​ក្នុងឆ្នាំ​២០២៥​។

 ដើម្បីជ្រាបច្បាស់សូមអញ្ជើញលោក-អ្នកនាងទស្សនាវីដេអូខាងក្រោមដូចតទៅ៖

​នាសិក្ខាសាលាផ្សព្វផ្សាយវិធីសាស្រ្តអនុវត្ត​ន៍ការ​វាយតម្លៃ និងការទទួលស្គាល់អង្គភាពផ្ដល់​សេវា​សាធារណៈគំរូ ក្នុងវិស័យអប់រំ និងសុខា​ភិ​បាលឆ្នាំ២០២៥ សម្រាប់កម្រិតអនុវិទ្យា​ល័យ បឋមសិក្សា និងមណ្ឌលសុខភាព នៅថ្ងៃទី​១២ ខែឧសភាព ក្នុងក្រុងសៀមរាប លោក សាត ថា នាយកអនុវិទ្យាល័យភ្នំយ៉ាត អះអាងប្រាប់សារព័ត៌មានឌីជីថលថ្មីៗថា អង្គភាព​លោក ​បានត្រៀម​ខ្លួន​ជា​ស្រេច ក្នុងការប្រកួតប្រជែងអង្គភាព​ផ្ដល់សេវាសាធារណៈគំរូ​ឆ្នាំ​២០២៥។ 

យ៉ាងណាក៏ដោយ នាយកអនុវិទ្យាល័យរូបនេះ បានបញ្ជាក់ពីការប្ដេជ្ញាពង្រឹងគុណភាពអប់ រំ សមត្ថភាពបង្រៀនរបស់លោកគ្រូអ្នកគ្រូនៃសាលាខ្លួន ពិសេសចំណុចសំខាន់ៗនៃស្តង់ដា​សាលាគំរូ ដើម្បីបន្តរក្សាតំណែងជ័យលាភីក្នុងឆ្នាំ២០២៥។

​អនុវិទ្យាល័យភ្នំយ៉ាត ដែលស្ថិតក្នុងខេត្តប៉ៃលិនមួយនេះ ធ្លាប់ទទួលបានជ័យលាភីលេខ១ ក្នុង​ការប្រកួតប្រជែងអង្គភាពផ្ដល់សេវាសាធារណៈគំរូឆ្នាំ២០២៣ កម្រិតអនុវិទ្យាល័យ ក្នុងចំណោមជ័យលាភីចំនួន១០។

លោក សាត ថា រម្លឹកថា មុនទទួលបានជ័យលាភីលេខ១ កាលពីឆ្នាំ២០២៣ លោកបាន ចំណាយពេល២ឆ្នាំ ដើម្បីពង្រឹងសមត្ថភាព គុណភាពអប់រំ និងអនុវត្តស្តង់ដាសាលាគំរូ មុន​ចូលរួមប្រកួត។ នៅឆ្នាំ២០២៥នេះ សាលាភ្នំយ៉ាត ក៏មានពេល២ឆ្នាំ​ ដើម្បីកែលម្អ​ចំណុច​ខ្វះ​ចន្លោះ និងបន្ថែមគុណភាព មុនពេលការប្រកួតចូលមកដល់។

លោក សាត ថា លើកឡើង៖ «ក្នុងឆ្នាំ២០២៥នេះ ខ្ញុំបានរៀបចំ និងត្រៀមរួចហើយក្នុងការ​ចូលប្រកួតម្ដងទៀត ដើម្បីទទួលយកជ័យលាភី។ ខ្ញុំប្ដេជ្ញាចិត្តថានឹងយកជ័យលាភីឱ្យបាន ក្នុងឆ្នាំ២០២៥នេះ។ យើងបានត្រៀមរួចរាល់ហើយដែរ។»។

លោក សាត ថា​ នាយកអនុវិទ្យាល័យភ្នំយ៉ាត ខេត្តប៉ៃលិន

កត្តាសំខាន់ដែលជំរុញឱ្យសាលាភ្នំយ៉ាត ទទួលបានជ័យលាភី គឺការអនុវត្តស្តង់ដាសាលា គំរូ​ស្រប​​តាមសូចនាករទាំង៨ចំណុច របស់គណៈកម្មការវាយតម្លៃស្តង់ដាសាលាគំរូ នៃ​ក្រសួង​មុខងារសាធារណៈ។ នេះជាការលើកឡើងរបស់នាយកអនុវិទ្យាល័យភ្នំយ៉ាត ដែល​លោកបន្តបញ្ជាក់ថា ​ការចូលរួមស្វែងយល់ពីនីតិវិធី និងវិធីសាស្រ្តនៃការវាយតម្លៃរបស់​គណៈ​កម្មការ ជាផ្នែកមួយសំខាន់អាចឱ្យអ្នកពាក់ព័ន្ធ ដូចជានាយក នាយិកាសាលា​ទាំងអស់​អាចស្វែងយល់ និងបន្តយកទៅអនុវត្តឱ្យបានខ្ជាប់ខ្ជួនស្របតាមស្តង់ដា។ 

និយាយចំពោះ លោកនាយក សាត ថា ជ័យលាភីលេខ១ អង្គភាពផ្ដល់សេវាសាធារណៈគំរូ អនុវិទ្យាល័យភ្នំយ៉ាត ជាគុណតម្លៃ​ និងកិត្តិយសធំធេងរបស់សាលា ពិសេសសម្រាប់លោក ជាគណៈគ្រប់គ្រង សម្រាប់លោកគ្រូអ្នកគ្រូ សិស្សានុសិស្ស អាណាព្យាបាល រួមទាំង សហគមន៍ទាំងមូល។

«ចំពោះជ័យលាភីនេះ មានតម្លៃណាស់! ទី១ សម្រាប់យើងជាអ្នកដឹកនាំក្នុងអង្គភាព។ ទី២​តម្លៃសម្រាប់គ្រូ ដែលចេញសាលារបស់យើង។ ទី៣ គឺសិស្ស ទី៤ គឺសហគមន៍ ទី៥ គឺ​អាជ្ញា​ធរ គឺមានគុណតម្លៃណាស់។ អ៊ីចឹងខ្ញុំគិតថា តម្លៃនៃការប្រឡងអង្គភាពសាធារណៈ មានតម្លៃសម្រាប់ឱ្យសហគមន៍យើង សាលារៀនយើង និងប្រទេសយើង​រីកចម្រើន​ស្រប​តាមគោលនយោបាយថ្នាក់ជាតិ»។ នេះជាការលើកឡើងរបស់លោក សាត ថា។

នាយកអនុវិទ្យាល័យភ្នំយ៉ាត ​បានបញ្ជាក់បន្ថែមថា មិនមែនសម្រាប់តែការប្រកួតប្រជែង​យកជ័យលាភីនោះឡើយ ប៉ុន្តែអនុវិទ្យាល័យភ្នំយ៉ាត បានអនុវត្តប្រចាំលើការពង្រឹងគុណ ភាពអប់រំ សមត្ថភាព និងរៀបចំសណ្ដាប់ធ្នាប់សាលា ដើម្បីជំរុញគុណភាពអប់រំ និងបណ្ដុះ ធនធានដ៏ល្អប្រសើរក្នុងសង្គម។

សូមបញ្ជាក់ថា​ ការប្រឡង​ប្រណាំងអង្គភាពផ្តល់សេវាសាធារណៈគំរូក្នុងវិស័យអប់រំ និង​វិស័យសុខាភិបាល សម្រាប់ឆ្នាំ២០២៥​ នឹង​ចាប់ផ្តើម​នាពេលខាងមុខ​ សម្រាប់​កម្រិតអនុ​វិទ្យាល័យ​ បឋមសិក្សា​ និង​មណ្ឌល​សុខភាព​។ ​ការដាក់ឱ្យអនុវត្តការវាយតម្លៃ និងការ​ទទួល ស្គាល់អង្គភាពផ្តល់សេវាសាធារណៈគំរូ ក្នុងវិស័យអប់រំ និងវិស័យសុខាភិបាល ដើម្បីជំរុញ និងលើកកម្ពស់គុណភាព និងប្រសិទ្ធភាព នៃដំណើរការផ្តល់សេវាសាធារណៈ នៅតាមអង្គភាពសាលារៀន និងមន្ទីរពេទ្យ ឱ្យកាន់តែប្រសើរឡើង៕