.png)
.png)
.jpg)
.jpg)
ចិនចុះកិច្ចព្រមព្រៀងបញ្ចូលកូឡុំប៊ីក្នុងគម្រោងផ្លូវមួយខ្សែក្រវ៉ាត់មួយ
- ថ្ងៃព្រហស្បតិ៍ ទី១៥ ខែឧសភា ឆ្នាំ២០២៥ ម៉ោង ៨:២៩ នាទី យប់
នៅថ្ងៃពុធទី១៤ឧសភានេះ កូឡុំប៊ីបានចុះកិច្ចព្រមព្រៀងជាមួយចិន បញ្ចូលខ្លួនទៅក្នុងគម្រោងផ្លូវសូត្រថ្មី ប្រកបដោយមហិច្ឆតារបស់លោកស៊ីជីនពីង។ ជាការឱកាសថ្មី ជាប្រវត្តិសាស្ត្រសម្រាប់កូឡុំប៊ី និងជាការចាក់ឫសពង្រីកឥទ្ធិពលកាន់តែខ្លាំងសម្រាប់ចិននៅតំបន់អាមេរិកឡាទីន។--
ក្រោយជំនួបរវាងប្រធានាធិបតីចិន ស៊ីជីនពីង និងប្រធានាធិបតីកូឡុំប៊ី ហ្គូស្តាវ៉ូ ប៉េត្រូ នៅទីក្រុងប៉េកាំង ក្រៅក្របខ័ណ្ឌនៃវេទិកាកំពូលចិន-អាមេរិកឡាទីន ចិននិងកូឡុំប៊ីបានប្រកាសព្រមព្រៀងចុះហត្ថលេខាលើគម្រោងកិច្ចសហប្រតិបត្តិការស្ថាបនារួមគ្នា “ផ្លូវសូត្រថ្មី”។ នេះបើតាមការចុះផ្សាយរបស់ទីភ្នាក់ងារសារព័ត៌មានផ្លូវការចិន ដោយបន្ថែមថា លោកប្រធានាធិបតីចិនស៊ីជីនពីង ចង់ឃើញ ចិននិងកូឡុំប៊ី មានកិច្ចសហការទ្វេភាគីក្នុងកំរិតកាន់តែខ្ពស់ឡើងៗ។
ប្រធានាធិបតី ក៏ដូចជារដ្ឋាភិបាលកូឡុំប៊ី ក៏បានបង្ហោះសារភ្លាមដែរ អបអរការចុះកិច្ចព្រមព្រៀងបញ្ចូលប្រទេសនៅក្នុងគម្រោងផ្លូវសូត្រចិន ដោយចាត់ទុកថា ចិននិងកូឡុំប៊ីកំពុងផ្តល់ឱកាសថ្មី ជាប្រវត្តិសាស្ត្រដល់ការវិនិយោគ កិច្ចសហប្រតិបត្តិការបច្ចេកទេស និងការអភិវឌ្ឍជានិរន្តន៍រវាងប្រទេសទាំងពីរ។ ទំនាក់ទំនងការបទេសរបស់កូឡុំប៊ីកំពុងប្តូរផ្លាស់។ ជាទំនាក់ទំនង ស្មើភាពនិងដោយសេរីជាមួយពិភពលោកទាំងមូល។ នេះជាសាររបស់ប្រធានាធិបតីកូឡុំប៊ី ប៉េត្រូ បង្ហោះនៅតាមបណ្តាញសង្គមX អមដោយរូបភាពវីដេអូនៃសកម្មភាពចុះហត្ថលេខាលើកិច្ចព្រមព្រៀងរវាងប្រទេសទាំងពីរ ចិន-កូឡុំប៊ីផង។
តាមរយៈកិច្ចព្រមព្រៀងនេះ កូឡុំប៊ីបានក្លាយជាសមាជិកចុងក្រោយគេបង្អស់នៃគម្រោងផ្លូវសូត្រថ្មីប្រកបដោយមហិច្ឆតាបំផុតរបស់ចិន ដែលមានជាង១០០ប្រទេសនៅលើពិភពលោកចូលរួម ដោយភាគច្រើនជាប្រទេសកំពុងអភិវឌ្ឍន៍។
ផ្តួចផ្តើមឡើងដោយលោកស៊ីជីនពីង តាំងពីឆ្នាំ២០១៣មក គម្រោងផ្លូវសូត្រថ្មី ដែលមានឈ្មោះជាផ្លូវការ “ផ្លូវមួយខ្សែក្រវ៉ាត់មួយ” ជាផែនការយុទ្ធសាស្ត្ររបស់ចិន ដែលផ្តោតលើការស្ថាបនាហេដ្ឋារចនាសម្ព័ន្ធផ្លូវថ្នល់ ផ្លូវទឹក និងផ្លូវដែក ក្នុងបណ្តាប្រទេសកំពុងអភិវឌ្ឍន៍ ដើម្បីបង្កើនឥទ្ធិពលនយោបាយនិងសេដ្ឋកិច្ចរបស់ចិន ក្នុងបណ្តាប្រទេសទទួលផល។
បច្ចុប្បន្ន គម្រោងផ្លូវសូត្រថ្មី បាននិងកំពុងពង្រីកឥទ្ធិពលចិននៅតំបន់អាមេរិកឡាទីន ដែលធ្លាប់ជាដែនឥទ្ធិពលរបស់អាមេរិក និងជាសមរភូមិប្រកួតប្រជែងការទូតជាមួយអាមេរិក។ ចិនបានទាំងវ៉ារឈ្នះអាមេរិក ដោយក្លាយជាប្រទេសដៃគូពាណិជ្ជកម្មទីមួយ របស់ប្រេស៊ីល ប៉េរ៉ូ ស៊ីលី និងមានពីរភាគបីនៃប្រទេសក្នុងតំបន់អាមេរិកឡាទីនបានភ្ជាប់ខ្លួនរួចហើយក្នុងគម្រោងផ្លូវសូត្រចិននេះ៕
ដោយ៖ ម៉ម ពិសី (RFI ខេមរភាសា)
© រក្សាសិទ្ធិដោយ thmeythmey.com
.gif)