.png)
.png)
.jpg)
.jpg)
សម្តេច ហ៊ុន ម៉ាណែត៖ មិនមានគោលការណ៍លក់ព្រលានយន្តហោះអន្តរជាតិពោធិ៍ចិនតុងឱ្យក្រុមហ៊ុនឯកជនឡើយ
- ថ្ងៃសុក្រ ទី១៦ ខែឧសភា ឆ្នាំ២០២៥ ម៉ោង ១១:១៩ នាទី ព្រឹក
សម្ដេច ហ៊ុន ម៉ាណែត នាយករដ្ឋមន្រ្តីកម្ពុជា ថ្លែងនាពិធីអបអរសាទរខួបអនុស្សាវរីយ៍លើកទី៨០ ថ្ងៃកំណើតនគរបាលជាតិកម្ពុជា។
ភ្នំពេញ៖ ពីពិធីអបអរសាទរខួបអនុស្សាវរីយ៍លើកទី៨០ ថ្ងៃកំណើតនគរបាលជាតិកម្ពុជា នៅព្រឹកថ្ងៃទី១៦ឧសភានេះ សម្ដេចនាយករដ្ឋមន្រ្តី ហ៊ុន ម៉ាណែត បានសង្កត់ធ្ងន់ថា រដ្ឋាភិបាលកម្ពុជាមិនគោលការណ៍លក់អាកាសយានដ្ឋានអន្តរជាតិភ្នំពេញពោធិ៍ចិនតុងឱ្យក្រុមហ៊ុនឯកជនឡើយ។ បើតាមសម្ដេច រដ្ឋាភិបាលនឹងរក្សាអាកាសយានដ្ឋានអន្តរជាតិភ្នំពេញ ដែលជាតម្លៃប្រវត្តិសាស្រ្តនេះ មិនឱ្យបាត់បង់ឡើយ។
ក្រោយមានការផ្សព្វផ្សាយយ៉ាងផុលផុសពីការផ្ទេរការហោះហើរនៅអាកាសយានដ្ឋានអន្តរជាតិភ្នំពេញ ទៅអាកាសយានដ្ឋានអន្តរជាតិតេជោ នៅយប់ថ្ងៃទី៩ ខែកក្កដាខាងមុខ សម្ដេច ហ៊ុន ម៉ាណែត ប្រមុខរាជរដ្ឋាភិបាលកម្ពុជា បានចេញមុខអះអាងថា មានមិនគោលការណ៍លក់អាកាសយានដ្ឋានចាស់នោះទេ។ សម្ដេចនាយករដ្ឋមន្រ្តី មានប្រសាសន៍ដូច្នេះ៖«ម៉ោងនេះ ថ្មើរនេះ គឺមិនគោលការណ៍ដែលថាសម្រេចលក់ព្រលានយន្តហោះនេះឱ្យទៅឯកជននោះទេ»។
សម្ដេច លើកឡើងបែបនេះ បន្ទាប់ពីមានប្រជាពលរដ្ឋមួយចំនួន ព្រួយបារម្ភ និងការជជែកវែកញែកព័ត៌មានមិនពិត ពាក់ព័ន្ធនឹងការលក់ព្រលានយន្តហោះពោធិ៍ចិនតុងឱ្យក្រុមហ៊ុនឯកជន។ ទន្ទឹមនឹងនេះ សម្ដេចក៏បង្ហាញជំហររបស់រដ្ឋាភិបាល ក្នុងការរក្សាអាកាសយានដ្ឋានអន្តរជាតិភ្នំពេញ ដែលជាតម្លៃប្រវត្តិសាស្រ្ត និងជាកេរ្តិ៍មរតករបស់ព្រះបរមរតនកោដ្ឋ សម្រាប់បម្រើប្រយោជន៍ពលរដ្ឋនៅភ្នំពេញបន្តទៀត។
ថ្លែងក្នុងវេទិកាអបអរសាទរខួបអនុស្សាវរីយ៍លើកទី៨០ ថ្ងៃកំណើតនគរបាលជាតិកម្ពុជា សម្ដេច ហ៊ុន ម៉ាណែត បញ្ជាក់ថា សម្ដេច ជាពិសេសរដ្ឋាភិបាល មិនដែលបានដឹងពីគម្រោងលក់ព្រលានយន្តហោះពោធិ៍ចិនតុងទៅឱ្យក្រុមហ៊ុនឯកជននោះទេ។ ប្រមុខរដ្ឋាភិបាលឱ្យក្រុមអ្នករិះគន់បង្ហាញឯកសារទាក់ទងនឹងការលក់ព្រលានយន្តហោះពោធិ៍ចិនតុងទៅឱ្យក្រុមហ៊ុនឯកជន។
សម្តេច អះអាងថា លេខាធិការដ្ឋានអាកាសចរណ៍ស៊ីវិលនៅតែជាស្ថាប័នគ្រប់គ្រង ហើយក្រុមហ៊ុន CSA ដែលកន្លងមក គឺជាដៃគូប្រតិបត្តិប៉ុណ្ណោះ។ ជាមួយគ្នានេះ ទ្រព្យសម្បត្តិនៅព្រលានចាស់ ត្រូវបានការពារយ៉ាងម៉ត់ចត់ ហើយនឹងត្រូវបានប្រើប្រាស់សម្រាប់ការចុះចតបន្ទាន់ (Emergency Landing) ជាពិសេសឧទ្ធម្ភាគចក្រ។
សូមបញ្ជាក់ថា អាកាសយានដ្ឋានអន្តរជាតិតេជោ គ្រោងបើកដំណើរនៅថ្ងៃទី១០ ខែកក្កដាខាងមុខ។ អាកាសយានដ្ឋានអន្តរជាតិតេជោដែលធំជាងគេនៅកម្ពុជានេះ សាងសង់លើផ្ទៃដី ២ ៦០០ហិកតា ដោយចំណាយថវិកា ប្រមាណ ១ ៦០០លានដុល្លារ។
អាកាសយានដ្ឋានអន្តរជាតិតេជោ ជាប្រភេទ4F ដែលអាចស្រូបយក និងទទួលបានការហោះហើរឆ្លងទ្វីបដោយអាចឱ្យយន្តហោះធុនធំរហូតដល់ Airbus A380-800 និងយន្តហោះ Boeing747-800 ចុះចតបាន។ អាកាសយានដ្ឋានមួយនេះ អាចមានសមត្ថភាពទទួលភ្ញៀវប្រមាណ ១៥លាននាក់ក្នុងមួយឆ្នាំ នៅក្នុងដំណាក់កាលទី១៕
© រក្សាសិទ្ធិដោយ thmeythmey.com
Tag:
.gif)