.png)
.png)
.jpg)
.jpg)
Mark Zuckerberg ខកចិត្តដែលរត់៥គីឡូម៉ែត្រ ប្រើពេលជាង ២០នាទី
- ថ្ងៃសុក្រ ទី១៦ ខែឧសភា ឆ្នាំ២០២៥ ម៉ោង ១:៥៩ នាទី រសៀល
លោក Mark Zuckerberg នាយកប្រតិបត្តិក្រុមហ៊ុន Meta ខកចិត្ត ដោយសាររត់រយៈចម្ងាយ ៥ គីឡូម៉ែត្រ ប្រើពេលើស ២០ នាទី។ មហាសេដ្ឋីរូបនេះ បានដាក់គោលដៅរត់ក្នុងចម្ងាយនេះ ដោយប្រើពេលក្រោម២០នាទី។
ម្ចាស់បណ្តាញសង្គមដ៏ល្បីល្បាញហ្វេសប៊ុក បានចូលរួមរត់ក្នុងកម្មវិធី Stanford Medicine MyHeart Counts marathon នៅថ្ងៃទី២៨ ខែមេសា នៅរដ្ឋកាលីហ្វនីញ៉ា។ កាលនោះលោក Zuckerberg បានប្រើឈ្មោះ Martin Salzburg ដើម្បីជៀសវាងកុំឱ្យអ្នកចូលរួមផ្សេងទៀតចាប់អារម្មណ៍ខ្លួន និងក្រុមគ្រួសារ។ មហាសេដ្ឋីសញ្ជាតិអាម៉េរិក វ័យ៤០ឆ្នាំ បានបញ្ចប់ការប្រណាំងដោយប្រើពេល ២០នាទី និង ៣៥វិនាទី ក្នុងចម្ងាយ៥គីឡូម៉ែត្រ ស្ថិតក្នុងចំណាត់ថ្នាក់លេខ៤ ក្នុងក្រុមអាយុចន្លោះ ៤០-៤៤ឆ្នាំ និងលេខ ៣៣ ចំណោមអ្នករត់សរុប ១ ២១៤នាក់។
ពាក់ស្បែកជើងម៉ាក Nike Alphafly 3 លោក Zuckerberg បានបង្ហោះរូបថតជុំគ្នាមួយសន្លឹកក្រោយការប្រកួត លើបណ្តាញសង្គម Instagram ដោយសរសេរថា «រត់ ៥គីឡូម៉ែត្រ ប្រចាំឆ្នាំជាមួយក្រុមប្រយុទ្ធ Guerrilla ដោយប្រើពេលលើសពី ២០ នាទី»។
ក្នុងការបង្ហោះនោះ មហាសេដ្ឋីរូបនេះ បានបញ្ចូលបទចម្រៀង «Pretty Slowly» ដែលដូចជាបង្ហាញការខកចិត្តចំពោះការរត់ដោយប្រើពេលច្រើននាទីរបស់ខ្លួន របស់ពេលរូបគេបានដាក់គោលដៅប្រើពេលក្រោម២០នាទី បន្ទាប់ពីក្នុងឆ្នាំ ២០២២ ក្រោយការវះកាត់ជង្គង់ ៥ខែ Zuckerberg ប្រពេល ២០នាទី និង៥៨វិនាទី។
កម្មវិធីរត់ម៉ារ៉ាតុងប្រចាំឆ្នាំ ធ្វើឡើងនៅក្នុងបរិវេណសាកលវិទ្យាល័យ Stanford ក្បែរទីស្នាក់ការកណ្តាលរបស់ក្រុមហ៊ុន Meta ដែលកម្មវិធីនេះធ្វើឡើងក្នុងបំណងរៃអង្គាសថវិកាសម្រាប់ឱ្យមជ្ឈមណ្ឌល Stanford ដំណើរការស្រាវជ្រាវជំងឺសរសៃឈាមបេះដូង។ Zuckerberg ចូលរួមកម្មវិធីនេះញឹកញាប់ និងជាអ្នកគាំទ្រយុទ្ធនាការនេះជាច្រើនឆ្នាំមកហើយដែរ។
មហាសេដ្ឋីពាន់លាន ដែលជាអ្នកចូលចិត្តការចែករំលែកសកម្មភាពហាត់កីឡារបស់ខ្លួន បានចូលរួមហ្វឹកហាត់កីឡាជឺជីតស៊ូវិញ្ញាសាប្រយុទ្ធ និងក្បាច់គុនចម្រុះ ដែលនេះជាផ្នែកមួយក្នុងការបង្កើតទម្លាប់បន្ធូរភាពតានតឹងរបស់រូបគេ។
ការចាត់ថ្នាក់ក្នុងទស្សនាវដ្តី Forbes គិតត្រឹមខែឧសភា ឆ្នាំ ២០២៥ Mark Zuckerberg ជាប់ជាមហាសេដ្ឋីលំដាប់ទីពីរពិភពលោក ដោយមានទ្រព្យ ២២២,៤ ពាន់លានដុល្លារ តាមពីក្រោយ Elon Musk ម្ចាស់ក្រុមហ៊ុន Tesla ដែលឈរកំពូលគេ ៤២០,៦ ពាន់លានដុល្លារ និងលេខ៣ Jeff Bezos ម្ចាស់ក្រុមហ៊ុន Amazon ដែលមានទ្រព្យ ២២០,៥ ពាន់លានដុល្លារ៕
© រក្សាសិទ្ធិដោយ thmeythmey.com
Tag:
.gif)