សេដ្ឋកិច្ចអន្តរជាតិ   អន្តរជាតិ  
អេមីរ៉ាតអារ៉ាប់រួមចុះកិច្ចព្រមព្រៀង ២០០ពាន់លានដុល្លារជាមួយអាម៉េរិក និងសន្យាវិនិយោគ ១,៤ទ្រីលានដុល្លារ
  • ថ្ងៃសុក្រ ទី១៦ ខែឧសភា ឆ្នាំ២០២៥ ​​ ម៉ោង ២:៥៩ នាទី រសៀល
អេមីរ៉ាតអារ៉ាប់រួមចុះកិច្ចព្រមព្រៀង ២០០ពាន់លានដុល្លារជាមួយអាម៉េរិក និងសន្យាវិនិយោគ ១,៤ទ្រីលានដុល្លារ
ប្រាធានាធិបតី ដូណាល់ ត្រាំ (ឆ្វេង) និងប្រធានាធិបតី Sheikh Mohammed bin Zayed Al Nahyan ។ រូបភាព ៖ X/@WhiteHouse

អាម៉េរិក និងអេមីរ៉ាតអារ៉ាប់រួ មនៅថ្ងៃទី១៥ ខែឧសភា បានចុះកិច្ចព្រមព្រៀងតម្លៃ ២០០​ពាន់​លានដុល្លារ ដែលភាគច្រើនស្ថិតនៅក្នុងគម្រោងបច្ចេកវិទ្យាបញ្ញាសិប្បនិម្មិត (AI) អំឡុងដំណើរទស្សនកិច្ចប្រធានាធិបតីអាម៉េរិក លោក ដូណាល់ ត្រាំ។

TTN-Free-Banner-In-Article-PC

 ក្រុមហ៊ុន Etihad Airways របស់អេមីរ៉ាតអារ៉ាប់រួម នឹងវិនិយោគ ១៤,៥ពាន់លានដុល្លារ ដើម្បីទិញយន្តហោះ Boeing 777X និង 787 ចំនួន ២៨គ្រឿង ដែលផលិតដោយ​ក្រុម​ហ៊ុនអាម៉េរិក Boeing ដោយប្រើម៉ាស៊ីនពីក្រុមហ៊ុន GE Aerospace។ នេះបើយោងតាម​សេចក្តីថ្លែងការណ៍របស់សេតវិមាន។

«ជាមួយយន្តហោះ Boeing 777X ដែលជាជំនាន់ចុងក្រោយ ការវិនិយោគនេះនឹងពង្រឹង​ភាពជាដៃគូ អាកាសចរណ៍ពាណិជ្ជកម្មយូរអង្វែង រវាងអាម៉េរិក និងអេមីរ៉ាតអារ៉ាប់រួម ដើម្បី ជំរុញការផលិតរបស់អាម៉េរិក និងការនាំចេញ»។ នេះបើតាមការបញ្ជាក់ពីសេតវិមាន។

បន្ថែមពីនេះ ក្នុងចំណោមទឹកប្រាក់ ២០០ពាន់លានដុល្លារ ក្រសួងពាណិជ្ជកម្មអាម៉េរិក​បានអះអាងថា ភាគីទាំងពីរបានព្រមព្រៀងគ្នា ក្នុងការបង្កើត «ភាពជាដៃគូបង្កើនល្បឿន បញ្ញាសិប្បនិម្មិត អាម៉េរិក អេមីរ៉ាតអារ៉ាប់រួម» ដោយបង្កើតលក្ខខណ្ឌសម្រាប់អេមីរ៉ាត អារ៉ាប់រួម ពង្រីកលទ្ធភាពទទួលបានបន្ទះឈីប AI កម្រិតខ្ពស់ពីអាម៉េរិក។

ចំណែកភាគីអេមីរ៉ាតអារ៉ាប់រួមវិញ ប្រធានាធិបតី Sheikh Mohammed bin Zayed Al Nahyan បានប្រកាសថា ប្រទេសនេះគ្រោងវិនិយោគ ១,៤ទ្រីលានដុល្លារអាម៉េរិក​ក្នុងរយៈ​ពេល ១០ឆ្នាំខាងមុខ ក្នុងវិស័យបច្ចេកវិទ្យា AI និងថាមពល ក៏ដូចជាការសរសើរ​ពីចំណង​ភាពជាដៃគូដ៏រឹងមាំជាមួយទីក្រុងវ៉ាស៊ីនតោន។

យោងតាមទីភ្នាក់ងារសារព័ត៌មាន Reuters អេមីរ៉ាតអារ៉ាប់រួមកំពុងស្វែងរកការគាំទ្រ​ពី​អាម៉េរិក ដើម្បីសម្រេចបាននូវគោលដៅរបស់ខ្លួន​ក្នុងការប្រែក្លាយប្រទេសឈូងសមុទ្រ​ដែលមានទ្រព្យសម្បត្តិនេះ ទៅជាមហាអំណាចឈានមុខគេក្នុងវិស័យ AI។

 អេមីរ៉ាតអារ៉ាប់រួម​ គឺជាប្រទេសចុងក្រោយនៃដំណើរទស្សនកិច្ចនៅមជ្ឈិមបូព៌ារបស់លោក ត្រាំ។ នៅអារ៉ាប៊ីសាអូឌីតដែលជាប្រទេសលោក ត្រាំ ដាក់ជើងដំបូងគេក្នុងអាណត្តិប្រធានា​ធិបតី​ ជាលើកទី២ អារ៉ាប៊ីសាអូឌីត និងអាម៉េរិក​ បានចុះកិច្ចព្រៀមព្រៀងអាវុធតម្លៃជិត ១៤២ពាន់លានដុល្លារ។ ចំណែកនៅកាតាវិញ ក្រុមហ៊ុនអាកាសចរណ៍ជាតិ Qatar Airways បានកក់យន្តហោះដឹកអ្នកដំណើរ ១៦០គ្រឿង ពីក្រុមហ៊ុន Boeing ជាមួយតម្លៃនៃកិច្ច​សន្យាប្រមាណ ៩៦ពាន់លានដុល្លារ៕

 

អត្ថបទទាក់ទង
 កាតាចុះកិច្ចព្រមព្រៀងទិញយន្តហោះអាម៉េរិកតម្លៃ ៩៦ពាន់លានដុល្លារ
 អារ៉ាប៊ីសាអូឌីតចុះកិច្ចព្រមព្រៀងទិញអាវុធពីអាម៉េរិក ១៤២ពាន់លានដុល្លារ

អ្នកសរសេរអត្ថបទ

ធន់ សេងហុង (THUN Senghong) បានចាប់ផ្តើមការងារជាអ្នកសារព័ត៌មាននៅ សារព័ត៌មានថ្មីៗ ក្នុងឆ្នាំ២០២២។ បច្ចុប្បន្ននេះ សេងហុងកំពុងសិក្សាផ្នែកសេដ្ឋកិច្ចនយោបាយ នៅសកលវិទ្យាល័យសេដ្ឋកិច្ចទីក្រុងហូជីមិញ ប្រទេសវៀតណាម។ សេងហុង ជាអ្នកតាមដានព័ត៌មានជាតិ និងអន្តរជាតិ ផ្តោតសំខាន់លើផ្នែកសេដ្ឋកិច្ច ។   Thun Senghong is a freelancer national and international news reporter at Thmey Thmey. He is currently studying at UEH University in Vietnam. He aims to cover current issues in economy. 

Cambodianess.com
© រក្សាសិទ្ធិដោយ thmeythmey.com
Tag:

ធន់ សេងហុង