បន្ទាប់ពីអង្រួន​មហោស្រពភាពយន្តអន្តរជាតិកានកាលពី៣ឆ្នាំមុន ជាមួយរឿង Top Gun តារាឯកភាពយន្តហូលីវូដ​ដែលមាន​តម្លៃខ្លួនខ្ពស់និងល្បីឈ្មោះ លោក​ Tom Cruiseបានវិលត្រលប់មក​បង្ហាញ​មុខ​សាជាថ្មី​នៅ មហោស្រពភាពយន្ត​ក្នុងប្រទេស​បារាំង ដែលបាន​ជ្រើសរើស​រឿង Mission : Impossible-, The final Reckoning សម្រាប់ចាក់បញ្ចាំងពិសេស​កាលពីថ្ងៃ​ពុធទី ១៤ឧសភា។ តើបេសកកម្មដែល​មិនអាចទៅរួច ដែលជារឿង​ភាគទី​៨​ទៅហើយនិយាយពីអ្វី ហើយតើវា​អាច​ជា​​ភាគចុងបញ្ចប់នៃ​បេសកកម្ម​របស់​ភ្នាក់ងារ​ Ethan Hunt   ដូច​ការពន្លយ​របស់តារាភាពយន្ត និង​អ្នកដឹកនាំរឿងដែរឬទេ?

តារាហូលីវូដ Tom Cruise ជាប្រភពកម្លាំង​រុញច្រាន​មហោស្រពភាពយន្ត​កាន​ កាលពីថ្ងៃ​ពុធ​ឲ្យកាន់តែ​រំជើបរំជួល ជាមួយ​នឹង​ការចាក់បញ្ចាំង​រឿងដែលគេកំពុងទន្ទឹងរង់ចាំ ​​Mission : Impossible-The final Reckoning។ បង្កើតឡើង​នៅ​ឆ្នាំ ១៩៩៦ ជាមួយ​តម្លៃផលិត​៨០លានដុល្លារកាលពីដំបូងទី រឿងភាគទី​៨​នៃ​បេសកកម្ម​ដែល​មិនអាចទៅរួច​របស់​ភ្នាក់ងារស៊ើបការណ៍សម្ងាត់ Ethan Hunt  មាន​តម្លៃផលិត​ដល់​ទៅ ៤០០លាន​ដុល្លារ។

Mission : Impossible-The final Reckoning មានដំណើររឿងបន្ត​ពីភាគមុន នៅពេល​ Entityដែលជាបញ្ញាសិប្បនិម្មិត​ព្យាយាម​ដណ្តើមអំណាចពីមនុស្ស​ដើម្បីគ្រប់គ្រងពិភពលោក។ នៅក្នុង​ភាគនេះ ភ្នាក់ងារសម្ងាត់​ Ethan Hunt ជាមួយ​ក្រុមការងារ​ត្រូវ​ស្វែងរក​ប្រអប់កូដនៅក្នុង​នាវាមុជទឹករុស្ស៊ី​ដែល​ត្រូវគ្រាប់​ធ្លាក់ក្នុងបាតសមុទ្រ​អាក់ទិក​ដោយសារ​បេសកកម្ម​របស់​Ethan ។​ 

ខុសពី​បេសកកម្ម​របស់ Ethanដែលចង់បាន​កូដ​ដើម្បី​បំផ្លាញ​ ​ Gabriel ដែលជាមេក្រុមជនអន្ធពាល​ក៏ចង់​បាន​កូដ​ដើម្បីគ្រប់គ្រង​Entity ដឹកនាំពិភពលោក មានអំណាច​បញ្ជា អាវុធនុយក្លេអ៊ែររបស់​មហាអំណាចក្នុងពិភពលោក។ តើ​ Ethan​អាច​សង្រ្គោះពិភពលោក​ពី​ការវាយប្រហារ​នុយក្លេអ៊ែរ​របស់​ ​Entityដែរឬទេ?

នៅក្នុងរឿងនេះ​ដែលភាគច្រើនថត​នៅកន្លែងផ្ទាល់ ដោយ​មិនប្រើស្ទូឌីយោ ដូចជា​កំពូលភ្នំនៅអាហ្វ្រិកខាងត្បូង។ Tom Cruiseគ្មានតួជំនួស​ នៅពេល​សំដែង​នៅ​កន្លែងដែលគេត្រូវ​ប្រថុយនឹង​គ្រោះថ្នាក់។ ឧទាហរណ៍ នៅឈុតឆាក​ដែលលោក​ចាប់តោងស្លាបយន្តហោះ​នៅលើ​អាកាស ជា​ឈុតឆាកដែលថតពិតៗ​នៅក្នុងអាកាស គឺ​កម្រ​ ឬ​គ្មានតារាភាពយន្ត​ណាម្នាក់​ដែល​អាច​ធ្វើបាន។ Tom Cruiseជា​តារាភាពយន្ត​ហូលីវូដតែមួយគត់​ដែលហ៊ាន​​ប្រថុចជីវិត ព្រហើន​ធ្វើ​រឿង​ដែល​មនុស្ស​ទូទៅ​ខា្លចព្រោះសេចក្តីស្លាប់។

សូម្បីតែ​អ្នកដឹកនាំ​រឿង លោក Christopher McQuarrie ដែល​សហការធ្វើរឿងនេះ ៤ភាគមកហើយ ក៏ស្ញប់ស្ញែងតារា​ សាច់ចាំ ស្រស់សង្ហារ អាយុ ៦២ឆ្នាំ ​និងមានសាច់ដុំ​មាឌមាំ​ម្នាក់នេះដែរ។ ចំពោះលោក Tom ជា​មនុស្ស​ដែលមានចិត្ត មានៈចង់​ធ្វើឲ្យអស់ពីលទ្ធភាព ឬហួស​ព្រំដែន​របស់​មនុស្សធម្មតា។

នៅក្នុង​បទសម្ភាសន៍​កន្លងមក តារាភាពយន្ត​ដែលមានជំនាញ​បើកយន្តហោះគ្រប់ប្រភេទ ជាពិសេស​យន្តហោះចម្បាំង ទទួលស្គាល់​ថា ពីរឿង​មួយ ទៅ​រឿងមួយ ការតោងលែង​ខ្លួន​នៅក្នុង​អាកាស​កាន់តែ​ឆ្កួតទៅៗ។ ប៉ុន្តែ ខុសពីមនុស្ស​ទូទៅដែលខ្លាច​អ្វីដែលមិនទាន់មកដល់ លោក​វិញ មិនដែលខ្លាចទេ។ អារម្មណ៍របស់​លោក​នៅចំពោះមុខ​ភាពភ័យខ្លាច? គ្មានទេ គឺមានតែភាព​កន្ត្រាក់អារម្មណ៍។

Tom Cruise​ អាច​តោង​ លោតផ្លោះ​បានដោយសារ​កាយសម្បារដែលបានមកពីការហាត់សម ហ្វឹកហាត់​Acobate​ដូចកីឡាករជំនាញ។​ គ្មានតួជំនួស កន្លែងសំដែង​ពិតៗ Tom Cruiseជាតារាហូលីវូដដែលមានតម្លៃខ្លួន​ខ្ពស់ អាច​ដល់​១០០លាន​ដុល្លារ​សម្រាប់ការសំដែង១រឿង។ ចំណែករឿងMission : Impossibleដែលល្បីរន្ទឺក្នុងពិភពលោក​ រកបានប្រាក់ចំណូលសរុបជាង ៣៤០០លានដុល្លារ​នៅក្នុងពិភពលោក៕

ដោយ៖ ឈាង បុប្ផា (RFI ខេមរភាសា)