.png)
.png)
.jpg)
.jpg)
លោក ហ៊ុន ម៉ានី៖ ការបរិច្ចាគឈាមជាការលះបង់ដ៏ធំធេងបំផុតលើសពីថវិកា ប៉ុន្តែជាមនោសញ្ចេតនាដ៏ជ្រាលជ្រៅសម្រាប់ប្រជាជន
- ថ្ងៃសៅរ៍ ទី១៧ ខែឧសភា ឆ្នាំ២០២៥ ម៉ោង ៧:៤៦ នាទី ព្រឹក
ថ្លែងក្នុងយុទ្ធនាការស្ម័គ្រចិត្តបរិច្ចាគឈាមនៅខេត្តកំពង់ធំ លោក ហ៊ុន ម៉ានី រដ្ឋមន្រ្តីក្រសួងមុខងារសាធារណៈ បានចាត់ទុកការបរិច្ចាគឈាម គឺជាការលះបង់ដ៏ធំធេងបំផុតលើសពីថវិកា និងជាមនោសញ្ចេតនាដ៏ជ្រាលជ្រៅសម្រាប់ប្រជាជន។ គិតមកដល់បច្ចុប្បន្ន លោកឧបនាយករដ្ឋមន្រ្តី បានចូលរួមបរិច្ចាគឈាមចំនួន ១៤លើករួចមកហើយ។
នៅថ្ងៃទី១៦ ឧសភា នាខេត្តកំពង់ធំ មានរៀបចំយុទ្ធនាការស្ម័គ្រចិត្តបរិច្ចាគឈាម ក្រោមប្រធានបទ «ផ្ដល់ឈាម ផ្ដល់ជីវិត»។ លោក ហ៊ុន ម៉ានី រដ្ឋមន្រ្តីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា ក៏បានអញ្ជើញចូលរួមកម្មវិធីសប្បុរសធម៌មួយនេះ។
នាយុទ្ធនាការខាងលើ លោក ហ៊ុន ម៉ានី បានរំឭកពីការអំពាវនាវរបស់សម្ដេច ហ៊ុន សែន ប្រធានព្រឹទ្ធសភា ឱ្យចូលរួមបរិច្ចាគឈាម ដើម្បីសង្រ្គោះជីវិតមនុស្ស។ «ខ្ញុំបានចូលរួមសកម្មភាពមនុស្សធម៌លើកដំបូងដោយការស្ម័គ្រចិត្តផ្ដល់ឈាម ដែលធ្វើឡើងស្របពេលមានការថយចុះនៃចំនួនការបរិច្ចាគឈាមដោយស្ម័គ្រចិត្ត និងមានការធ្លាក់ចុះនូវស្ដុកឈាមរបស់មជ្ឈមណ្ឌលជាតិផ្ដល់ឈាម ហើយមកទល់ពេលនេះ ខ្ញុំបានសម្រេចការបរិច្ចាគឈាមរបស់ខ្ញុំចំនួន ១៤លើកហើយ»។ លោក ហ៊ុន ម៉ានី លើកឡើងបែបនេះ។
លោក ហ៊ុន ម៉ានី មើលឃើញថាតាមរយៈការអំពាវនាវរបស់សម្ដេច ហ៊ុន សែន និងការស្វែងយល់ពីតម្រូវការជាក់ស្ដែង ជាពិសេសការយល់ពីអត្ថន័យនៃការផ្ដល់ឈាម បានក្លាយជាចំណុចចាប់ផ្ដើមនៃការមើលលើអត្ថប្រយោជន៍រួមនៃការលះបង់របស់មនុស្សម្នាក់ៗ។ បើតាមលោក ហ៊ុន ម៉ានី ការលះបង់នេះ គឺជាការលះបង់ដ៏ធំធេងលើសពីការលះបង់ថវិកា ក៏ប៉ុន្តែជាការបរិច្ចាគឈាមខ្លួនឯងប្រកបដោយមនោសញ្ចេតនាដ៏ជ្រាលជ្រៅ។
ថ្នាក់ដឹកនាំយុវជនធំនៅកម្ពុជារូបនេះ ក៏បានលើកទឹកចិត្តដល់ប្រជាពលរដ្ឋឱ្យបន្តចូលរួមក្នុងយុទ្ធនាការនេះឱ្យបានកាន់តែច្រើនថែមទៀត ដើម្បីចូលរួមចំណែកជួយសង្រ្គោះអាយុជីវិតរបស់ប្រជាពលរដ្ឋខ្មែរទាំងអស់គ្នា៕
© រក្សាសិទ្ធិដោយ thmeythmey.com
.gif)