.png)
.png)
.jpg)
.jpg)
កូរ៉េខាងត្បូងឆ្លៀតចរចាពាណិជ្ជកម្មជាមួយអាមេរិក ក្រៅក្របខ័ណ្ឌជំនួបAPEC
- ថ្ងៃអាទិត្យ ទី១៨ ខែឧសភា ឆ្នាំ២០២៥ ម៉ោង ៧:៥០ នាទី ព្រឹក
កូរ៉េខាងត្បូងឆ្លៀតចរចាពាណិជ្ជកម្មជាមួយអាមេរិក ក្រៅក្របខ័ណ្ឌជំនួបAPEC AFP - BRENDAN SMIALOWSKI
បន្ទាប់ពីបានចេញសេចក្តីថ្លែងការណ៍រួមបញ្ជាក់អំពីក្តីព្រួយបារម្ភចំពោះភាពប្រឈមជាមូលដ្ឋានដែលនាំឱ្យសកម្មភាពផ្តោះប្តូរពាណិជ្ជកម្មពិភពលោកអាប់អួរ ជំនួបប្រជុំថ្នាក់រដ្ឋមន្ត្រីក្រសួងពាណិជ្ជកម្ម នៃក្រុមប្រទេសសមាជិកអង្គការសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក (APEC) ក៏ជាឱកាសជួបចរចាទ្វេភាគីជាច្រើនផ្សេងទៀត។ នៅថ្ងៃសុក្រទី១៦ឧសភានេះ កូរ៉េខាងត្បូងបានចាប់ផ្តើមចរចាពាណិជ្ជកម្មជុំវិញការដំឡើងពន្ធគយឡើងវិញ ដោយមានការដ្ឋានសំណង់នាវាជាធ្នាក់។
ឆ្លៀតក្នុងឱកាសដែលរដ្ឋមន្ត្រីនៃប្រទេសជាសមាជិកអង្គការសហប្រតិបត្តិការសេដ្ឋកិច្ចអាស៊ីប៉ាស៊ីហ្វិកទាំង២១ប្រទេសដែលរួមមានរដ្ឋមន្ត្រីចិននិងតំណាងពាណិជ្ជកម្មអាមេរិកផង កំពុងជួបជុំគ្នានៅលើកោះJeju កូរ៉េខាងត្បូងបានផ្តើមចរចាពាណិជ្ជកម្មជុំវិញបញ្ហាពន្ធនាំចូលជាមួយអាមេរិកឡើងវិញ។
មានសល់ផលពាណិជ្ជកម្មជាមួយអាមេរិក ដល់ទៅ៦៦ពាន់លានដុល្លារ កាលពីឆ្នាំទៅ កូរ៉េខាងត្បូងជាស៊ីបធំមួយនៃសង្គ្រាមពាណិជ្ជកម្មរបស់លោកត្រាំ។ សហរដ្ឋអាមេរិកបានសម្រេចដំឡើងពន្ធនាំចូលដល់ទៅ២៥%លើរាល់គ្រប់ផលិតផលនាំចូលពីកូរ៉េខាងត្បូង មុននឹងប្រកាសព្យួរ៩០ថ្ងៃដូចបណ្តាប្រទេសផ្សេងទៀត។
ហេតុដូច្នេះហើយបានជាកូរ៉េខាងត្បូងត្រូវប្រឹងចរចារកដំណោះស្រាយឱ្យបានមុនខែកក្កដា២០២៥។ ដោយសង្ឃឹមថានឹងរកឃើញកិច្ចព្រមព្រៀងរួមមួយជាមួយអាមេរិក កូរ៉េខាងត្បូងក៏មានចំណុចខ្លាំងគួរជាទីទាក់ទាញ សម្រាប់ដោះដូរក្នុងកិច្ចចរចាដែរ។ កូរ៉េខាងត្បូងនឹងចូលជួយអាមេរិកក្នុងវិស័យការដ្ឋាននាវាដែលកូរ៉េខាងត្បូងនាំមុខគេខ្លាំងបន្ទាប់ពីចិន និងដែលអាមេរិកចង់ពង្រឹងពង្រីកដើម្បីកាត់បន្ថយភាពរំពឹង។
ក្នុងក្របខ័ណ្ឌនេះ និងតាំងពីមុនផ្តើមជំនួបជាមួយរដ្ឋមន្ត្រីក្រសួងពាណិជ្ជកម្មកូរ៉េខាងត្បូង លោក Ahn Duk-geun តំណាងពាណិជ្ជកម្មអាមេរិក លោក Jamieson Greer បានទៅជួបបុរសដ៏មានឥទ្ធិពលរបស់កូរ៉េខាងត្បូង គឺលោក Chung Ki-sun អគ្គនាយករងក្រុមហ៊ុនHD Hyundai ដែលជាក្រុមហ៊ុនយក្សផ្នែកសំណង់នាវា។ ជាលទ្ធផល ក្រុមហ៊ុន Hyundai បានស្នើឱ្យមានកិច្ចសហការផលិតឡានសន្ទូចនៅកំពង់ផែ និងកិច្ចសហប្រតិបត្តិការអភិវឌ្ឍបច្ចេកវិទ្យារួម ព្រមទាំងការបំពាក់បំប៉នកម្លាំងពលកម្មជាន់ខ្ពស់។ នេះបើតាមសេចក្តីថ្លែងការណ៍របស់ក្រុមហ៊ុនHyundaiកូរ៉េខាងត្បូង។
ចំណែកលោករដ្ឋមន្ត្រីក្រសួងពាណិជ្ជកម្មនិងឧស្សាហកម្មកូរ៉េខាងត្បូង ដែលធ្លាប់ជួបពិភាក្សាជាមួយតំណាងអាមេរិកម្តងហើយ កាលពីខែមេសានៅទីក្រុងវ៉ាស៊ីនតោន នឹងបង្ហាញអំពីលទ្ធភាពបង្កើនការនាំចូលឧស្ម័នរាវធម្មជាតិអាមេរិកមកកូរ៉េខាងត្បូង ព្រមទាំង ដំឡើងអត្រាប្តូរប្រាក់វ៉ុន ដែលវ៉ាស៊ីនតោនតែងចោទថាថោកជាងតម្លៃពិត។
សង្គ្រាមពាណិជ្ជកម្មរបស់អាមេរិក ផ្ទុះឡើងជួនចំពេលដែលកូរ៉េខាងត្បូងកំពុងធ្លាក់ក្នុងស្ថានភាពផុយស្រួយដោយហេតុតែមានវិបត្តិនយោបាយអូសបន្លាយ។ សកម្មភាពសេដ្ឋកិច្ចបានធ្លាក់ចុះដោយឥតព្រាងទុកអស់០,១%នៅត្រីមាសទីមួយនៃឆ្នាំ២០២៥នេះ។ ចំណុចដ៏រសើបប្រកបដោយហានិភ័យមួយទៀតដែលអាចជាលេសនាំឱ្យមានការដំឡើងពន្ធ គឺក្នុងវិស័យសឺមីកុងឌុចទ័រ។ រដ្ឋបាលលោកត្រាំ កំពុងបើកអង្កេតហើយ។ Samsung Electronics និងSK Hynix ក្រុមហ៊ុនយក្សជំនាញខាងបន្ទះឈីបរបស់កូរ៉េខាងត្បូង ដែលនាំចេញសហរដ្ឋអាមេរិកក្នុងទំហំ១០,៧ពាន់លានដុល្លារនៅឆ្នាំ២០២៤ អាចប្រឈមនឹងការគំរាមកំហែងខ្លាំងជាងគេ៕
ដោយ៖អៀង សុខម៉ិញ/ RFI ខេមរភាសា
© រក្សាសិទ្ធិដោយ thmeythmey.com
.gif)