.png)
.png)
.jpg)
.jpg)
ឥណ្ឌូណេស៊ី សម្លឹងមើលទីផ្សារដូងប្រេងថ្មីនៅអាហ្វ្រិក និងអាស៊ីខាងកើត
- ថ្ងៃចន្ទ ទី១៩ ខែឧសភា ឆ្នាំ២០២៥ ម៉ោង ៧:៥៩ នាទី ព្រឹក
កម្មករប្រមូលដូងប្រេងនៅតំបន់ចម្ការមួយក្នុងខេត្ត Riau ប្រទេសឥណ្ឌូណេស៊ី។ រូបភាព ៖ AFP
រដ្ឋាភិបាលឥណ្ឌូណេស៊ី សម្លឹងមើលទីផ្សារនាំចេញដូងប្រេងថ្មីនៅបណ្តាប្រទេសអាហ្វ្រិក និងអាស៊ីខាងកើត។ នេះត្រូវបានគេមើលឃើញថា ជាការកាត់បន្ថយការពឹងផ្អែកលើទីផ្សារចាស់ដូចជា ឥណ្ឌា និងប៉ាគីស្ថានដែលកំពុងមានភាពតានតឹងជាមួយគ្នា។
«យើងនឹងបើកទីផ្សារថ្មី ជាពិសេសទីផ្សារនៅអាហ្វ្រិក អាស៊ីខាងកើត និងបណ្តាប្រទេសដ៏ទៃទៀត។ យើងនឹងផ្តោតលើទីផ្សារថ្មីទំាងនោះ»។ នេះបើតាមលោក Ardi Praptono អគ្គនាយកដំណាំនៃក្រសួងកសិកម្មឥណ្ឌូណេស៊ីបានប្រកាសនៅថ្ងៃទី១៤ ខែឧសភា។
ឥណ្ឌូណេស៊ី ជាប្រទេសនាំចេញដូងប្រេងកំពូលមួយនៅលើពិភពលោក។ លោក Ardi បានសង្កត់ធ្ងន់ពីសារៈសំខាន់នៃការកាត់បន្ថយដំណាក់កាលដំបូងលើទីផ្សារចាស់ បើទោះបីជាជម្លោះរវាងឥណ្ឌា និងប៉ាគីស្ថានមិនទាន់ប៉ះពាល់ដោយផ្ទាល់ដល់ការនាំចេញដូងប្រេងឥណ្ឌូណេស៊ីក៏ដោយ។
បើតាមទិន្នន័យពីរដ្ឋាភិបាលឥណ្ឌូណេស៊ី ដូងប្រេងប្រទេសនេះ ត្រូវបាននាំចេញច្រើនៅ ៤ ប្រទេសមានដូចជា ចិន ឥណ្ឌា ប៉ាគីស្ថាន និងអាម៉េរិក។
នៅឆ្នាំ២០២៣ ការនាំចេញប្រេងដូងឈានដល់ ៣៨,២៣លានតោន បង្កើតប្រាក់ចំណូល ២៥,៦១ពាន់លានដុល្លារ។ នេះបើតាមសារព័ត៌មាន ANTARA។
ផលិតកម្មដូងប្រេងឆៅរបស់ឥណ្ឌូណេស៊ីត្រូវបានព្យាករថាកើនឡើងដល់ ៥៣,៦លានតោន នៅឆ្នាំ២០២៥។ នេះបើតាមសារព័ត៌មាន Xinhua ស្រង់ទិន្នន័យពីសមាគមដូងប្រេងឥណ្ឌូណេស៊ី៕
© រក្សាសិទ្ធិដោយ thmeythmey.com
Tag:
.gif)