.png)
.png)
.jpg)
.jpg)
គ្រឿងក្នុងជ្រូក១តោននាំចូលពីថៃ ត្រូវបានអាជ្ញាធរខេត្តបាត់ដំបងបង្រ្កាប និងកម្ទេចចោល
- ថ្ងៃចន្ទ ទី១៩ ខែឧសភា ឆ្នាំ២០២៥ ម៉ោង ១:៥៩ នាទី រសៀល
ភ្នំពេញ៖ គ្រឿងក្នុងជ្រូកដែលដឹកចូលមកពីប្រទេសថៃ ចំនួន១០០០គីឡូក្រាម(១តោន) ត្រូវបានសមត្ថកិច្ចខេត្តបាត់ដំបងរឹបអូស និងដុតបំផ្លាញចោល នៅស្រុកសង្កែ។ ស្នងការនគរបាលខេត្តបាត់ដំបង បានបញ្ជាក់ថា ការដឹកជញ្ជូនគ្រឿងក្នុងជ្រូកទាំងនេះពីប្រទេសថៃ ចូលកម្ពុជា គឺមានលក្ខណៈខុសបច្ចេកទេស និងគ្មានលិខិតអនុញ្ញាតពីអាជ្ញាធរ។
បើតាមសេចក្តីជូនដំណឹងរបស់ស្នងការដ្ឋាននគរបាលខេត្តបាត់ដំបង នាថ្ងៃទី១៨ ខែឧសភា រថយន្តដែលដឹកជញ្ជូនគ្រឿងក្នុងជ្រូកខុសលក្ខណៈបច្ចេកទេស និងគ្មានលិខិតអនុញ្ញាត ចំនួន១តោននោះ គឺត្រូវបានអាជ្ញាធរស្ទាក់បង្ក្រាបនៅចំណុចផ្លូវជាតិលេខ៥ រង្វង់មូលស្រុកថ្មគោល ស្ថិតនៅស្រុកថ្មគោល ខេត្តបាត់ដំបង។ ក្នុងប្រតិបត្តិការនេះ សមត្ថកិច្ចបានឃាត់ រថយន្តមួយគ្រឿងម៉ាក Toyota Highlander ពណ៌ទឹកមាស ឆ្នាំ២០០៣ ពាក់ផ្លាកលេខ ភ្នំពេញ ២AU -៩៧៦៤ បើកបរដោយបុរសវ័យ៤២ឆ្នាំម្នាក់ រស់នៅខេត្តបន្ទាយមានជ័យ ដោយនាំបុរសនោះជាមួយវត្ថុតាង ទៅសាកសួរនៅស្នងការដ្ឋាននគរបាលខេត្តបាត់ដំបង។
ក្រោយការសាកសួររួច សមត្ថកិច្ចនគរបាលបានរាយការណ៍ព្រះរាជអាជ្ញានៃអយ្យការអមសាលាដំបូង ខេត្តបាត់ដំបង ហើយសម្រេចយកគ្រឿងក្នុងជ្រូកនាំចូលពីថៃទាំងនោះ ទៅដុតបំផ្លាញចោលនៅទីលានចាក់សំរាមស្ថិតនៅភូមិអូរមុនី ឃុំអន្លង់វិល ស្រុកសង្កែ ខេត្តបាត់ដំបង។ ចំណែកឯ អ្នកដឹកជញ្ជូនវិញ សមត្ថកិច្ចនឹងបន្តនីតិវិធីទៅតាមផ្លូវច្បាប់ ៕
© រក្សាសិទ្ធិដោយ thmeythmey.com
Tag:
.gif)