ភ្នំពេញ៖ រដ្ឋសភា បានរៀបចំវេទិកាផ្សព្វផ្សាយ ស្ដីពី «ប្រព័ន្ធគាំពារសង្គមនៅកម្ពុជា» ដើម្បីបញ្ជ្រាប​ចំណេះដឹងកិច្ចគាំពារសង្គម ដល់ភាគីពាក់ព័ន្ធ ពិសេសដល់តំណាងរាស្រ្ត​​ក្នុង​រដ្ឋ​សភា។ វេទិកានេះត្រូវបានរៀបចំ​ឡើង នៅថ្ងៃទី១៩ឧសភា នៅវិមានរដ្ឋសភា ដោយ សម្ដេច ឃួន សុដារី ចាត់ទុកវេទិកានេះថា ជាឱកាសល្អក្នុងនាមជាស្ថាប័នតាក់តែងច្បាប់ និងតាមដាន​ការ​អនុវត្តច្បាប់ និងជាតំណាងរាស្រ្ត អាច​យកចំណេះដឹងកិច្ចគាំពារសង្គម ទៅផ្សាយបន្ត​ដល់ពលរដ្ឋតាមមូលដ្ឋាន។

វេទិកានេះ ត្រូវបានរៀបចំឡើងដោយមានកិច្ចសហការជាមួយក្រសួងសង្គមកិច្ច អតីត​យុទ្ធជន និងយុវនីតិសម្បទា និង​ក្រ​សួង​​​ការងារ បណ្តុះបណ្តាលវិជ្ជាជីវៈ និងមានអ្នកចូលរួម​ប្រមាណ៣០០នាក់ ដែលភាគច្រើនជាសមាជិកព្រឹទ្ធ​សភារដ្ឋសភា ក្រសួងការងារ ក្រសួង​សង្គមកិច្ច និងដៃគូពាក់ព័ន្ធមួយចំនួនទៀត។ 

ក្នុងពិធីប្រកាសបើកវេទិកា សម្ដេចប្រធារដ្ឋសភា ឃួន សុដារី បានគូសបញ្ជាក់ថា ​ប្រព័ន្ធ​គាំ​ពារ​សង្គម បានរួមចំណែកយ៉ាងសំខាន់ ជួយដល់ពលរដ្ឋក្នុងពេលជួបវិបត្តិនានា និងចូលរួម​ជួយ​កាត់បន្ថយភាពក្រីក្រនៅកម្ពុជា។

សម្ដេច ឃួន សុដារី ប្រធានរដ្ឋសភា ក្នុងវេទិកា ផ្សព្វផ្សាយគាំពារសង្គម នាព្រឹកថ្ងៃទី១៩ឧសភា ឆ្នាំ២០២៥។ រូបពី រដ្ឋសភា 

ប្រព័ន្ធគាំពារសង្គម ក៏ជាផ្នែកមួយនៃការគាំពារ​ថែទាំ​សុខភាពពលរដ្ឋ ចាប់តាំង​ពីពេល​ចាប់កំណើត រហូតដល់ទទួលមរណភាពផងដេរ ដែលអាចកំណត់ជា «អភិក្រមនៃវដ្តជីវិត» មានដំណាក់កាល៧ រួមមាន មាតុភាពនិងហានិភ័យកុមារភាព, ហានិភ័យសុខភាព, ហានិភ័យការងារ, ពិការភាព, និកម្មភាព, ភាពគ្មានជម្រកនិងជរាភាព និងឧត្ដរជីវី។ សម្តេចប្រធានព្រឹទ្ធសភា បន្ថែមដូច្នេះ មុននឹងបន្ត​ចាត់ទុក វេទិការផ្សព្វផ្សាយនាពេលនេះ ថាជាឱកាសរបស់សមាជិករដ្ឋសភា និងព្រឹទ្ធសភា ក្នុងការបង្កើនចំណេះដឹងពាក់ព័ន្ធ​នឹង​ប្រព័ន្ធគាំពារសង្គម។

សម្ដេច ឃួន សុដារី បានថ្លែងបន្ថែមថា៖ «​ចំណេះដឹងនេះ (កិច្ចគាំពារសង្គម)មិនគ្រាន់តែ​ផ្ដល់​​ឱ្យតំណាងរាស្ត្រជាមូលដ្ឋាន នៃចំណេះដឹង(កិច្ចគាំពារសង្គម) សម្រាប់ចុះជួបជាមួយ​ពលរដ្ឋ ដើម្បី​ផ្សព្វផ្សាយ ជម្រាបជូនឱ្យគាត់(ពលរដ្ឋ) បានដឹង ព្រោះជារឿង​ដែលគាត់​(ពលរដ្ឋ) ត្រូវការបំផុត ក្នុងការរស់នៅរបស់គាត់។»។ 

លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ក្នុងវេទិកាផ្សព្វផ្សាយ ប្រព័ន្ធគាំពារសង្គម នៅវិមានរដ្ឋសភា នាថ្ងៃទី១៩ឧសភា ឆ្នាំ២០២៥។ រូបពី រដ្ឋសភា 

សម្រាប់ប្រមុខរដ្ឋសភា ចំណេះដឹងកិច្ចគាំពារសង្គម ដែលទទួលបានក្នុងវេទិកានេះ នឹង​ជួយ​​ឱ្យ​សមា​ជិក សមាជិកា រដ្ឋសភា និងព្រឹទ្ធសភា មានមតិយោបល់កាន់តែច្រើន ក្នុង​កិច្ច​ប្រ​ជុំ សមាជរដ្ឋសភា និងព្រឹទ្ធសភា ដែលនឹងរៀបចំឡើង នៅដើមខែមិថុនា ខាងមុខនេះ។

 សម្ដេច ឃួន សុដារី ​សង្កត់ធ្ងន់ថា ដើម្បីបម្រើពលរដ្ឋឱ្យកាន់តែមានសមត្ថកិច្ចភាព ចាំបាច់​បំផុត​ គឺត្រូវបំពាក់នូវចំណេះដឹងសំខាន់ៗ សម្រាប់ឆ្លើយតបតម្រូវការរបស់រាស្រ្ត និងរួមចំ​ណែក​ជាមួយរដ្ឋាភិបាល ក្នុង​ការអភិវឌ្ឍសង្គមជាតិប្រកបដោយបរិយាប័ន្ន និងភាពធន់៕ 

លោក ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ក្នុងវេទិកា ផ្សព្វផ្សាយប្រព័ន្ធគាំពារសង្គម នៅវិមានរដ្ឋសភា នាថ្ងៃទី១៩ឧសភា ឆ្នាំ២០២៥។ រូបពី រដ្ឋសភា