.png)
.png)
.jpg)
.jpg)
ប្រឡងមន្រ្តីច្បាប់៖ បេក្ខជន៤១នាក់ នឹងប្រឡងលើវិញ្ញាសាសរសេរលើកទី២ នៅថ្ងៃទី២៥ ឧសភា
- ថ្ងៃអង្គារ ទី២០ ខែឧសភា ឆ្នាំ២០២៥ ម៉ោង ៣:៤៩ នាទី រសៀល
គណៈកម្មការរៀបចំការប្រឡងប្រជែង នឹងរៀបចំការប្រឡងប្រជែងជ្រើសរើសមន្ត្រីរាជការឱ្យចូលបម្រើការងារនៅអគ្គលេខាធិការដ្ឋាន ក្រុមប្រឹក្សាអ្នកច្បាប់ ក្នុងក្របខណ្ឌទីស្តីការគណៈរដ្ឋមន្ត្រី លើវិញ្ញាសាសរសេរលើកទី២ នៅថ្ងៃទី២៥ ឧសភាខាងមុខ។ បើតាមក្រសួងមុខងារសាធារណៈ ក្នុងដំណើរការប្រឡងវិញ្ញាសាសរសេរលើកទី១ គណៈកម្មការ សម្រាំងបានបេក្ខជនចំនួន ៤១នាក់ ក្នុងចំណោម ៥០៧នាក់។
ក្រោយបញ្ចប់ដំណើរការប្រឡងលើវិញ្ញាសាសរសេរលើកទី១ និងប្រកាសលទ្ធផលលើកទី១ គណៈកម្មការរៀបចំការប្រឡងប្រជែងនៃក្រសួងមុខងារសាធារណៈ បានរកឃើញបេក្ខជនដែលជាជើងខ្លាំងចំនួន ៤១នាក់ ក្នុងនោះស្រ្តីចំនួន ១៨នាក់ ដើម្បីបន្តការប្រឡងលើវិញ្ញាសាសសរសេរលើកទី២។
វិញ្ញាសាសរសេរលើកទី២ នៅថ្ងៃទី២៥ ឧសភាខាងមុខ នឹងរៀបចំនៅសាលាភូមិន្ទរដ្ឋបាល លើវិញ្ញាសាអធិប្បាយ ជំនាញឯកទេសរយៈពេល ៣ម៉ោង និងវិញ្ញាសាអធិប្បាយ ចំណេះដឹងទូទៅ រយៈពេល ២ម៉ោងផងដែរ។ ក្នុងដំណាក់កាលទី២នេះ ក្រសួងមុខងារសាធារណៈ នឹងជ្រើសរើសបេក្ខជនត្រឹមតែ១៥នាក់ប៉ុណ្ណោះ។
សូមបញ្ជាក់ថា ការប្រឡងប្រជែងជ្រើសរើសមន្រ្តីក្នុងសម័យកំណែទម្រង់ការជ្រើសរើសមន្រ្តីនេះ ក្រសួងមុខងារសាធារណៈ បន្តអនុវត្តដោយឈរលើគោលការណ៍គុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព។ ជាមួយគ្នានេះ ក្រសួងមុខងារសាធារណៈ មិនអនុញ្ញាតឱ្យបេក្ខជនយកឯកសារផ្សេងៗ ឧបករណ៍អេឡិចត្រូនិកគ្រប់ប្រភេទ ចូលក្នុងមណ្ឌលប្រឡងឡើយ៕
© រក្សាសិទ្ធិដោយ thmeythmey.com
Tag:
.gif)