.png)
.png)
.jpg)
.jpg)
សម្ដេច ហ៊ុន ម៉ាណែត៖ ចុះជួបសហគមន៍ផ្ទាល់ ដោះស្រាយលឿនជាង ឱ្យក្រុមការងារចុះទៅសិក្សា
- ថ្ងៃអង្គារ ទី២០ ខែឧសភា ឆ្នាំ២០២៥ ម៉ោង ៥:០៩ នាទី ល្ងាច
សម្ដេច ហ៊ុន ម៉ាណែត នាយករដ្ឋមន្រ្តីកម្ពុជា នាពិធីសម្ពោធបើកឱ្យដំណើរជាផ្លូវការរោងចក្រផលិតស៊ីម៉ងត៍ ក្នុងស្រុកឱរ៉ាល់ ខេត្តកំពង់ស្ពឺ។ រូបភាព៖ STPM
ភ្នំពេញ៖ ពីពិធីសម្ពោធបើកឱ្យដំណើរជាផ្លូវការរោងចក្រផលិតស៊ីម៉ងត៍ ក្នុងស្រុកឱរ៉ាល់ ខេត្តកំពង់ស្ពឺ សម្តេច ហ៊ុន ម៉ាណែត បានលើកពីការដោះស្រាយបញ្ហានៅតំបន់ខ្នងផ្សារដោយជោគជ័យ ក្រោយសម្ដេចចុះទៅ និងជួបប្រធានសហគមន៍ដោយផ្ទាល់។ សម្ដេច ថ្លែងដូច្នេះ៖ «ខ្ញុំដើរឡើងភ្នំ ៥ម៉ោង ហើយចុះមកវិញ ខ្ញុំអង្គុយនិយាយជាមួយប្រធានសហគមន៍ប្រហែលកន្លះម៉ោងគត់។ តែកន្លះម៉ោងនេះ ខ្ញុំអាចយល់ថាប្រសើរជាង ហើយដោះស្រាយត្រូវជាង។ បើយើងឱ្យក្រុមការងារចុះទៅសិក្សារាប់សិនខែ»។
កាលពីខែមីនា កន្លងទៅ សម្ដេច ហ៊ុន ម៉ាណែត នាយករដ្ឋមន្រ្តីកម្ពុជា, រដ្ឋមន្រ្តីក្រសួងទេសចរណ៍, រដ្ឋមន្រ្តីបរិស្ថាន និងអភិបាលខេត្តកំពង់ស្ពឺ បានធ្វើដំណើរដោយថ្មើរជើងទៅកាន់ភ្នំខ្នងផ្សារ។ ក្នុងដំណើរចុះទស្សនកិច្ចនៅតំបន់ខ្នងផ្សារ សម្ដេច ហ៊ុន ម៉ាណែត បានជួបជាមួយប្រជាសហគមន៍ ដើម្បីដឹងពីសុខទុក្ខ និងតម្រូវការរបស់ប្រជាពលរដ្ឋនាតំបន់នោះ ជាពិសេសការបម្រើសេវាកម្មទេសចរណ៍។
នាពិធីសម្ពោធបើកឱ្យដំណើរជាផ្លូវការរោងចក្រផលិតស៊ីម៉ងត៍ សម្ដេចនាយករដ្ឋមន្រ្តី បានរំឭកពីការភ័យខ្លាចរបស់ប្រជាសហគមន៍ ចំពោះការអនុញ្ញាតឱ្យវិស័យឯកជនមកវិនិយោគនៅតំបន់ខ្នងផ្សារ។ ក្រោយស្ដាប់ការលើកឡើងរបស់ប្រជាសហគមន៍ សម្ដេច ហ៊ុន ម៉ាណែត សម្រេចលុបចោលគម្រោងវិនិយោគនានានៅខ្នងផ្សារ ដើម្បីរក្សាផលប្រយោជន៍ដល់ប្រជាសហគមន៍ ដែលរកចំណូលពីវិស័យទេសចរណ៍។ នាយករដ្ឋមន្ត្រី បន្តថារដ្ឋាភិបាល មិនបដិសេដរាល់ការអភិវឌ្ឍនោះទេ ប៉ុន្តែត្រូវរក្សាតម្លៃនៃទីតាំងនោះ។
សូមអញ្ជើញស្ដាប់ការលើកឡើងរបស់សម្ដេច ហ៊ុន ម៉ាណែត នាយករដ្ឋមន្រ្តីកម្ពុជា ដូចតទៅ៖
ការធ្វើដំណើរទៅកាន់តំបន់ខ្នងផ្សារ បានបង្ហាញសម្ដេច ហ៊ុន ម៉ាណែត ឱ្យដឹងលើសពីអ្វីដែលឃើញផែនទី។ «ទៅមើលផ្ទាល់បានដឹងថា ជួនកាលយើងបោះប្លង់នៅលើផែនទី គិតថាកន្លែងហ្នឹងគួរតែវិនិយោគ តែដល់យើងចុះទៅមើលផ្ទាល់ បានឃើញថា អត់បានទេ បើវិនិយោគងាប់»។ ប្រមុខរាជរដ្ឋាភិបាល បញ្ជាក់បែបនេះដោយគូសបញ្ជាក់ពីជំហររក្សាសិទ្ធិ និងការពារដល់សហគមន៍ រួមទាំងបង្រៀនប្រជាសហគមន៍បន្ថែម ពីការធ្វើសេវាកម្មទេសចរណ៍ផងដែរ។
សូមបញ្ជាក់ថា កាលពីថ្ងៃទី១៦ ឧសភា ក្រសួងបរិស្ថាន តាមរយៈគម្រោង «និរន្តរភាពតំបន់ទេសភាព និងទេសចរណ៍ធម្មជាតិកម្ពុជា» បានបើកការដ្ឋានសាងសង់ផ្លូវចូលទៅភ្នំខ្នងផ្សារ និងហេដ្ឋារចនាសម្ព័ន្ធចាំបាច់មួយចំនួន។ ការអភិវឌ្ឍន៍តំបន់ព្រៃភ្នំដ៏មានសក្ដានុពលនេះ ធ្វើឡើងទិសដៅលើកកម្ពស់ជីវភាពរស់នៅរបស់ប្រជាសហគមន៍ តាមរយៈការបម្រើសេវាទេសចរណ៍៕
© រក្សាសិទ្ធិដោយ thmeythmey.com
Tag:
.gif)