ការ​លក់​រាយ ទិន្នផល​ឧស្សាហកម្ម និង​ការ​វិនិយោគ​ទ្រព្យសកម្ម​ថេរ​របស់​​ចិន​ទាំងអស់ មិនអាចឈានដល់ការព្យាករ​ នៅក្នុងខែមេសា។ នេះបង្ហាញថា សកម្មភាពសេដ្ឋកិច្ចរបស់ចិនកំពុងធ្លាក់ចុះ។

ការិយាល័យស្ថិតិជាតិរបស់ចិន (NBS) នៅថ្ងៃទី១៩ ខែឧសភា​ បានប្រកាសថា ការលក់រាយរបស់ប្រទេសនេះក្នុងខែមេសាបានកើនឡើង ៥,១ភាគរយ បើធៀបគ្រាដូចគ្នាកាលពីឆ្នាំមុន។ កំណើននេះ គឺទាបជាងការព្យាកររបស់ Reuters អត្រា ៥,៥ភាគរយ ហើយក៏ទាបជាងខែមុនក្នុងអត្រា ៥,៩ភាគរយ។

ទិន្នផលឧស្សាហកម្មបានកើនឡើង ៦,១ភាគរយ ក្នុងខែមេសាធៀបនឹងឆ្នាំមុន។ ការកើនឡើងនេះ គឺទាបជាងខែមីនា ៧,៧ភាគរយ។ នេះ​បង្ហាញ​ថា​ ពន្ធ​នាំ​ចូល​របស់​អាម៉េរិក​ បាន​ប៉ះ​ពាល់​ខ្លះ​ដល់​សកម្មភាព​ផលិត​នៅ​ក្នុង​ប្រទេស​ចិន។

NBS លើកឡើងថា​ បរិយាកាសខាងក្រៅនៅតែមានភាពមិនឋិតថេរ និងមិនច្បាស់លាស់ជាច្រើន។ មូលដ្ឋានគ្រឹះសម្រាប់ការងើបឡើងវិញនៃសេដ្ឋកិច្ចចាំបាច់ត្រូវបន្តការកែទម្រង់។

ការវិនិយោគទ្រព្យសកម្មថេរក្នុងរយៈពេល ៤ខែឆ្នាំនេះ បានកើនឡើង ៤ភាគរយ ទាបជាងការព្យាករ ៤,២ភាគរយ នៅក្នុងការស្ទង់មតិរបស់ Reuters។ ក្នុង​នោះ​ការ​វិនិយោគ​លើ​អចលន​ទ្រព្យ​ធ្លាក់​ចុះ ​១០,៣ភាគរយ។

ទោះជាយ៉ាងណា អត្រាអ្នកអត់ការងារធ្វើនៅទីក្រុងបានធ្លាក់ចុះបន្តិចមកត្រឹម ៥,១ភាគរយនៅក្នុងខែមេសា។ ទិន្នន័យ​នេះ​ត្រូវបានប្រកាស ខណៈ​ដែល​អ្នក​សេដ្ឋកិច្ច​ជា​ច្រើន​បាន​ព្រមាន​ពី​ការ​បាត់​បង់​ការងារ​ច្រើន ​នៅ​ក្នុង​ប្រទេស​ចិន​ដោយ​សារ​តែ​សង្គ្រាម​ពាណិជ្ជកម្ម​ជាមួយ​អាម៉េរិក។

កាល​ពី​ខែ​មុន ប្រធានាធិបតី​អាម៉េរិក ដូណាល់ ត្រាំ បាន​ដាក់​ពន្ធ​នាំ​ចូល ១៤៥ភាគរយ លើ​ទំនិញ​ចិន។ បន្ទាប់មកទីក្រុងប៉េកាំងបានឆ្លើយតបជាមួយនឹងពន្ធ ១២៥ភាគរយលើទំនិញរបស់អាម៉េរិក។ ទោះជាយ៉ាងណា ភាពតានតឹងពាណិជ្ជកម្មរវាងប្រទេសទាំងពីរបានចុះត្រជាក់បន្តិច បន្ទាប់ពីកិច្ចប្រជុំនៅទីក្រុងហ្សឺណែវ ប្រទេសស្វីស កាលពីដើមខែឧសភានេះ។ បច្ចុប្បន្ន ភាគីទាំងពីរបានកាត់បន្ថយពន្ធនាំចូលជាបណ្ដោះអាសន្នរយៈពេល ៩០ថ្ងៃ ដោយបើកផ្លូវឱ្យមានការចរចាកាន់តែស៊ីជម្រៅឆ្ពោះទៅរកកិច្ចព្រមព្រៀងរយៈពេលវែង។

កិច្ច​ព្រម​ព្រៀង​នេះ​កើត​ឡើង​ ខណៈ​​ទាំង​អាម៉េរិក និង​ចិន​ទទួល​ស្គាល់​ផល​ប៉ះពាល់​សេដ្ឋកិច្ច​នៃ​ពន្ធ​នាំ​ចូល។ នៅចិន សកម្មភាពផលិតកម្មបានធ្លាក់ចុះដល់កម្រិតទាបរយៈពេល ១៦ខែនៅក្នុងខែមេសា។ សន្ទស្សន៍តាមដានការបញ្ជាទិញថ្មីក៏បានធ្លាក់ចុះដល់កម្រិតទាបបំផុតក្នុងរយៈពេលជាងពីរឆ្នាំ។ សន្ទស្សន៍តម្លៃទំនិញប្រើប្រាស់ (CPI) របស់ប្រទេសបានធ្លាក់ចុះ ៣ខែជាប់ៗគ្នា ដែលបង្ហាញថា សម្ពាធបរិត្តផរណានៅតែមាននៅក្នុងសេដ្ឋកិច្ច។

ទោះបីជាយ៉ាងណា ការនាំចេញរបស់ចិន បានកើនឡើងច្រើនជាងការរំពឹងទុកនៅក្នុងខែមេសា ដោយសារការលក់ទៅកាន់តំបន់អាស៊ីអាគ្នេយ៍ ប៉ះប៉ូវការធ្លាក់ចុះនៃការដឹកជញ្ជូនទៅកាន់អាម៉េរិក។ យោងតាមទិន្នន័យគយចិន ការនាំចេញទៅកាន់អាម៉េរិក បានធ្លាក់ចុះ ២,៥ភាគរយ ក្នុងរយៈពេល ៤ខែឆ្នាំនេះ។ 

លោក Tommy Xie នាយកធនាគារ OCBC បានព្យាករថា សេដ្ឋកិច្ចចិន នឹងកើនឡើងជាង ៥ភាគរយនៅក្នុងត្រីមាសទីពីរ បន្ទាប់ពីឈានដល់ ៥,៤ភាគរយ នៅក្នុងត្រីមាសទី១។ សន្ទុះ​នេះ ​នឹង​ជួយ​ឱ្យ​ពួកគេ ​ឈាន​ដល់​គោលដៅ​កំណត់​ដោយ​អាជ្ញាធរ​ប្រមាណ ៥ភាគរយ។

ក្នុងរយៈពេលប៉ុន្មានខែកន្លងមកនេះ រដ្ឋាភិបាលចិន បានប្រកាសពីវិធានការជំរុញសារពើពន្ធ និងរូបិយវត្ថុជាបន្តបន្ទាប់ ដើម្បីជំរុញការប្រើប្រាស់ គាំទ្រអាជីវកម្មដែលរងផលប៉ះពាល់ដោយពន្ធនាំចូល និងការពារការងារ។ បើតាមលោក Xiangrong Yu ប្រធានសេដ្ឋវិទូចិនរបស់ Citi បានថ្លែងនៅក្នុងរបាយការណ៍នាថ្ងៃទី១៥ ខែឧសភា ជាមួយនឹងភាពតានតឹងពាណិជ្ជកម្មបានធូរស្រាល និងសេដ្ឋកិច្ចក្នុងស្រុកនៅតែមានភាពធន់ លោកយល់ថា ចិនប្រហែលជាមិនចាំបាច់បញ្ចេញការជំរុញបន្ថែមទៀតទេ៕