.png)
.png)
.jpg)
.jpg)
លោក អ៊ាង សុផល្លែត ឱ្យមន្ទីរស្រង់ឈ្មោះអ្នកដែលកាន់កាប់ដីក្នុងតំបន់ការពារធម្មជាតិ ទៅតុលាការ
- ថ្ងៃអង្គារ ទី២០ ខែឧសភា ឆ្នាំ២០២៥ ម៉ោង ៨:៥៩ នាទី យប់
រូបថត៖ ក្រសួងបរិស្ថាន
ភ្នំពេញ៖ លោក អ៊ាង សុផល្លែត បញ្ជាឱ្យមន្ទីរបរិស្ថានទាំង ២៥រាជធានី-ខេត្ត ស្រង់ចំនួនផ្ទៃដីដែលពលរដ្ឋកាន់កាប់ នៅក្នុង «តំបន់ការពារធម្មជាតិ» បញ្ជូនទៅតុលាការ ដើម្បីចាត់វិធានការតាមផ្លូវច្បាប់។ ការបញ្ជារបស់រដ្ឋមន្រ្តីនៅពេលនេះ ធ្វើឡើងបន្ទាប់ពី ក្រសួងរកឃើញមានករណីឈូសឆាយទន្រ្ទានដីព្រៃដោយខុសច្បាប់ជាច្រើនកន្លែង តែចាប់ជនល្មើសមិនដែលបាន។
លោក អ៊ាង សុផល្លែត នៅថ្ងៃទី២០ ខែឧសភា បានលើកឡើងថា កន្លងទៅ ក្រសួងបរិស្ថាន បានរកឃើញករណីឈូសឆាយទន្រ្ទានដីព្រៃ នៅក្នុងតំបន់ការពារធម្មជាតិជាច្រើនកន្លែង និងបានដាក់ពាក្យបណ្ដឹងទៅតុលាការ ប៉ុន្តែមិនអាចចាប់បានជនល្មើសឡើយ ព្រោះគ្មានអត្តសញ្ញាណនៃអ្នកប្រព្រឹត្ត។ ផ្ទុយទៅវិញ នៅពេលរំលងបាន ១ឬ២ឆ្នាំ ដីដែលឈូសឆាយនោះ បែរជាមានអ្នកប្រើប្រាស់ និងអះអាងថា គេជាម្ចាស់ដី។ ផ្អែកតាមទិដ្ឋភាព នេះ រដ្ឋមន្រ្តី ចាត់ទុក អ្នកដែលកាន់កាប់ដីក្នុងតំបន់ការពារទាំងអស់ គឺជាអ្នកឈូសឆាយ និងជាជនល្មើស។
លោក អ៊ាង សុផល្លែត សង្កត់ធ្ងន់យ៉ាងថា៖«ចោរលួចទូរសព្ទ លួចគ្រឿអលង្ការ អាចលាក់បាន ប៉ុន្តែចោរលួចដី គឺមិនអាចលាក់បានទេ។ អ៊ីចឹង! អ្នកដែលកាប់កាប់ដីខុសច្បាប់ ដីដែលឈូសឆាយ (ក្នុង) តំបន់ការពាររបស់យើង អ្នកនោះឯង គឺជាអ្នកឈូសឆាយ អ្នកនោះឯងគឺជាជនល្មើស។»។
ចំពោះមុខ លោក អ៊ាង សុផល្លែត បញ្ជាឱ្យមន្ទីរបរិស្ថានទាំង ២៥រាជធានី-ខេត្ត ស្រង់ចំនួនផ្ទៃដីដែលពលរដ្ឋកាន់កាប់នៅក្នុងតំបន់ការពារធម្មជាតិ បញ្ជូនទៅតុលាការ ដើម្បីចាត់វិធានការតាមផ្លូវច្បាប់។
លោក អ៊ាង សុផល្លែត បន្ថែមយ៉ាងដូច្នេះថា៖«ចាប់ពីពេលនេះតទៅ មន្ទីរទាំង ២៥ខេត្ត-ក្រុង ត្រូវស្រង់ដីដែលពលរដ្ឋប្រើប្រាស់ខុសច្បាប់ទាំងអស់ ដាក់ចូលទៅតុលាការ និងរាយការណ៍មកខ្ញុំ ដើម្បីចាត់វិធានការផ្លូវច្បាប់។ គ្មានអ្នកណាធំជាងច្បាប់នោះទេ ដូច្នេះបើយើងរួមគ្នាគោរពច្បាប់។ យើងអាចការពារធនធានធម្មជាតិបាន តែបើមិនគោរពច្បាប់ទេ គឺមិនអាចទេ។»៕
© រក្សាសិទ្ធិដោយ thmeythmey.com
Tag:
.gif)