.png)
.png)
.jpg)
.jpg)
ដំណើរស្វែងរកជើងឯក Serie A រវាង Napoli និង Inter Milan ត្រូវកាត់ក្តីនៅជំនួបបិទរដូវកាល
- ថ្ងៃអង្គារ ទី២០ ខែឧសភា ឆ្នាំ២០២៥ ម៉ោង ៩:២៩ នាទី យប់
ក្លិប SSC Napoli និង Inter Milan នឹងត្រូវកាត់ក្តី នៅជំនួបបិទរដូវកាល នៅថ្ងៃទី២៣ ខែឧសភា ដើម្បីរកបានក្រុមក្លាយជាម្ចាស់ជើងឯកក្របខណ្ឌអ៊ីតាលី Serie A។ ទាំង Napoli និង Inter Milan សុទ្ធសឹងតែគ្មានវត្តមានអ្នកចាត់ការរៀងខ្លួននៅជំនួបសំខាន់ចុងក្រោយ ដោយសារជាប់បម្រាមដូចគ្នា។
បើតាមក្រុមប្រឹក្សាលីគ Serie A បានសម្រេចចិត្តថា ការប្រកួតរវាងក្រុម SSC Napoli ក្រៅទឹកដីទល់នឹង ក្រុម Cagliari និងជំនួបរវាង Inter Milan ទល់នឹង Como នឹងត្រូវចាប់ផ្តើមការប្រកួតនៅវេលាម៉ោង ១ និង៤៥នាទីអាធ្រាត្រ (ម៉ោងនៅកម្ពុជា) ដូចគ្នា។
Napoli បច្ចុប្បន្នជាក្រុមឈរកំពូលតារាង មាន ៧៩ពិន្ទុ នាំមុខគូប្រជែង Inter Milan ចំនួន១ពិន្ទុ ប៉ុណ្ណោះ ពីការប្រកួត៣៧លើករៀងខ្លួន។ ការប្រជែងតំណែងជើងឯកលីគកំពូលអ៊ីតាលី នៅតែពីរ ក្រុមនេះប៉ុណ្ណោះ ដែលនឹងត្រូវកាត់ក្តីនៅជំនួបសប្តាហ៍ចុងក្រោយ។
ជំនួបចុងក្រោយរបស់ Serie A ដើម្បីកាត់សេចក្តីរវាង Inter Milan និង Napoli នឹងក្លាយជាការប្រកួតដ៏ជក់ចិត្តអារម្មណ៍មួយ ស្របពេលក្រុមទាំងសងខាងនឹងមានសម្ពាធពីការប្រជែងរៀងៗខ្លួន ព្រោះគ្មានវត្តមានរបស់អ្នកចាត់ការក្រុមដូចគ្នា។ ទាំងលោក Antonio Conte អ្នកចាត់ Napoli និងលោក Simone Inzaghi អ្នកចាត់ការ Inter Milan ជាប់បម្រាមកាតក្រហម ជាហេតុមិនអាចចូលទីលានដឹកនាំក្រុមផ្ទាល់បាន។
លោក Inzaghi ទទួលបានកាតក្រហម នៅជំនួបពេល Inter Milan ស្មើ ២-២ ទល់នឹង Lazio ហើយអំឡុងការប្រកួតនោះក្រុម Inter Milan ហៀបយកឈ្នះ ប៉ុន្តែប្រព័ន្ធជំនួយការអាជ្ញាកណ្តាល (VAR) បានផ្តល់ការពិន័យ ១១ម៉ែត្រ ជាហេតុធ្វើឱ្យក្រុម Lazio តាមស្មើ។ អ្នកចាត់ការវ័យ ៥១ឆ្នាំ បានទៅឈ្លោះប្រកែកជាមួយនឹងគ្រូបង្វឹក Lazio រហូតបង្កកម្តៅជម្លោះខ្លាំងនៅតំបន់គ្រូបង្វឹក ដែលប៉ះពាល់ដល់ការប្រកួត រហូតអាជ្ញាកណ្តាលផ្តល់កាតក្រហមបណ្តេញចេញពីទីលាន។
ចំណែកលោក Conte អតីតអ្នកចាត់ការក្រុម Tottenham Hotspur និង Chelsea ក្នុងជំនួបដែល Napoli ស្មើ Parma ០-០ បានទៅបង្កជម្លោះជាមួយនឹងគ្រូបង្វឹករបស់ Parma លោក Cristian Chivu រហូតត្រូវអាជ្ញាកណ្តាលផ្តល់កាតក្រហមបណ្តេញចេញពីការប្រកួតដូចគ្នា។
ការបន្តប្រជែងពានរហូតដល់សប្តាហ៍បង្ហើយ នឹងអាចក្លាយជារឿងមួយប៉ះពាល់ដល់ការត្រៀមខ្លួនរបស់ Inter Milan សម្រាប់ការប្រកួតវគ្គផ្តាច់ព្រ័ត្រ UEFA Champions League តទល់នឹងក្រុម Paris Saint Germain នៅទីក្រុង Munich ប្រទេសអាល្លឺម៉ង់។ លើសពីនេះទៀត ប្រសិនបើ Inter Milan និង Napoli ត្រូវទៅប្រកួតវគ្គ Playoffs (ការប្រកួតថ្ងៃទី២៦ ឧសភា) ពិតមែន នោះនឹងកាន់តែបង្កផលប៉ះពាល់ខ្លាំងដល់ក្រុមស្ថិតក្រោមការដឹកនាំដោយលោក Inzaghi មុនជំនួប UCL ចូលមកដល់៕
© រក្សាសិទ្ធិដោយ thmeythmey.com
Tag:
.gif)