.png)
.png)
.jpg)
.jpg)
អាជ្ញាធរគ្រោងបើកជាន់ទី៣ប្រាសាទបាយ័នមួយជ្រុងឱ្យទេសចរចូលទស្សនាឡើងវិញ
- ថ្ងៃចន្ទ ទី២៦ ខែឧសភា ឆ្នាំ២០២៥ ម៉ោង ៨:០០ នាទី ព្រឹក
ជាន់ទី៣ប្រាសាទបាយ័នដែលនឹងបើកឱ្យទេសចរឡើងទស្សនាឡើងវិញ
សៀមរាប៖ អាជ្ញាធរជាតិអប្សរាគ្រោងរៀបចំ បើកឱ្យដំណើរការឡើងវិញ នូវផ្នែកខ្លះនៃ ជាន់ ទី៣ ប្រាសាទបាយ័ន បន្ទាប់ពីបញ្ចប់ការងារជួសជុលជាស្ថាពរ។ ការបើកដំណើរការនេះ គឺដើម្បីឱ្យទេសចរបានចូលទស្សនាគ្រប់ជ្រុងជ្រោយ ពិសេសបានចូលថតជិតព្រហ្មមុខបួនដែលជានិមិត្តរូបនៃប្រាសាទបាយ័ន។
ប្រធាននាយកដ្ឋានអភិវឌ្ឍន៍ទេសចរណ៍អង្គរ និងវប្បធម៌ លោក សេង សុធារ៉ា បានឱ្យដឹងនៅថ្ងៃទី២៣ ខែឧសភាថា អាជ្ញាធរជាតិអប្សរាកំពុងរៀបចំបើកឱ្យទេសចរចូលទស្សនាឡើងវិញនូវជាន់ទី៣ប្រាសាទបាយ័ន ដែលជាទីកន្លែងដ៏ទាក់ទាញសម្រាប់ទេសចរ។ លោកបញ្ជាក់ថា អាជ្ញាធរនឹងជូនដំណឹងចំពោះពេលវេលាជាក់លាក់នៃការបើកនេះ ដែលអាចដំណើរការនៅអំឡុងខែ មិថុនាខាងមុខ។
យ៉ាងណា តាមការបញ្ជាក់ពីមន្រ្តីអាជ្ញាធរជាតិអប្សរា ការបើកឱ្យចូលទស្សនាឡើងវិញនេះ គឺនៅជ្រុងនិរតី (ខាងលិចឈៀងខាងត្បូង) តែប៉ុណ្ណោះ ខណៈដែលជ្រុងផ្សេងទៀត ក្រុមការងារផ្នែកអភិរក្សកំពុងបន្តការងារជួសជុលនៅឡើយ។ ហើយការបើកនេះដែរ ក៏មានកំណត់ចំនួនភ្ញៀវទេសចរឡើងចុះនិងពេលវេលាផងដែរ។ លោក សុធារ៉ា បញ្ជាក់ថា ក្រោយការសិក្សាពីក្រុមការងាររបស់លោក ទីតាំងដែលបើកឱ្យឡើងទស្សនាឡើងវិញនេះ អាចផ្ទុកអ្នកទស្សនាបានខ្ទង់៣០នាក់ និងរយៈពេល១០នាទី។ មន្រ្តីរូបនេះសំណូមពរឱ្យទេសចរមានការយោគយល់ និងចែករំលែកពេលវេលា ឱ្យទេសចរដទៃទៀតបានចូលទស្សនាផង។
លោក សេង សុធារ៉ា
ការសម្រេចបើកឡើងវិញនេះដែរ ធ្វើឡើងទៅតាមការស្នើសុំរបស់ក្រុមហ៊ុន ទីភ្នាក់ងារទេសចរណ៍ រួមនិងមគ្គុទ្ទេសក៍ទេសចរណ៍ ដែលបានសំណូមពរមកអាជ្ញាធរជាតិអប្សរា ឱ្យពិចារណាបើកជាន់ទី៣នេះវិញ។ លោក សេង សុធារ៉ា រៀបរាប់ថា៖«យើងចង់ឱ្យទេសចរពេលមកទស្សនាប្រាសាទបាយ័នបានឡើងកំពូលដែលជាគុណតម្លៃនៅទីនេះ…ទោះបីបើកបានតែមួយជ្រុង ក៏ជារឿងដែលល្អប្រសើរសម្រាប់ទាក់ទាញទេសចរ និងបង្ហាញពីការងារជួសជុល និងអភិរក្សជាន់នេះផងដែរ»។
ដើម្បីធានាពីសុវត្ថិភាពភ្ញៀវទេសចរ ក្នុងនោះអាជ្ញាធរជាតិអប្សរានឹងរៀបចំដាក់ស្លាកសញ្ញា បង្ហាញពីទីតាំងចូលទស្សនា និងហាមភ្ញៀវមិនឱ្យចូល ឬប្រុងប្រយ័ត្ននៅកន្លែងដែលជាការដ្ឋានជួសជុល។ ភ្ញៀវទេសចរអាចឡើងទៅទស្សនាជ្រុងនីរតីនៃជាន់ទី៣ តាមច្រកខាងកើត និងឡើងជណ្ដើរជ្រុងខាងលិច ហើយចុះមកវិញនៅជណ្ដើរជ្រុងខាងត្បូង ដើម្បីបន្តការទស្សនានៅជាន់ទី២ តាមវង់ទស្សនាដែលរៀបចំដោយមន្រ្តីអាជ្ញាធរជាតិអប្សរា។
ប្រធាននាយកដ្ឋានអភិវឌ្ឍន៍ទេសចរណ៍អង្គរ និងវប្បធម៌ ក៏សំណូមពរដល់ទេសចរគ្រប់រូប ចូលរួមថែរក្សាសណ្ដាប់ឱ្យបានល្អ និងមិនត្រូវប៉ះពាល់ចម្លាក់ ឬអង្គុយលើបង្កាន់ដៃនាគ ដើម្បីរក្សានិរន្តរភាពទីតាំងនេះឱ្យបានគង់វង្សយូរអង្វែង។
សូមបញ្ជាក់ថា ជាន់ទី៣ប្រាសាទបាយ័នត្រូវបានបិទបណ្ដោះអាសន្ននៅខែមករា ឆ្នាំ២០២០ បន្ទាប់ពីទីតាំងនេះត្រូវបានរកឃើញថាមានហានិភ័យ និងទ្រុឌទ្រោមខ្លាំង។ ចាប់ពីពេលនោះមក អ្នកជំនាញផ្នែកអភិរក្សបានសិក្សា និងរៀបចំគម្រោងជួសជុលជាបន្តបន្ទាប់៕
© រក្សាសិទ្ធិដោយ thmeythmey.com
Tag:
