.png)
.png)
.jpg)
.jpg)
អនុរដ្ឋមន្ត្រីការពារប្រទេសវៀតណាម នឹងធ្វើទស្សនកិច្ចនៅកម្ពុជា ពីថ្ងៃទី៣-៦ ខែមិថុនា
- ថ្ងៃចន្ទ ទី២ ខែមិថុនា ឆ្នាំ២០២៥ ម៉ោង ១១:៤៩ នាទី ព្រឹក
លោក ង្វៀន តឹនគឿង អនុរដ្ឋមន្ត្រីក្រសួងការពារប្រទេស និងជាប្រធានអគ្គសេនាធិការកងទ័ពប្រជាជនវៀតណាម(ឆ្វេង) និងលោក វង្ស ពិសេន អគ្គមេបញ្ជាការនៃកងយោធពលខេមរភូមិន្ទ(ស្តាំ)
លោក ង្វៀន តឹនគឿង អនុរដ្ឋមន្ត្រីក្រសួងការពារប្រទេស និងជាប្រធានអគ្គសេនាធិការកងទ័ពប្រជាជនវៀតណាម នឹងមកបំពេញទស្សនកិច្ចផ្លូវការនៅកម្ពុជា ចាប់ពីថ្ងៃទី៣ ដល់ទី៦ ខែមិថុនា ឆ្នាំ២០២៥។ ទស្សនកិច្ចរបស់អនុរដ្ឋមន្ត្រីការពារប្រទេសវៀតណាម នៅពេលនេះ គឺតបតាមការអញ្ជើញរបស់ លោក វង្ស ពិសេន អគ្គមេបញ្ជាការនៃកងយោធពលខេមរភូមិន្ទ។ នេះបើយោងតាមសេចក្តីប្រកាសព័ត៌មាន របស់អ្នកនាំពាក្យអគ្គបញ្ជាការដ្ឋាន ចុះថ្ងៃទី៣០ ខែឧសភា។
បើតាមសេចក្តីប្រកាសព័ត៌មានដដែល ក្នុងដំណើរទស្សនកិច្ចនេះ លោក ង្វៀន តឹនគឿង នឹងចូលជួបសម្តែងការគួរសមដាច់ដោយឡែក ជាមួយ សម្តេច ហ៊ុន សែន ប្រធាន ព្រឹទ្ធសភា, សម្តេចហ៊ុន ម៉ាណែត នាយករដ្ឋមន្ត្រី និងលោក ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ។
លោក ង្វៀន តឹនគឿង ក៏នឹងមានជំនួបពិភាក្សាទ្វេភាគី ជាមួយ លោក នាយឧត្តមសេនីយ៍ វង្ស ពិសេន អត្គមេបញ្ជាការនៃកងយោធពលខេមរភូមិន្ទ នៅអគ្គបញ្ជាការដ្ឋាន ដោយក្នុង កិច្ចពិភាក្សានោះផ្តោតសំខាន់លើការពង្រឹង និងពង្រីកចំណងសាមគ្គីភាព មិត្តភាព កិច្ចសហប្រតិបត្តិការពោរកងទ័ព នៃប្រទេសទាំងពីរ។
ក្នុងអំឡុងពេលស្នាក់នៅកម្ពុជា អនុរដ្ឋមន្ត្រីក្រសួងការពារប្រទេសវៀតណាម ក៏នឹងទៅដាក់កម្រងផ្កាគោរពវិញ្ញាណក្ខន្ធនៅស្នួបមិត្តភាពកម្ពុជា-វៀតណាម ទស្សនកិច្ចសាលាហ្វឹហ្វឺនយោធភូមិភាគទី៤ និងទស្សនាប្រាង្គប្រាសាទមួយចំនួនក្នុងខេត្តសៀមរាប៕
© រក្សាសិទ្ធិដោយ thmeythmey.com
