.png)
.png)
.jpg)
.jpg)
គណៈកម្មការទី១ ព្រឹទ្ធសភា ស្នើឱ្យផ្ដល់ប័ណ្ណ ប.ស.ស. ដល់ចាស់ជរាអាយុលើស៦០ឆ្នាំ
- ថ្ងៃចន្ទ ទី២ ខែមិថុនា ឆ្នាំ២០២៥ ម៉ោង ៣:០៩ នាទី រសៀល
លោក ងី ច័ន្ទ្រផល ជាប្រធានគណៈកម្មការទី១ព្រឹទ្ធសភា ក្នុងសមាជរដ្ឋសភា និងព្រឹទ្ធសភា នាថ្ងៃទី២មិថុនា ឆ្នាំ២០២៥។
ភ្នំពេញ៖ នៅក្នុងសមាជលើកទី១ រដ្ឋសភា និងព្រឹទ្ធសភា នៅថ្ងៃទី២មិថុនា ប្រធានគណៈកម្មការទី១ ព្រឹទ្ធសភា លោក ងី ច័ន្ទ្រផល បានកត់សម្គាល់ឃើញថា វិស័យគាំពារសង្គម បាននៅមិនទាន់គ្របដណ្ដប់ ដល់ជនចាស់ជរា ដែលមានវ័យ៦០ឆ្នាំឡើងនៅឡើយ។ ក្នុងន័យនេះ លោក ងី ច័ន្ទ្រផល បានស្នើឱ្យរាជរដ្ឋាភិបាល ពិចារណាការផ្តល់ប័ណ្ណសមធម៌សង្គម (ប.ស.ស.) ទៅពលរដ្ឋចាសជរាទាំងនោះផង។
លោក ងី ច័ន្ទ្រផល បានអំពាវនាវយ៉ាងដូច្នេះ៖ «សូមមេត្ដារដ្ឋាភិបាល ពិចារណាពាក់ព័ន្ធនឹងការចំណាយថវិកាដែរ ប៉ុន្តែវាឱកាសជូនដល់ប្រជាពលរដ្ឋយើង ដែលមានអាយុលើសពី៦០ឆ្នាំ អាចមានឱកាសទទួលបាន ប.ស.ស ផងដែរ»។
ដ្បិតមានចំណុចខ្វះខាត ប៉ុន្តែនៅក្នុងអង្គសមាជរដ្ឋសភា និងព្រឹទ្ធសភា ដែលមានអង្គចូលរួម២៩២រូប ប្រធានគណៈកម្មការទី១ព្រឹទ្ធសភា ក៏បានលើកឡើងពីភាពល្អប្រសើរ របស់រដ្ឋាភិបាល ក្នុងការផ្តល់កិច្ចគាំពារដល់ពលរដ្ឋជាមនុស្ស ចាស់ជរាក្រីក្រ តាមរយៈការផ្តល់នូវប័ណ្ណសមធម៌ ឬផ្នែកថែទាំសុខភាពនេះ។
គិតត្រឹមខែមេសា ឆ្នាំ២០២៥ កម្មវិធីជាតិជំនួយសង្គម បានក្របដណ្តប់លើពលរដ្ឋសរុបប្រមាណ ១,២លានគ្រួសារ មានប្រមាណ ៤,៨៤លាននាក់ ស្មើនឹង ២៨ភាគរយ នៃចំនួនពលរដ្ឋសរុប។ ក្នុងឆ្នាំ២០២៥នេះ រាជរដ្ឋាភិបាលបានវិភាជថវិកាប្រមាណ ២៥៧លានដុល្លារអាម៉េរិក សម្រាប់អនុវត្តកម្មវិធីចំនួន៩។
គិតត្រឹមខែមេសា ឆ្នាំ២០២៥ របបសន្តិសុខសង្គម (ប.ស.ស) បានគ្របដណ្តប់លើពលរដ្ឋប្រមាណ ៣,១លាននាក់ ទាំងក្នុងវិស័យសាធារណៈ និងវិស័យឯកជន។ ក្នុងឆ្នាំ២០២៥នេះ រដ្ឋាភិបាលបានវិភាជថវិកាប្រមាណ៤២៥លានដុល្លារបន្ថែម លើថវិកាវិភាគទានដែលប្រមូលបានពីសមាជិក ប.ស.ស សម្រាប់អនុវត្តរបបសន្តិសុខសង្គមចំនួន ៣សំខាន់ៗ។
សូមជម្រាប់ថា សមាជរដ្ឋសភា និងព្រឹទ្ធសភា លើកទី១ នឹងត្រូវប្រព្រឹត្តទៅពីថ្ងៃទី ២ -៣ មិថុនា ដោយអង្គសមាជ នឹងជជែក ពិភាក្សា ពីប្រធានបទចំនួន ៣ ពាក់ព័ន្ធនឹងប្រព័ន្ធគាំពារសង្គម វិស័យសេដ្ឋកិច្ចក្រៅប្រព័ន្ធ និងវិស័យកសិកម្ម។ សមាជរដ្ឋសភា និងព្រឹទ្ធសភា បានដំណើរការ ក្រោមការដឹកនាំរបស់ប្រធានសមាជ គឺសម្ដេច ហ៊ុន សែន ដែលជាប្រធានព្រឹទ្ធសភាកម្ពុជាផង។ អង្គចូលរួមទាំងអស់នៅថ្ងៃទី២មិថុនា មានចំនួន ២៩២រូប ក្នុងនោះមានសមាជិកព្រឹទ្ធសភាមាន៦១រូប សមាជិករដ្ឋសភា១១៨រូប សមាជិកគណៈរដ្ឋមន្ត្រី៨៤រូប និងសមាជិកឧត្តមក្រុមប្រឹក្សាពិគ្រោះ និងផ្ដល់យោបល់២៩រូប៕
© រក្សាសិទ្ធិដោយ thmeythmey.com
Tag:
