.png)
.png)
.jpg)
.jpg)
២ប្រកួត នារីភ្នំពេញក្រោន រកបានគ្រាប់បាល់សរុប ៣០គ្រាប់
- ថ្ងៃចន្ទ ទី៩ ខែមិថុនា ឆ្នាំ២០២៥ ម៉ោង ៣:៣៩ នាទី រសៀល
ក្រុមភ្នំពេញក្រោន រូបពី Cambodian Women's League
គិតត្រឹមសប្ដាហ៍ទី២ នៃការប្រកួតពានរង្វាន់លីគនារីកម្ពុជា ឆ្នាំ២០២៥ ភ្នំពេញក្រោន ឈរ នៅលេខ១ បណ្ដោះអាសន្ន ដែលមានពិន្ទុ៦គ្រាប់ ស្មើគ្នាជាមួយ វិសាខា ដែលនៅចំណាត់ ថ្នាក់លេខ២។ ក្នុងសប្ដាហ៍ទី២នេះ ក្រុមនារីភ្នំពេញក្រោន លុតក្រុមសមាគមបាល់ទាត់ខេត្តកណ្ដាល លទ្ធផល ២៧-០ កាលពីថ្ងៃទី៧ មិថុនា ឆ្នាំ២០២៥ នៅកីឡដ្ឋាន Smart RSN។
នារីភ្នំពេញក្រោន ឈ្នះ ២ប្រកួតជាប់គ្នា។ ត្រឹមតែ២ប្រកួត ភ្នំពេញក្រោន រកបាន ៣០គ្រាប់ ខណៈសំណាញ់ទីក្រុមនេះ មិនទាន់មានគូប្រកួតទាត់បញ្ចូលឡើយ។ កាលពីថ្ងៃទី៧ មិថុនា ក្រុមនេះ បានយកឈ្នះ សមាគមបាល់ទាត់ខេត្តកណ្ដាល លទ្ធផល ២៧-០ នៅកីឡដ្ឋាន Smart RSN។
ដោយឡែក ការប្រកួតបើករដូវកាល នាសប្ដាហ៍ទី១ កាលពីថ្ងៃទី៣១ ខែឧសភា ក្រុមនេះ បានយកឈ្នះ ក្រុមនារីព្រះខ័នរាជស្វាយរៀង លទ្ធផល៣-០ នៅកីឡដ្ឋានខេត្តស្វាយរៀង។
នៅសប្ដាហ៍ទី២ នាថ្ងៃទី៧មិថុនា វិសាខា បានយកឈ្នះ សមាគមបាល់ទាត់មីស្ទើរលេង នៅមជ្ឈមណ្ឌលហ្វឹកហាត់វិសាខា។
កីឡាការិនីភ្នំពេញក្រោន ពាក់អាវក្រហម ប្រជែងបាល់ជាមួយសមាគមបាល់ទាត់ខេត្តកណ្ដាល
លុះចូលដល់ថ្ងៃទី៨ មិថុនា ណាហ្គាវើលដ៍ យកឈ្នះក្លិបបាល់ទាត់សៀមរាប លទ្ធផល៤-០ នៅកីឡដ្ឋានណាហ្គាវើលដ៍ ខណៈព្រះខ័នរាជស្វាយរៀង បានត្រឹមស្មើបឹងកេត លទ្ធផល ២-២ នៅកីឡដ្ឋានខេត្តស្វាយរៀង។
គិតត្រឹមសប្ដាហ៍ទី២នេះ ភ្នំពេញក្រោន ឈរនៅចំណាត់ថ្នាក់លេខ១ បណ្ដោះអាសន្ន មាន៦ពិន្ទុ ស្មើជាមួយវិសាខា នៅចំណាត់ថ្នាក់លេខ២។ រីឯចំណាត់ថ្នាក់លេខ៣ សមាគមបាល់ទាត់មីស្ទើរលេង មាន៣ពិន្ទុ តាមពីក្រោយដោយណាហ្គាវើលដ៍ មានពិន្ទុស្មើគ្នា នៅចំណាត់ថ្នាក់លេខ៤។
ចំណែកបឹងកេត ក្រុមនេះ មាន២ពិន្ទុ នៅចំណាត់ថ្នាក់លេខ៥។ ព្រះខ័នរាជស្វាយរៀង នៅចំណាត់ថ្នាក់លេខ៦ និងក្លិបបាល់ទាត់សៀមរាប ចំណាត់ថ្នាក់លេខ៧ មាន១ពិន្ទុ ស្មើគ្នា។ សមាគមបាល់ទាត់ខេត្តកណ្ដាល នៅបាតតារាង ចំណាត់ថ្នាក់លេខ៨ មិនមានពិន្ទុ៕
© រក្សាសិទ្ធិដោយ thmeythmey.com
Tag:
