ប៉ុន្មានខែថ្មីៗនេះ ទូរស័ព្ទ iPhone ស្ទើរតែទាំងអស់ ដែលបានដំឡើងនៅឥណ្ឌា ត្រូវបាននាំចេញទៅអាម៉េរិក។ ការយកពន្ធលើឥណ្ឌា មានត្រឹមតែ ១ភាគ៣ របស់ចិនតែប៉ុណ្ណោះ។

ទិន្នន័យគយអាម៉េរិកបង្ហាញថា ចាប់ពីខែមីនា ដល់ខែឧសភា ប្រហែល ៩៧ភាគរយនៃទូរស័ព្ទ iPhone ដែលដំឡើងដោយក្រុមហ៊ុន Foxconn នៅឥណ្ឌាត្រូវបាននាំចេញទៅអាម៉េរិក។ នេះគឺអត្រាខ្ពស់ជាងមធ្យមភាគ ៥០ភាគរយ កាលពីឆ្នាំមុន។ នេះ​ជា​សញ្ញា​បង្ហាញ​ថា Apple កំពុង​ព្យាយាម​គេច​ពី​ពន្ធ​នាំ​ចូល​ខ្ពស់​ ដែល​អាម៉េរិក​ដាក់​លើ​ទំនិញ​ចិន។

ឥណ្ឌា​ ក៏ដូចជា​ដៃគូ​ពាណិជ្ជកម្ម​ជាច្រើនទៀតរបស់អាម៉េរិក បច្ចុប្បន្ន​ប្រឈមអត្រាពន្ធបដិការ ១០ភាគរយ(លើកលែងតែចិន) លើ​ការនាំចេញ​ទៅកាន់​អាម៉េរិក។ ឥណ្ឌាកំពុងចរចាដើម្បីចៀសវាង ការដំឡើងដល់ ២៦ភាគរយ បន្ទាប់ពីការពន្យាពេលពន្ធរយៈពេល ៩០ថ្ងៃ ដែលបញ្ចប់នៅដើមខែក្រោយ។

ទន្ទឹមនេះ ចិន​កំពុង​ជាប់​ពន្ធ ៣០ភាគរយលើ​ផលិតផល​ទាំងអស់ ​ដែល​លក់​ឱ្យ​អាម៉េរិក។ រួម​បញ្ចូល​ជាមួយ​ពន្ធ​ដែល​ដាក់​ដោយ​អាណត្តិ​មុន ​របស់​ប្រធានាធិបតី ដូណាល់ ត្រាំ ពន្ធ​ខ្លះ​ត្រូវ​បាន​គេ​យក​ខ្ពស់​រហូត​ដល់ ៥៥ភាគរយ។ ជាមធ្យម Apple លក់ iPhone បានជាង ៦០ លានគ្រឿងនៅអាម៉េរិកក្នុងមួយឆ្នាំៗ ដែលក្នុងនោះប្រហែល ៨០ភាគរយត្រូវបានផលិតនៅចិន។

តម្លៃសរុបនៃទូរស័ព្ទ iPhone ដែល Foxconn បាននាំចេញពីឥណ្ឌាទៅកាន់អាម៉េរិក អំឡុងពេលពីខែមីនា ដល់ខែឧសភា មានចំនួន ៣,២ពាន់លានដុល្លារ។ សម្រាប់មួយខែឧសភា តួលេខនេះមានតម្លៃជិត ១ ពាន់លានដុល្លារ ដែលជាចំនួនខ្ពស់បំផុតទីពីរមិនធ្លាប់មាន បន្ទាប់ពីកំណត់ត្រា ១,៣ពាន់លានដុល្លារដែលបានកត់ត្រានៅក្នុងខែមីនា។

កាលពីខែមីនា ក្រុមហ៊ុននេះបានជួលយន្តហោះដើម្បីដឹកជញ្ជូន iPhone 13, 14, 16 និង 16e ដែលមានតម្លៃប្រហែល ២ ពាន់លានដុល្លារទៅកាន់អាម៉េរិក។

Apple អាច​នឹង​តម្រង់​ទិស​ការ​នាំ​ចេញ​របស់​ខ្លួន​ពី​​ឥណ្ឌា​ឡើង​វិញ ដើម្បី​បម្រើ​ទីផ្សារ​​អាម៉េរិក​ស្ទើរតែ​ទាំងស្រុង។ កន្លងមក iPhones ដែលផលិតនៅទីនោះ ត្រូវបានដឹកជញ្ជូនទៅកាន់ប្រទេសមួយចំនួនដូចជា ហូឡង់ សាធារណរដ្ឋឆែក និងអង់គ្លេស។

ក្រុមហ៊ុន Apple ក៏បានបញ្ចុះបញ្ចូលអាជ្ញាធរអាកាសយានដ្ឋានក្នុងទីក្រុង Chennai ដែលជាមជ្ឈមណ្ឌលនាំចេញ iPhone ដ៏សំខាន់ ដើម្បីកាត់បន្ថយពេលវេលានៃការបោសសំអាតគយពី ៣០ម៉ោង មកត្រឹម ៦ ម៉ោង។ លោក Prachir Singh អ្នកវិភាគជាន់ខ្ពស់នៅក្រុមហ៊ុន Counterpoint Research បញ្ជាក់ថា ៖« យើងរំពឹងថា iPhones ផលិតនៅឥណ្ឌានឹងមានចំនួន ២៥-៣០ភាគរយនៃការនាំចេញទូទាំងពិភពលោកនៅឆ្នាំនេះ ពោលគឺកើនឡើងពី ១៨ភាគរយក្នុងឆ្នាំ ២០២៤»។

ក្នុងរយៈពេលប៉ុន្មានឆ្នាំចុងក្រោយនេះ នាយករដ្ឋមន្ត្រីឥណ្ឌា លោក ណារិន្ទ្រា ម៉ូឌី  បាននិងកំពុងជំរុញប្រទេសឱ្យក្លាយជាមជ្ឈមណ្ឌលផលិតស្មាតហ្វូន។ ទោះជាយ៉ាងណា ពន្ធនាំចូលខ្ពស់លើសមាសធាតុ ធៀបនឹងប្រទេសផ្សេងទៀតមានន័យថា តម្លៃនៃឧបករណ៍ផលិតនៅទីនេះនៅតែខ្ពស់ដដែល។

លើសពីនេះ ការជំរុញរបស់ Apple ក្នុងការបង្កើនផលិតកម្មនៅក្នុងប្រទេសឥណ្ឌា ត្រូវបានរិះគន់យ៉ាងចាស់ដៃពីលោក ត្រាំ កាលពីខែមុន។ លោក ត្រាំ បានប្រាប់នាយកប្រតិបត្តិ Tim Cook ថា ៖« យើងមិនចង់ឱ្យអ្នកផលិតនៅក្នុងប្រទេសឥណ្ឌាទេ។ ឥណ្ឌាអាចមើលថែខ្លួនឯងបាន ពួកគេកំពុងធ្វើបានយ៉ាងល្អ។ យើងចង់ឱ្យអ្នកផលិតនៅទីនេះ»៕