.png)
.png)
.jpg)
.jpg)
ក្រសួងមុខងារ ប្រកាសជ្រើសរើសមន្រ្តីកសិកម្មឃុំចំនួន៣៧២នាក់ទៀត
- ថ្ងៃអង្គារ ទី១៧ ខែមិថុនា ឆ្នាំ២០២៥ ម៉ោង ៨:៥៩ នាទី ព្រឹក
ភ្នំពេញ៖ ក្រសួងមុខងារសាធារណៈ នឹងរៀបចំការប្រឡងប្រជែងជ្រើសរើសមន្ត្រីកសិកម្មឃុំចំនួន៣៧២នាក់ ឱ្យចូលបម្រើការងារនៅតាមឃុំ-សង្កាត់ក្នុងក្របខណ្ឌក្រសួងកសិកម្ម រុក្ខាប្រមាញ់ និងនេសាទ។ ការប្រឡងនេះ ចាប់ផ្ដើមទទួលពាក្យចាប់ពីថ្ងៃទី១៦ ខែមិថុនា ដល់ថ្ងៃទី១៥ ខែកក្កដា។
តាមសេចក្ដីជូនដំណឹងរបស់ក្រសួងមុខងារសាធារណៈ លក្ខខណ្ឌក្នុងការជ្រើសរើសបេក្ខជនជាជនជាតិខ្មែរ ត្រូវមានវិញ្ញាបនបត្រ សញ្ញាបត្រពាក់ព័ន្ធនឹងកសិកម្ម និងមានអាយុចាប់ពី១៨ឆ្នាំឡើង។ ក្នុងការប្រឡងនេះបេក្ខជន ត្រូវជ្រើសរើសបុស្ដិ៍បម្រើការងារតាមឃុំសង្កាត់ តាមតារាងឧបសម្ព័ន្ធស្ដីពីការបែងចែកបុស្ដិ៍ជ្រើសរើសមន្រ្តីកសិកម្មឃុំ។ ចំពោះបេក្ខជនមានពិការភាព ស្រ្តី ជនជាតិដើមភាគតិច និងមន្រ្តីជាប់កិច្ចសន្យា ត្រូវបានទឹកលើកទឹកចិត្ត និងផ្ដល់អាទិភាព។
ក្នុងសេចក្ដីជូនដំណឹងដដែល វិញ្ញាសាប្រឡងនឹងត្រូវចែកជា៣ មានវិញ្ញាសាសរសេរលើជំនាញ/ឯកទេសពាក់ព័ន្ធនឹងកសិកម្ម មានរយៈពេល២ម៉ោង ស្មើនឹង១០០ពិន្ទុ។ វិញ្ញាសាទី២ គឺវិញ្ញាសាពហុចម្លើយភាសាអង់គ្លេស មានរយៈពេល១ម៉ោង ស្មើនឹង៥០ពិន្ទុ និងចុងក្រោយ គឺវិញ្ញាពហុចម្លើយចំណេះដឹងទូទៅ មានរយៈពេល១ម៉ោងដូចគ្នា ស្មើនឹង១០០ពិន្ទុ។ ចំពោះពេលវេលា និងទីតាំងប្រឡងក្រសួងនឹងជូនដំណឹងនៅពេលក្រោយ បន្ទាប់ពីបញ្ចប់ការដាក់ពាក្យរបស់បេក្ខជន។
ការប្រឡងប្រជែងជ្រើសរើសមន្រ្តីក្នុងសម័យកំណែទម្រង់ការជ្រើសរើសមន្រ្តីនេះ ក្រសួងមុខងារសាធារណៈ បន្តអនុវត្តដោយឈរលើគោលការណ៍គុណាធិបតេយ្យ តម្លាភាព យុត្តិធម៌ បរិយាបន្ន និងប្រសិទ្ធភាព។ ជាមួយគ្នានេះ ក្រសួងមុខងារសាធារណៈ មិនអនុញ្ញាតឱ្យបេក្ខជនយកឯកសារផ្សេងៗ ឧបករណ៍អេឡិចត្រូនិកគ្រប់ប្រភេទ ចូលក្នុងមណ្ឌលប្រឡងឡើយ៕
© រក្សាសិទ្ធិដោយ thmeythmey.com
Tag:
