.png)
.png)
.jpg)
.jpg)
តំណាងយូណេស្កូប្រចាំកម្ពុជា សរសើរអាជ្ញាធរជាតិអប្សរាលើការងារដើម្បីអង្គរ នារយៈពេល៣០ឆ្នាំមកនេះ
- ថ្ងៃសៅរ៍ ទី២១ ខែមិថុនា ឆ្នាំ២០២៥ ម៉ោង ១២:០០ នាទី រសៀល
លោក Sadar Umar Alam (កណ្ដាល) អំឡុងពេលធ្វើសន្និសីទកាសែតក្នុងកិច្ចប្រជុំអាយស៊ីស៊ី-អង្គរ និងសំបូរព្រៃគុកលើកទី៤០
សៀមរាប៖ តំណាងអង្គការយូណេស្កូប្រចាំកម្ពុជា បានកោតសរសើរចំពោះស្នាដៃការងាររបស់អាជ្ញាធរជាតិអប្សរាលើការងារអភិរក្ស និងការពាររមណីយដ្ឋានអង្គរនារយៈពេល៣០ឆ្នាំ បន្ទាប់ពីរមណីយដ្ឋានអង្គរត្រូវបានចុះបញ្ជីក្នុងសម្បត្តិបេតិកភណ្ឌពិភពលោកនៃអង្គការ យូណេស្កូ នាឆ្នាំ១៩៩២។
តំណាងអង្គការយូណេស្កូប្រចាំកម្ពុជា លោក សាដា អូម៉ា អាឡាម (Sardar Umar Alam) បានកោតសរសើរចំពោះការខិតខំប្រឹងប្រែងរបស់អាជ្ញាធរជាតិអប្សរា ក្នុងតួនាទីជាអ្នកគ្រប់គ្រង ការពារ និងអភិរក្សតំបន់ប្រវត្តិសាស្រ្តអង្គរ ចាប់ពីតំបន់នេះក្លាយជាបេតិកភណ្ឌពិភពលោក ពិសេសជួយរៀបចំតំបន់ឱ្យរួចផុតពីហានិភ័យ ក្លាយជាគោលដៅដ៏លេចធ្លោ និងល្បីល្បាញពេញពិភពលោក។
ការលើកឡើងរបស់លោក សាដា អូម៉ា អាឡាម ធ្វើឡើងនៅក្នុងកិច្ចប្រជុំបច្ចេកទេសលើកទី៤០ នៃគណៈកម្មាធិការអន្តរជាតិសម្របសម្រួលកិច្ចគាំពារ និងអភិរក្សតំបន់ប្រវត្តិសាស្រ្តអង្គរ សំបូរព្រៃគុក ហៅកាត់ថា អាយស៊ីស៊ី-អង្គរសំបូរព្រៃគុក នៅថ្ងៃទី១៩ មិថុនា នាសណ្ឋាគារ សូហ្វីតែល អង្គរភូគីត្រា។
តាមការគូសបញ្ជាក់ពីតំណាងយូណេស្កូ ក្នុងរយៈពេល៣០ឆ្នាំមកនេះ អាជ្ញាធរជាតិអប្សរាបានធ្វើការងារដ៏អស្ចារ្យជុំវិញកិច្ចការងារសង្គ្រោះ ការពារនិងអភិរក្សប្រាសាទបុរាណជាច្រើនក្នុងតំបន់អង្គរ។
ក្រៅពីការងារអភិរក្ស និងជួសជុល តំណាងយូណេស្កូ ក៏បានលើកពីការងារដ៏អស្ចារ្យមួយទៀតរបស់អាជ្ញាធរ គឺការបណ្ដុះបណ្ដាលធនធានអ្នកអភិរក្សខ្មែរ ដើម្បីជួយអភិរក្ស និងលើកស្ទួយវប្បធម៌ខ្លួនឯងនាពេលអនាគត។ លោក សាដា អូម៉ា អាឡាម លើកឡើងដូច្នេះថា៖« អាជ្ញាធរជាតិអប្សរាមិនត្រឹមតែធ្វើការងារដើម្បីការពារអង្គរប៉ុណ្ណោះទេ គឺថែមទាំងបានជួយបង្ហាត់បង្ហាញ និងលើកស្ទួយវប្បធម៌ដែលជាសម្បត្តិបេតិកភណ្ឌឱ្យកូនខ្មែរជំនាន់ក្រោយបានដឹងការជួសជុលប្រព័ន្ធធារាសាស្ត្រសម័យបុរាណឡើងវិញ ព្រមទាំងជួយលើកកម្ពស់ជីវភាពប្រជាពលរដ្ឋ ដែលរស់នៅតាមសហគមន៍នៃតំបន់អង្គរផងដែរ»។
បន្ថែមពីនេះ លោក Sardar Umar Alam បានបង្ហាញជំហរយ៉ាតមុតមាំថា អង្គការយូណេស្កូ បានប្ដេជ្ញាចិត្តគាំទ្រលើការងារអភិរក្សនិងការអភិវឌ្ឍប្រកបដោយនិរន្តរភាពនៅក្នុងតំបន់អង្គររបស់កម្ពុជានេះកាន់តែខ្លាំងក្លាបន្ថែម។ ក្នុងនោះដែរ នឹងបន្តធ្វើការងារជាមួយអាជ្ញាធរជាតិអប្សរា ក្នុងស្មារតីដើម្បីអភិរក្ស និងអភិវឌ្ឍរមណីយដ្ឋានអង្គរប្រកបដោយចីរភាព៕
© រក្សាសិទ្ធិដោយ thmeythmey.com
Tag:
