.png)
.jpg)
.jpg)
លោកយាយម្នាក់ទទួលបានសារជូនពរ ១,៦ម៉ឺនប័ណ្ណពីអ្នកមិនធ្លាប់ស្គាល់ក្នុងថ្ងៃខួបកំណើតគម្រប់ ១០០ឆ្នាំ
- ថ្ងៃអាទិត្យ ទី៣១ ខែឧសភា ឆ្នាំ២០១៥ ម៉ោង ១១:២០ នាទី យប់
លោកយាយ Winnie Blagdenរស់នៅតំបន់ Sheffield Town Hallក្នុងទីក្រុង Sheffield ប្រទេសអង់គ្លេសបានឈានចូលដល់វ័យ ១០០ឆ្នាំនៅថ្ងៃអាទិត្យនេះ។ ដោយសារតែសាច់ញាតិ និងក្រុមគ្រួសារស្លាប់អស់ ទើបគាត់គ្មានអ្នកជួយអបអរព្រឹត្តិការណ៍ដ៏សំខាន់នេះ។ តាមរយៈយុទ្ធនាការតាមបណ្ដាញសង្គម អ្នកយកព័ត៌មានរបស់ BBC ម្នាក់ លោកយាយទទួលបានសារជូនពរថ្ងៃខួបកំណើតជាង ១៦ ០០០ប័ណ្ណ ពីអ្នកលេងបណ្ដាញសង្គមមកពីទូទាំងពិភពលោក។
អ្នកកាសែត BBC ដែលជួយធ្វើយុទ្ធនាការនេះ គឺលោក Harbourneបានប្រាប់ Telegraph ថា ដោយសារតែលោកយាយ Winnie គ្មានគ្រួសារដូច្នេះគ្មានអ្នកណាជូនពរគាត់ក្នុងថ្ងៃខួបកំណើតនេះទេ។បន្ទាប់ពីគាត់បានដឹងរឿងនេះ គាត់ក៏សម្រេចចិត្តដើម្បីដាក់ចេញ យុទ្ធនាការទទួលកាតជូនពរសម្រាប់ លោកយាយWinnie នៅថ្ងៃខួបកំណើតរបស់គាត់។
បន្ទាប់ពីអ្នកកាសែតធ្វើយុទ្ធនាការតាមហ្វេសប៊ុកនេះរួចមក មានអ្នកឆ្លើយតបតាមរយៈកាតជូនពរជាង ១៦ ០០០កាដូនិងផ្កាជាង ២០០ផងដែរ ហើយសប្បុរសជនដែលបានចូលរួមជូនពរគាត់ច្រើនជាងគេ គឺមកពីប្រទេសសិង្ហបុរីសហរដ្ឋអាមេរិកនិងតៃវ៉ាន់។
អំឡុងពេលនៃការទទួលស្វាគមន៍នៅក្នុងថ្ងៃខួបកំណើតគម្រប់ ១០០ឆ្នាំរបស់គាត់លោកយាយ Winnieបាននិយាយថា កាដូ និងប័ណ្ណជូនពរទាំងអស់គឺគួរឱ្យស្រលាញ់ណាស់ហើយលោកយាយនឹងមិនយកកាដូទាំងនោះមកប្រើនោះទេ។ លោកយាយបានបន្ថែមថា៖«ខ្ញុំមិនដឹងថាហេតុអ្វីបានជាពួកគេជូនពរនិងកាដូដល់ខ្ញុំយ៉ាងច្រើនបែបនេះទេប៉ុន្តែខ្ញុំចង់អរគុណដល់អ្នករាល់គ្នាវាជាកាដូដ៏ស្រស់ស្អាត»៕
© រក្សាសិទ្ធិដោយ thmeythmey.com
