.png)
.png)
.jpg)
.jpg)
សារព័ត៌មានថ្មីៗ ជាប់ក្នុងវគ្គជម្រុះ ICT Awards សម្រាប់កម្មវិធី Application របស់ខ្លួន
- ថ្ងៃព្រហស្បតិ៍ ទី១៨ ខែមិថុនា ឆ្នាំ២០១៥ ម៉ោង ២:៤០ នាទី រសៀល
គណៈកម្មការចៅក្រម នៃកម្មវិធីប្រកួតប្រជែងផលិតផលបច្ចេកវិទ្យា បានសម្រេចជ្រើសរើសបេក្ខភាពសារព័ត៌មានថ្មីៗ ឲ្យជាប់ក្នុងវគ្គជម្រុះ២០ស្ថាប័ន។ ក្រសួងប្រៃសណីយ៍ កំពុងតែរៀបចំការប្រកួតប្រជែងយកពានរង្វាន់បច្ចេកវិទ្យាទូរគមនាគមន៍ និងព័ត៌មានកម្ពុជាឆ្នាំ២០១៥ ដោយទទួលបានបេក្ខភាពពី២៥ស្ថាប័ន។ គណៈកម្មការចៅក្រម បានសម្រេចជម្រុះបេក្ខភាពចំនួន៥ចេញ ហើយកំពុងបន្តវាយតម្លៃលើបេក្ខភាពទាំង២០ ដែលក្នុងក៏មានសារព័ត៌មានអេឡិចត្រូនិក ថ្មីៗ ។
សារព័ត៌មានអេឡិចត្រូនិកថ្មីៗ បានយកកម្មវិធីអានព័ត៌មានតាមរយៈទូរសព្ទដៃ (Application) ដែលប្រើប្រព័ន្ធ iOS និង Android ដាក់ទៅក្នុងការប្រកួតយកពានរង្វាន់បច្ចេកវិទ្យាទូរគមនាគមន៍ និងព័ត៌មានកម្ពុជា ២០១៥ ។ App ថ្មីៗ គឺជាផលិតផលថ្មីមួយរបស់សារព័ត៌មានអេឡិចត្រូនិក ដែលត្រូវបានផលិតឡើងដើម្បីឆ្លើយតបទៅនឹងភាពជឿនលឿន និងតម្រូវការរបស់មនុស្សដែលប្រើប្រាស់ទូរសព្ទស្មាតហ្វូន កាន់តែច្រើន ហើយដែលជាអ្នកតាមដានព័ត៌មានទៀតនោះ។
តាមរយៈកម្មវិធី Application របស់ថ្មីៗ អ្នកប្រើប្រាស់អាចអាន ស្តាប់ និងទស្សនាព័ត៌មានគ្រប់ទម្រង់ បានយ៉ាងងាយស្រួល មិនថាពេលណា ឬនៅទីណានោះឡើយ។ ទាក់ទងនឹងការប្រកួតប្រជែងផលិតផលបច្ចេកវិទ្យាឯណោះវិញ ស្នាដៃ និងផលិតផលដែលត្រូវបានយកមកដាក់ប្រកួតប្រជែង និងត្រូវបានជម្រុះនោះ មាននៅក្នុង៥ផ្នែករួមមាន៖ ផ្នែកកិច្ចការសាធារណៈ វិស័យឯកជន ក្រុមហ៊ុនដែលមានការទទួលខុសត្រូវផ្នែកសង្គម ផ្នែកDigital Content ផ្នែកក្រុមហ៊ុនដែលទើបបង្កើតថ្មី និងផ្នែកអភិវឌ្ឍ និងស្រាវជ្រាវ។ ផលិតផល App របស់សារព័តមានថ្មីៗបានជាប់ក្នុងជម្រើសក្នុងផ្នែក Digital Content។
លោក ស៊ុន រ៉ាពីដ ប្រធានមជ្ឈមណ្ឌលស្រាវជ្រាវ និងអភិវឌ្ឍ នៃក្រសួងប្រៃសណីយ៍ បានថ្លែងឲ្យដឹងថា បេក្ខភាពទាំង២០ នឹងត្រូវអញ្ជើញឲ្យធ្វើបទបង្ហាញចុងក្រោយអំពីផលិតផលរបស់ពួកគេនៅថ្ងៃទី២៥មិថុនា នៅមុខគណៈកម្មការចៅក្រមចំនួន៦រូប ដែលមកពីស្ថាប័នជំនាញផ្សេងៗ ។ លោក ស៊ុន រ៉ាពីដ បញ្ជាក់បន្ថែមយ៉ាងដូច្នេះថា៖«បេក្ខភាពទាំង២០ នឹងត្រូវស្នើឲ្យធ្វើបទបង្ហាញចំនួន១៥នាទីក្នុងម្នាក់ៗ ។ ហើយលទ្ធផលនឹងត្រូវប្រកាសនៅល្ងាចថ្ងៃទី២៥មិថុនានោះតែម្តង»។
យោងតាមសេចក្តីប្រកាសព័ត៌មានរបស់កម្មវិធីបច្ចេកវិទ្យាទូរគមនាគមន៍ និងព័ត៌មានកម្ពុជា២០១៥ ជ័យលាភីទីមួយនឹងទទួលបានទឹកប្រាក់១០០០ដុល្លារ រួមនឹងពានជ័យ។ ជ័យលាភីទី២ ទឹកប្រាក់៥០០ដុល្លារ រួមនឹងពានជ័យ និងជ័យលាភីលេខ៣ ទទួលបាន៣០០ដុល្លារ រួមនឹងពានជ័យ៕
© រក្សាសិទ្ធិដោយ thmeythmey.com
.gif)