.png)
កម្ពុជា-កូរ៉េខាងត្បូងកំពុងរៀបចំទស្សនកិច្ចរបស់លោកស្រី ប៉ាក ហ្គឺនហេ មកកម្ពុជា
- ថ្ងៃព្រហស្បតិ៍ ទី៣១ ខែមីនា ឆ្នាំ២០១៦ ម៉ោង ១០:១៩ នាទី យប់
ភាគីកម្ពុជា និងកូរ៉េខាងត្បូង កំពុងរៀបចំដំណើរទស្សនកិច្ចរបស់ប្រធានាធិបតីកូរ៉េលោកស្រី ប៉ាក ហ្គឺនហេ មកកម្ពុជា តាមសំណើរបស់សម្តេចនាយករដ្ឋមន្ត្រី ហ៊ុន សែន ។ ការបញ្ជាក់នេះធ្វើឡើងក្នុងជំនួបរវាងលោក ហោ ណាំហុង រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ និងអនុរដ្ឋមន្ត្រីការបរទេសកូរ៉េខាងត្បូងលោក Kim Hyoung-zhin នៅព្រឹកនេះនាទីស្តីការក្រសួង។
ថ្លែងចំពោះមុខអ្នកាសែតអ្នកនាំពាក្យក្រសួងការបរទេសលោក ជុំ សន្ទរី បានឲ្យដឹងថា រហូតមកដល់ពេលនេះភាគីទាំងពីរបានពិភាក្សាគ្នាពីគម្រោង ដោយការកំណត់ពេលវេលាសមស្របណាមួយ ក្នុងការសម្របសម្រួលកម្មវិធីសម្រាប់ភាគីទាំងពីរ ដើម្បីរៀបចំដំណើរទស្សនកិច្ចរបស់ប្រធានាធិបតីកូរ៉េខាងត្បូងមកកម្ពុជា។ លោក ជុំ សន្ទរី មិនទាន់អាចបញ្ជាក់ពីពេលវេលាច្បាស់លាស់នៅឡើយទេ ដោយលោកគ្រាន់តែបង្ហើបថា គម្រោងនៃការអញ្ជើញលោកស្រី ប៉ាក ហ្គឺនហេ មកកម្ពុជានេះ គឺនៅក្នុងឆ្នាំ២០១៦នេះ។
ឧបនាយករដ្ឋមន្ត្រី ហោ ណាំហុង និង លោក Kim Hyoung-zhin ក៏បានពិភាក្សាគ្នាពីគម្រោងក្នុងការទទួលដំណើររបស់លោកស្រី ប៉ាក ហ្គឺនហេ មកកម្ពុជាផងដែរ។ បើតាមលោក ជុំ សុន្ទរី លោកស្រី ប៉ាក ហ្គឺនហេ អាចនឹងមកបំពេញទស្សនកិច្ចនៅកម្ពុជា ក្នុងឆ្នាំ២០១៦នេះ តែមិនទាន់មានការបញ្ជាក់ពីពេលវេលាជាក់លាក់ នៅឡើយនោះទេ។
ខណៈដែលកម្ពុជាកំពុងរៀបចំគម្រោងអញ្ជើញលោកស្រី ប៉ាក ហ្គឺនហេ មកកម្ពុជានេះ លោក ហោ ណាំហុង ក៏បានបដិសេធបំណងរបស់ឯកអគ្គរដ្ឋទូតកូរ៉េខាងជើងចប់អាណត្តិ លោក ហុង គីចយ កាលពីថ្ងៃទី១៧ ខែមីនា កន្លងមក ។ លោក ហុង គីចយ បានអះអាងថា ប្រធានរដ្ឋសភា និងរដ្ឋមន្ត្រីក្រសួងការបរទេសរបស់កូរ៉េខាងជើង ចង់មកបំពេញទស្សនកិច្ចនៅកម្ពុជា។ ហើយកូរ៉េខាងជើង ក៏ចង់អញ្ជើញសម្តេចនាយករដ្ឋមន្ត្រី ហ៊ុន សែន ទៅបំពេញទស្សនកិច្ចនៅកូរ៉េខាងជើងផងដែរ តែត្រូវបានលោក ហោ ណាំហុង បដិសេធថា សម្តេច ហ៊ុន សែន មានកិច្ចការជាតិជាប់មមាញឹក និងការងារអន្តរជាតិច្រើនទៀត ដែលមិនទាន់មានពេលវេលាក្នុងការទទួលមន្ត្រីជាន់ខ្ពស់កូរ៉េខាងជើង និងអាចទៅទស្សនកិច្ចនៅកូរ៉េខាងជើងបាននោះទេ៕
© រក្សាសិទ្ធិដោយ thmeythmey.com
Tag:
