.jpg)
.jpg)
ប្រមុខការទូតឥណ្ឌូណេស៊ី ចុះទៅជួបផ្ទាល់ និងស្តាប់ពីផលលំបាក«ជនជាតិរ៉ូហ៊ីងយ៉ា»ដែលរត់ទៅបង់ក្លាដែស
- ថ្ងៃពុធ ទី២១ ខែធ្នូ ឆ្នាំ២០១៦ ម៉ោង ៣:២៩ នាទី រសៀល
ប្រភពរូបភាព៖ ក្រសួងការបរទេសឥណ្ឌូណេស៊ី
ក្រោយបានស្តាប់ពីការធ្វើបច្ចុប្បន្នភាពពីស្ថានភាពតំបន់ជម្លោះជាតិសាសន៍រ៉ូហ៊ីងយ៉ានៅមីយ៉ាន់ម៉ា ប្រមុខការទូតឥណ្ឌូណេស៊ី បានបន្តដំណើរទៅកាន់បង់ក្លាដែសដើម្បីជួបផ្ទាល់ជាមួយនឹងក្រុមជនភៀសខ្លួនរ៉ូហ៊ីងយ៉ា ដែលត្រូវបានគេជឿជាក់ថា យោធា បានបណ្តេញ និងធ្វើបុកម្នេញទៅលើពួកគេក្នុងប្រតិបត្តិការចុងក្រោយនេះ។
រដ្ឋមន្ត្រីការបរទេសឥណ្ឌូណេស៊ី លោកស្រី Retno Marsudi នៅថ្ងៃទី២០ ធ្នូ បានជួប និងស្តាប់ពីអាមរម្មណ៍ និងទុក្ខលំបាកដោយផ្ទាល់របស់ក្រុមជនភៀសខ្លួនជនជាតិភាគតិចម៉ូស្លីមរ៉ូហ៊ីងយ៉ានៅក្នុងជំរំ Bazar នៃប្រទេសបង់ក្លាដែស។ ដំណើរចុះជួបរបស់លោកស្រីរដ្ឋមន្ត្រីរូបនេះ ធ្វើឡើងបន្ទាប់ពីលោកស្រី បានចូលរួមកិច្ចប្រជុំចង្អៀតរដ្ឋមន្ត្រីការបរទេសអាស៊ាននៅក្នុងរ៉ងហ្គូននៃប្រទេសមីយ៉ាន់ម៉ាស្តីពីការវិវត្តចុងក្រោយនៃវិវាទជាតិសាសន៍នៅរដ្ឋ Rakhine រវាងយោធា និងក្រុមជនជាតិភាគតិចម៉ូស្លីមរ៉ូហ៊ីង។
តាមរយៈដំណើរចុះសំណេះសំណាលរបស់លោកស្រី ដែលអមជាមួយនឹងសមភាគីបង់ក្លាដែសរដ្ឋមន្ត្រីការបរទេស លោក AH Mahmood Ali នោះ លោកស្រី បានចំណាយពេលច្រើនដើម្បីនិយាយជាមួយនឹងក្រុមជនភៀសខ្លួនដែលខ្លះបានចុះបញ្ជី និងខ្លះទៀតមិនទាន់ចុះបញ្ជីដើម្បីស្នាក់នៅក្នុងជំរំនោះ។ នេះបើយោងតាមសារព័ត៌មាន ឥណ្ឌូនេស៊ី The Jakarta Post ដែលបានបញ្ជាក់ថា ការធ្វើអធិប្បាយរវាងប្រតិភូជាមួយនឹងក្រុមជនជាតិភាគតិចទាំងនោះ មិនត្រូវបានឲ្យដឹងនោះទេ ដ្បិតក្រុមអ្នកសារព័ត៌មាន មិនត្រូវបានអនុញ្ញាតឲ្យនៅក្បែរ។
បើតាមកិច្ចសម្ភាសន៍របស់សារព័ត៌មាន BBCនៅថ្ងៃទី២៤ ខែវិច្ឆិកានោះ ប្រធានឧត្តមស្នងការអង្គការសហប្រជាជាតិទទួលបន្ទុកការិយាល័យជនភៀសខ្លួនប្រចាំព្រំដែនបង់ក្លាដែស លោក John McKissick បានអះអាងថា ទាហាន និងប៉ូលិសតម្រួតព្រំដែនមីយ៉ាន់ម៉ា បានចូលរួមអនុវត្ត«ទណ្ឌកម្មជាសមូហភាពទៅលើជនជាតិភាគតិចរ៉ូហ៊ីងយ៉ា»នៅរដ្ឋ Rakhine ចាប់តាំងពីថ្ងៃទី០៩ ខែតុលាមក។ ពេលនោះហើយដែលជនជាតិភាគតិចម៉ូស្លីមរ៉ូហ៊ីងយ៉ា បានចាប់ផ្តើមខ្លួនទៅកាន់ប្រទេសជិតខាងជាពិសេសបង់ក្លាដែសនោះ។
ប្រធានការិយាល័យជនភៀសខ្លួនរូបនោះ ក៏បានបញ្ជាក់ថា កងកម្លាំងសន្តិសុខមីយ៉ាន់ម៉ា បានបាញ់សម្លាប់បុរស និងសម្លាប់ក្មេង រំលោភស្ត្រី ដុត និងលួចផ្ទះរបស់ជនជាតិទាំងនោះ និងកាន់តែធ្ងន់ធ្ងរនោះ បង្ខំប្រជាជនទាំងនោះឲ្យឆ្លងកាត់តាមទន្លេទៅកាន់ប្រទេសបង់ក្លាដែស ដែលជាប្រទេសជិតខាងរបស់មីយ៉ាន់ម៉ា។
ដោយសារតែបញ្ហានេះហើយ បានធ្វើឲ្យសមាជិកអាស៊ាន ដែលរួមមានម៉ាឡេស៊ី និងមីយ៉ាន់ម៉ា ត្រូវប្រឈមមុខការទូតជាមួយនឹងគ្នា ដ្បិតម៉ាឡេស៊ី ដែលដឹកនាំដោយលោកនាយករដ្ឋមន្ត្រីណាជីប រ៉ាហ្សាក់តែម្តងនោះ បានដឹកនាំបាតុកម្មប្រឆាំង និងទាមទារឲ្យរដ្ឋាភិបាលមីយ៉ាន់ម៉ា បញ្ឈប់សកម្មភាពធ្វើទុក្ខបុកម្នេញទៅលើជនជាតិភាគតិចទាំងនោះ ខណៈ មីយ៉ាន់ម៉ា ចាត់ទុកសកម្មភាពនោះថាជាការជ្រៀតជ្រែក។
នៅថ្ងៃទី១៩ ធ្នូកន្លងទៅ ក្រោយពីលោកស្រីទីប្រឹក្សារដ្ឋមីយ៉ាន់ម៉ា អ៊ុងសាន ស៊ូជី បានសង្ខេបពីហេតុការណ៍ចុងក្រោយនៃរដ្ឋ Rakhine ក្នុងកិច្ចប្រជុំជាមួយនឹងមេដឹកនាំការទូតអាស៊ាន ក៏មានសញ្ជាវិជ្ជមានមួយចំនួនសម្រាប់ជនជាតិភាគតិចទាំងនោះដែរ។ សញ្ញាវិជ្ជមាននោះគឺ មេដឹកនាំការទូតអាស៊ាន ក៏បានបង្ហាញការត្រៀមលក្ខណៈរួចជាស្រេចក្នុងជួយជំនួយមនុស្សធម៌ និងការអភិវឌ្ឍទៅកាន់រដ្ឋមានបញ្ហា ខណៈមីយ៉ាន់ម៉ា ក៏អះអាងពីការត្រៀមខ្លួនផងដែរសម្រាប់បញ្ជូនជំនួយទាំងនោះ ក៏ដូចជាបន្តរក្សាការផ្តល់ព័ត៌មានពីការអភិវឌ្ឍនៅក្នុងតំបន់មានបញ្ហានោះ៕
© រក្សាសិទ្ធិដោយ thmeythmey.com
Tag:
