.jpg)
.jpg)
ក្រោយចែកផ្លូវការទូតគ្នាអស់ជិតពីរទសវត្សរ៍ រដ្ឋអាហ្វ្រិក Sao Tome ត្រលប់ទៅរកមហាយក្សចិនវិញ
- ថ្ងៃចន្ទ ទី២៦ ខែធ្នូ ឆ្នាំ២០១៦ ម៉ោង ២:៥៩ នាទី រសៀល
រដ្ឋមន្ត្រីការបរទេស Sao Tome and Principe (ខាងឆ្វេង) និងរដ្ឋមន្ត្រីការបរទេសចិន (ខាងស្តាំ)
មិនទុកឲ្យនៅយូរឡើយ ក្រោយតែមួយសប្តាហ៍ប៉ុណ្ណោះនៃការប្រកាសផ្តាច់ចំណងការទូតជាមួយនឹងកោះវ៉ាន់ រដ្ឋអាហ្វ្រិកដែលកំពុងតែដង្ហោយរកជំនួយសេដ្ឋកិច្ច Sao Tome និង Principe បានងាកមកបន្តចាប់ដៃគូការទូតជាមួយនឹងមហាយក្សចិនជាថ្មី។ ការបន្តការទូតនេះ ធ្វើឡើងក្រោមព្យុះភ្លៀងទូតរវាងកោះតៃវ៉ាន់ និងចិន ដោយមានការចោទគ្នាថាមានការប្រើប្រាស់«ការទូតលុយ»នៅពីក្រោយនោះ។
រដ្ឋាភិបាលចិន និងរដ្ឋាភិបាល Sao Tome and Principe នៅថ្ងៃទី២៦ ធ្នូនេះ បានប្រកាសជាផ្លូវការក្នុងការបន្តទំនាក់ទំនងការទូតជាមួយនឹងគ្នាឡើងវិញ។ ការប្រកាសនេះ ត្រូវបានធ្វើឡើងក្រោមវត្តមាន និងការចុះហត្ថលេខាលើសេចក្តីថ្លែងការណ៍រួមគ្នាក្នុងក្រុងប៉េកាំងរបស់រដ្ឋមន្ត្រីការបរទេសចិន លោក Wang Yi និង សមភាគី Sao Tome and Principe លោក Urbino Botelho ។ នេះបើយោងតាមភ្នាក់ងារព័ត៌មានរដ្ឋចិន Xinhua។
សូមជម្រាបផងដែរថា Sao Tome and Principe បានកសាងទំនាក់ទំនងការទូតជាមួយនឹងចិនដំបូងឡើយនៅឆ្នាំ១៩៧៥ ក្រោយទទួលបានឯករាជ្យពីព័រទុយហ្គាល់។ តែនៅ១៩៩៧ រដ្ឋអាហ្វ្រិកមួយនេះ បានងាកទៅចាប់ដៃគូការទូតជាមួយនឹងតៃវ៉ាន់វិញ ដែលនេះ មានន័យថា Sao Tome and Principe មិនគោរព និងប្រកាន់យកគោលនយោបាយ«ចិនតែមួយ»នោះទេ។
យ៉ាងណាក៏ដោយ ក្រោយនៃការចែកផ្លូវគ្នាការទូតជាមួយនឹងចិនអស់ពេល១៩ឆ្នាំនោះ Sao Tome and Principe នៅថ្ងៃទី២០ ធ្នូកន្លងទៅ បានប្រកាសផ្តាច់ទំនាក់ទំនងការទូតជាផ្លូវការជាមួយនឹងតៃវ៉ាន់វិញ។ លើបញ្ហានេះដែរ នាយករដ្ឋមន្ត្រីរដ្ឋអាហ្វ្រិក Sao Tome and Principe លោក Patrice Trovoada នៅថ្ងៃទី ២២ ធ្នូ បានចេញថ្លែងការណ៍ជាផ្លូវការមួយដោយ លោក បានបញ្ជាក់ថា ការផ្តាច់ទំនាក់ទំនងជាមួយនឹងតៃវ៉ាន់ គឺជាជម្រើសមួយដ៏ត្រឹមត្រូវ។
លោកនាយករដ្ឋមន្ត្រីរដ្ឋអាហ្វ្រិករូបនេះ ក៏បានពន្យល់ទៀតថា ការភ្ជាប់ទំនាក់ទំនងជាមួយនឹងចិន គឺជាទំនាក់ទំនងយុទ្ធសាស្ត្រដ៏សំខាន់ ដ្បិតចិន គឺជាមហាអំណាចសេដ្ឋកិច្ចលំដាប់ទីពីររបស់ពិភពលោក និងក៏ជាសមាជិកអចិន្ត្រៃយ៍របស់ក្រុមប្រឹក្សាសន្តិសុខអង្គការសហប្រជាជាតិ ដែលស្ថាប័នដ៏មានឥទ្ធិពលដែលមានសិទ្ធិសម្រេចលើជោគវាសនានយោបាយ និងសណ្តាប់ធ្នាប់ពិភពលោកនោះ។ Sao Tome and Principe គឺជាប្រទេសទីមួយហើយ ដែលបានប្រកាសផ្តាច់ទំនាក់ទំនងការទូតជាមួយនឹងកោះតែវ៉ាន់ ក្រោយលោកស្រីប្រធានាធិបតី Tsai Ing-wen ឡើងកាន់អំណាចនោះ។
ប្រាកដណាស់ការប្រកាសនេះ ធ្វើឲ្យតៃវ៉ាន់ មិនត្រឹមតែបាត់បង់ដៃគូសហប្រតិបតិ្តការដែលមានតិចស្រាប់នោះប៉ុណ្ណោះនោះទេ តែវា ក៏ធ្វើឲ្យតៃវ៉ាន់អាម៉ាស់មុខក្នុងអន្តរជាតិមិនតិចឡើយ។ រដ្ឋមន្ត្រីការបរទេសតៃវ៉ាន់ David Lee នៅថ្ងៃទី២០ ធ្នូ ក៏បានថ្លែងរិះគន់ក្រុងប៉េកាំង ដែលចូលចិត្តប្រើទឹកលុយរបស់ខ្លួន ហើយតៃវ៉ាន់នឹងមិនប្រឡូកនយោបាយប្រាក់ដុល្លាររបស់ចិនទេ។ ប្រមុខការទូតតៃវ៉ាន់រូបនេះនិយាយថា រដ្ឋាភិបាលក្រុងប៉េកាំង មិនគួរយកឆក់ឱកាសនៃការខ្វះខាតហិរញ្ញវត្ថុរបស់ Sao Tome and Principe ដើម្បីអនុវត្តនយោបាយចិនតែមួយឡើយ។
តែយ៉ាងណាក៏ដោយ ក្រុងប៉េកាំង ក៏បានឆ្លើយតបវិញថា ខ្លួនមិនបានប្រើប្រាស់ទឹកប្រាក់អ្វីឡើយពីក្រោយនៃការផ្តាច់ទំនាក់ទំនងរវាងកោះតៃវ៉ាន់ និងរដ្ឋកោះអាហ្វ្រិកនោះ។ នៅថ្ងៃទី២១ ធ្នូកន្លងទៅ តាមរយៈអ្នកនាំពាក្យក្រសួងការបរទេសខ្លួនលោកស្រី Hua Chunying ក្រុងប៉េកាំង បានផ្ញើសារថា៖«ចិន មានតែមួយនោះទេនៅលើពិភពលោក ហើយតៃវ៉ាន់ គឺជាផ្នែកមួយរបស់ចិនដែលមិនអាចផ្ទេរទៅណាបានឡើយ»។ លោកស្រី បន្ថែមទៀតថា គោលនយោបាយចិនតែមួយ ដែលបានទទួលស្គាល់តាមរយៈសេចក្តីសម្រេចលេខ ២៧៥៨ របស់អង្គការសហប្រជាជាតិ បានក្លាយជាឯកច្ឆន្ទមួយទូទៅរបស់សហគមន៍អន្តរជាតិទៅហើយ៕
© រក្សាសិទ្ធិដោយ thmeythmey.com
Tag:
