.jpg)
.jpg)
នាយករដ្ឋមន្ត្រី អាបេ ៖ ជប៉ុន នឹងមិនបង្កឧក្រិដ្ឋកម្មដូចសម័យសង្គ្រាមឡើយ
- ថ្ងៃចន្ទ ទី២៦ ខែធ្នូ ឆ្នាំ២០១៦ ម៉ោង ៨:១៩ នាទី យប់
នាយករដ្ឋមន្ត្រីជប៉ុន ស៊ិនហ្សូ អាបេ នឹងទៅទស្សនកិច្ចពីរថ្ងៃនៅកោះហាវ៉ៃ ដើម្បីគោរពវិញ្ញាណក្ខន្ធទាហានអាមេរិកដែលត្រូវបានបាត់បង់ជីវិតក្នុងការវាយប្រហាររបស់ជប៉ុនលើមូលដ្ឋានយោធាអាមេរិក Pearl Harbor កាលពី៧៥ឆ្នាំមុន។ នៅមុនទស្សនកិច្ចនេះ លោកនាយករដ្ឋមន្ត្រី អាបេ ក៏បានរម្លឹកម្ដងទៀតពីជំហររបស់ជប៉ុន ដែលនឹងមិនបង្កវិនាសកម្មដូចអតីតកាលទៀតឡើយ។
នាយករដ្ឋមន្ត្រី ស៊ិនហ្សូ អាបេ នឹងផ្ដើមទស្សនកិច្ចទៅកាន់ Pearl Harbor នៃកោះហាវ៉ៃនៅថ្ងៃទី២៦ និងទី២៧ ខែធ្នូ។ នេះជាលើកទីមួយហើយដែលមេដឹកនាំជប៉ុនធ្វើទស្សនកិច្ច ទៅកាន់ទីបញ្ជាការកងទ័ពជើងទឹកអាមេរិក ដែលរដ្ឋាភិបាលក្រុងតូក្យូបានទម្លាក់គ្រាប់បែកនៅក្នុងវាយប្រហារដោយសម្ងាត់កាលពីឆ្នាំ១៩៤១ និងបានរុញច្រានអាមេរិកឲ្យចូលទៅក្នុងសង្គ្រាមលោកលើកទីពីរ។
លោក អាបេ បានប្រាប់ក្រុមអ្នកជំនួញជប៉ុននៅថ្ងៃទី២៦ ខែធ្នូ ថា លោកចង់ផ្ញើសារទៅកាន់ពិភពលោកអំឡុងទស្សនកិច្ចលើកនេះ ។ នោះ គឺជប៉ុននឹងមិនប្រព្រឹត្តការសម្លាប់រង្គាលដូចសម័យសង្គ្រាមទៀតឡើយ។ បើតាមទីភ្នាក់ងារព័ត៌មាន Reuters លោកបន្តថា សម្ព័ន្ធភាពរវាងជប៉ុន និងអាមេរិក ជាក្ដីសង្ឃឹមក្នុងការដោះស្រាយបញ្ហាទាំងឡាយលើពិភពលោក ហើយទស្សនកិច្ចរួមគ្នារវាងលោក និងលោក អូបាម៉ា នឹងបង្ហាញពីការរួបរួមគ្នាផងដែរ។
ទស្សនកិច្ចរបស់លោក អាបេ ទៅកាន់កោះហាវ៉ៃ នៅថ្ងៃទី២៦ និងទី២៧ខែធ្នូ មានរយៈពេល៦ខែ បន្ទាប់ពីប្រធានាធិបតី បារ៉ាក់ អូបាម៉ា បានក្លាយជាប្រធានាធិបតីកំពុងកាន់តំណែងមុនគេបង្អស់របស់អាមេរិក ដែលបានធ្វើទស្សនកិច្ចទៅកាន់វិមានគោរពវិញ្ញាណក្ខន្ធនៅទីក្រុងហ៊ីរ៉ូស៊ីម៉ា។ ទីក្រុងហ៊ីរ៉ូស៊ីម៉ាគឺជាទីក្រុងមួយនៅក្នុងប្រទេសជប៉ុន ដែលសហរដ្ឋអាមេរិកបានទម្លាក់គ្រាប់បែកបរមាណូដំបូងបង្អស់ដើម្បីបញ្ចប់សង្គ្រាមកាលពីឆ្នាំ១៩៤៥ ។
ថ្ងៃទី៧ ខែវិច្ឆិកា ឆ្នាំ២០១៦ ជាខូបទី៧៥ ថ្ងៃកងទ័ពជប៉ុនបានវាយប្រហារលើកំពង់ផែ Pearl Harbor ដែលជាមូលដ្ឋានទ័ពជើងទឹកអាមេរិកធំបំផុតមួយនៅទីក្រុងហូណូលូលូនៃ កោះហាវ៉ៃ ។ គ្មានអ្នកណាម្នាក់ធ្លាប់គិតថា ជប៉ុនថ្លើមធំហ៊ានចាប់ផ្តើមសង្គ្រាមប្រឆាំងអាមេរិកដូច្នេះទេ ហើយណាមួយអាមេរិកកាលនោះ នៅសម្ងំមិនប្រឡូកក្នុងសង្គ្រាមលោកលើកទី២ ឡើយ។
ការវាយប្រហារតាមផ្លូវអាកាសរបស់ទាហានជប៉ុននេះបានសម្លាប់ទ័ពនិងជនស៊ីវិលអាមេរិកច្រើនជាង ២៤០០ នាក់ ហើយវាក៏កម្ទេចនាវាចម្បាំងអាមេរិកជិត២០គ្រឿងដែលក្នុងចំណោមនោះមាននាវាចម្បាំងធុនធ្ងន់៨គ្រឿងដែរ ។ ក្រៅពីនេះ ការវាយប្រហាររបស់ជប៉ុននេះ ធ្វើឲ្យយន្តហោះចម្បាំង ១៦០គ្រឿងខ្ទេចខ្ទីរទាំងស្រុង និងយន្តហោះ១៥០ គ្រឿងផ្សេងទៀតខូចខាតធ្ងន់ធ្ងរ៕
© រក្សាសិទ្ធិដោយ thmeythmey.com
Tag:
