.jpg)
.jpg)
ជប៉ុន ទទូចប្រទេសមជ្ឈិមបូព៌ា«ឲ្យឈប់ទទួលពលករកូរ៉េខាងជើង»ដែលជាប្រភពសេដ្ឋកិច្ចក្រុងព្យុងយ៉ាង
- ថ្ងៃអង្គារ ទី១២ ខែកញ្ញា ឆ្នាំ២០១៧ ម៉ោង ៧:១៩ នាទី ល្ងាច
ប្រមុខការទូតជប៉ុន លោក Taro Kono នៅថ្ងៃទី១១ កញ្ញា បានទទូចឲ្យបណ្តាប្រទេសនៅមជ្ឈិមបូព៌ាបញ្ឈប់ទទួលយកពលករមកពីកូរ៉េខាងជើងដើម្បីទប់ស្កាត់កូរ៉េខាងជើងក្នុងការទទួលបានមូលនិធិសម្រាប់ការអភិវឌ្ឍកម្មវិធីនុយក្លេអ៊ែរ និងមីស៊ីលប៉ាលីស្ទីក ។ នេះបើយោងតាមសារព័ត៌មានជប៉ុន Japan Times ។
លោករដ្ឋមន្ត្រីការបរទេសជប៉ុន Taro Kono បានថ្លែងនៅក្នុងកិច្ចប្រជុំកិច្ចសន្ទនានយោបាយរដ្ឋមន្ត្រី នៅក្នុងប្រទេសអេហ្ស៊ីប ដែលជាជំនួបរវាងជប៉ុន និងសមាជិកប្រទេសអារ៉ាប់ ថា ការដាក់សម្ពាធទៅលើក្រុងព្យុងយ៉ាងដើម្បីទប់ស្កាត់សកម្មភាពបង្កហេតុ ដែលគំរាមកំហែងដល់សន្តិសុខនៅអាស៊ីខាងកើត គឺជារឿងដ៏សំខាន់ណាស់ ។
លោករដ្ឋមន្ត្រី បានពន្យល់ដល់សមភាគីនៅក្នុងកិច្ចប្រជុំថា មានប្រទេសមួយចំនួននៅមជ្ឈិមបូព៌ា បានទទួលពលករពីប្រទេសកូរ៉េខាងជើង ហើយ ប្រាក់ឈ្នួលរបស់ក្រុមពលករទាំងនោះ បានក្លាយជាប្រភពដ៏សំខាន់នៃចរន្តរូបិយវត្ថុសម្រាប់ក្រុងព្យុងយ៉ាង ។
ជាមួយនឹងការស្នើសុំឲ្យមានកិច្ចសហការដើម្បីដាក់សម្ពាធទៅលើកូរ៉េខាងជើងពីបណ្តាប្រទេសមជ្ឈិមបូព៌ា ប្រមុខការទូតជប៉ុន ក៏បានសន្យាផ្តល់ជំនួយមនុស្សធម៌ប្រមាណ២៥លានុដល្លារសម្រាប់ជនភៀសខ្លួនបួនប្រទេសដែលរាប់បញ្ចូលទាំងអ៊ីរ៉ាក់ និងស៊ីរីផងដែរ ។
សូមរម្លឹកផងដែរថា នៅថ្ងៃទី៣ ខែកញ្ញាកន្លងទៅ កូរ៉េខាងជើងបានបាញ់សាកល្បងគ្រាប់បែកអ៊ីដ្រូសែន នៅឯទីតាំងសាកល្បង Punggye-ri ។ វាជាការសាកល្បងលើកទី៦ របស់កូរ៉េខាងជើង និងត្រូវបានចាត់ទុកជាគ្រាប់បែកដែលមានកម្លាំងខ្លាំងជាងការសាកល្បងលើកមុនៗ។ កូរ៉េខាងជើងនិយាយថា គ្រាប់បែកអ៊ីដ្រូសែននេះត្រូវបានផលិតដោយអ្នកវិទ្យាសាស្ត្រក្នុងស្រុកសុទ្ធសាធ ហើយអាចបំពាក់លើមីស៊ីលរំលងទ្វីបដែលអាចបាញ់ដល់ទឹកដីអាមេរិក៕
© រក្សាសិទ្ធិដោយ thmeythmey.com
Tag:
