.jpg)
.jpg)
ចិន ចង់ឲ្យសហគមន៍អន្តរជាតិគាំទ្រកិច្ចប្រឹងប្រែងដែលរដ្ឋាភិបាលមីយ៉ាន់ម៉ាបានធ្វើលើវិបត្តិរ៉ូហ៊ីងយ៉ា
- ថ្ងៃព្រហស្បតិ៍ ទី១៤ ខែកញ្ញា ឆ្នាំ២០១៧ ម៉ោង ៧:៣៩ នាទី ព្រឹក
មិនខុសពីសហគមន៍អន្តរជាតិនោះទេ រដ្ឋាភិបាលក្រុងប៉េកាំង បានថ្កោលទោសលើការវាយប្រហារនិងហិង្សាប្រដាប់អាវុធដែលបានកើតនៅក្នុងរដ្ឋ Rakhine ប្រទេសមីយ៉ាន់ម៉ា ។ ក៏ប៉ុន្តែក្រុងប៉េកាំង នៅតែបន្តគាំទ្រចំណាត់ការ និងកិច្ចប្រឹងប្រែងរបស់រដ្ឋាភិបាលមីយ៉ាន់ម៉ា ដែលបានធ្វើឡើងកន្លងមកលើវិបត្តិនេះ ។
«ភាគីចិន ពិតជាថ្កោលទោសការវាយប្រហារ ដែលបានកើតឡើងនៅក្នុងរដ្ឋ Rakhine របស់មីយ៉ាន់ម៉ា , គាំទ្រកិច្ចប្រឹងប្រែងរបស់មីយ៉ាន់ម៉ាក្នុងការធានាសន្តិភាព និងស្ថិរភាពនៅក្នុងរដ្ឋ Rakhine ហើយក៏សង្ឃឹមដែរថា រដ្ឋ Rakhine នឹងអាចស្តារស្ថិរភាពឡើងវិញកាន់តែឆាប់ ហើយប្រជាជនក្នុងស្រុកអាចត្រលប់ទៅរកជីវភាពរស់នៅដើមវិញ។» នេះ គឺជាសេចក្តីថ្លែងការណ៍របស់ចិនលើវិបត្តិរ៉ូហ៊ីងយ៉ានៅក្នុងសន្និសីទសារព័ត៌មានប្រចាំថ្ងៃរបស់ក្រសួងការបរទេសចិននៅថ្ងៃទី១២ កញ្ញា ។
សេចក្តីថ្លែងការណ៍ក្រុងប៉េកាំង ដែលធ្វើឡើងតាមរយៈអ្នកនាំពាក្យក្រសួងការបរទេសលោក Geng Shuang បានបញ្ជាក់បន្ថែមទៀតថា៖« ចិន សង្ឃឹមថា សហគមន៍អន្តរជាតិ ក៏គាំទ្រកិច្ចប្រឹងប្រែងដែលបានធ្វើដោយមីយ៉ាន់ម៉ាកន្លងមកដើម្បីរក្សាការអភិវឌ្ឍ និងស្ថិរភាពជាតិ និងបង្កើតលក្ខខណ្ឌល្អប្រសើរសម្រាប់ការដោះស្រាយបញ្ហានៅក្នុងរដ្ឋ Rakhine។»
សូមជម្រាបផងដែរថា បើតាមរបាយការណ៍របស់ភ្នាក់ងារអង្គការសហប្រជាជាតិ មានជនជាតិភាគតិចរ៉ូហ៊ីងយ៉ាជិត៣០ម៉ឺននាក់ហើយ ដែលបានភៀសខ្លួនចេញពីរដ្ឋ Rakhine ទៅកាន់ប្រទេសបង់ក្លាដែស ។ លំហូរនៃជនភៀសខ្លួនដ៏ច្រើននេះ ផ្ទុះឡើងក្រោយពីមានការប៉ះទង្គិចប្រដាប់អាវុធរវាងកម្លាំងរដ្ឋាភិបាលមីយ៉ាន់ម៉ា និងក្រុមឧទ្ទាម នៅខែសីហាកន្លងទៅ ដែលខាងអាជ្ញាធរអះអាងថា ក្រុមឧទ្ទាមជាអ្នកបង្ករឿង ។
កន្លងមក មិនសូវមានរដ្ឋ និងស្ថាប័នអន្តរជាតិច្រើនប៉ុន្មាននោះទេ ដែលចេញសេចក្តីថ្លែងការណ៍គាំទ្រចំណាត់ការរបស់រដ្ឋាភិបាលមីយ៉ាន់ម៉ា ពោលគឺពួកគេ ភាគច្រើន បានថ្កោលទោស និងទាមទារឲ្យរដ្ឋាភិបាលមីយ៉ាន់ម៉ា ចេញវិធានការបន្ទាន់ដើម្បីបញ្ឈប់ហិង្សាទាំងនោះ ដោយមិនត្រូវបណ្តែតបណ្តោយឲ្យបញ្ហាកាន់តែធ្ងន់ធ្ងរឡើយ ៕
© រក្សាសិទ្ធិដោយ thmeythmey.com
Tag:
