.jpg)
.jpg)
បក្សប្រឆាំងមីយ៉ាន់ម៉ា ថ្កោលទោសរដ្ឋាភិបាលលោកស្រីស៊ូជី ដែលព្រមធ្វើតាមសម្តីអតីតប្រមុខUN
- ថ្ងៃព្រហស្បតិ៍ ទី១៤ ខែកញ្ញា ឆ្នាំ២០១៧ ម៉ោង ១០:៣៩ នាទី យប់
សម្ព័ន្ធបក្សប្រឆាំងមីយ៉ាន់ម៉ា ដែលដឹកនាំដោយគណបក្សសហភាពសាមគ្គី និងអភិវឌ្ឍ(USDP) បានចេញសេចក្តីថ្លែងការណ៍រួមមួយ ថ្កោលទោសរដ្ឋាភិបាលលោកស្រីអ៊ុងសាន ស៊ូជី ដែលព្រមអនុត្តតាមអនុសាសន៍របស់គណៈកម្មការប្រឹក្សាវិបត្តិរ៉ូហ៊ីងយ៉ា ដែលដឹកនាំដោយអតីតអគ្គលេខាធិការអង្គការសហប្រជាជាតិ ។
គណបក្សនយោបាយមីយ៉ាន់ម៉ាចំនួន២៩ នៅថ្ងៃទី១២ កញ្ញា បានថ្លែងការណ៍រួម ដោយបានចោទប្រកាន់រដ្ឋាភិបាលរបស់លោកស្រីអ៊ុងសាន ស៊ូជី ថាមិនអើពើនឹងសេចក្តីថ្លែងការណ៍របស់អគ្គមេបញ្ជាការកងទ័ពមីយ៉ាន់ម៉ាលោក មិន អ៊ុងឡាំង ស្តីពីរបាយការណ៍ចុងក្រោយលើវិវាទរដ្ឋ Rakhine ។ នេះបើយោងតាមការចុះផ្សាយរបស់សារព័ត៌មានមីយ៉ាន់ម៉ា The Irrawaddy នៅថ្ងៃទី១៣ សីហា ។
តាមប្រភពព័ត៌មានដដែល សម្ព័ន្ធបក្សប្រឆាំង ដែលដឹកនាំដោយអតីតបក្សកាន់អំណាចមីយ៉ាន់ម៉ា USDP បានចាត់ទុកការមិនយកចិត្តទុកដាក់របស់រដ្ឋាភិបាលមីយ៉ាន់ម៉ា ថាជាការមិនឲ្យតម្លៃលើការប្រឹក្សាយោបល់របស់ស្ថាប័នកំពូលជាតិ ដែលទទួលខុសត្រូវលើសន្តិសុខ និងកិច្ចការការពារជាតិ ហើយឥរិយាបថនេះ ក៏អាចធ្វើឲ្យរាំងស្ទះដំណើរការនៃការផ្សះផ្សារជាតិផងដែរ ។
សេចក្តីថ្លែងការណ៍របស់សម្ព័ន្ធបក្សនយោបាយមីយ៉ាន់ម៉ាធ្វើឡើងក្រោយពីខុទ្ទកាល័យរបស់ប្រធានាធិបតីមីយ៉ាន់ម៉ា បានប្រកាសបង្កើតគណៈកម្មការថ្មីដើម្បីអនុវត្តតាមអនុសាសន៍របស់គណៈកម្មការប្រឹក្សាលើរដ្ឋ Rakhine ដែលដឹកនាំដោយអតីតអគ្គលេខាធិការអង្គការសហប្រជាជាតិលោក Kofi Annan ។
បើតាម The Irrawaddy គណៈកម្មការថ្មី ដែលទើបតែបង្កើតនោះ ត្រូវទទួលខុសត្រូវលើការងារពន្លឿនដំណើរការបញ្ជាក់សញ្ជាតិ និងធានាឲ្យបានការទទួលបានការអប់រំ និងសេវាសុខភាពនៅក្នុងរដ្ឋកំពុងមានបញ្ហា Rakhine ដោយពុំមានការរើសអើងសាសនា និងជាតិសាសន៍ជាដើមនោះ ។
សូមជម្រាបផងដែរថា បញ្ហាដែលបាននិងកំពុងតែកើតឡើងនៅក្នុងរដ្ឋ Rakhine ដែលត្រូវបានមើលឃើញថាជាវិវាទរវាងជនជាតិភាគតិចម៉ូស្លីមរ៉ូហ៊ីងយ៉ា និងក្រុមពុទ្ធសាសនិក បានចាក់ឬសច្រើនទសវត្សរ៍មកហើយ ។ របាយការណ៍សិទ្ធិមនុស្សជាច្រើន បានផ្សាយថា ជនជាតិភាគតិចរ៉ូហ៊ីងយ៉ា បានរងការរើសអើង និងធ្វើទុកបុកម្នេញពីសំណាក់អាជ្ញាធរមីយ៉ាន់ម៉ា ។
ថ្មីៗនេះ លោក Kofi Annan អតីតអគ្គលេខាធិការអង្គការសហប្រជាជាតិ និងជាប្រធានគណៈកម្មការប្រឹក្សារដ្ឋ Rakhine ដែលទើបតែផុតអាណត្តិងផងដែរនោះ បានព្រមានដល់រដ្ឋាភិបាលរបស់លោកស្រី ស៊ូជី ឲ្យឆាប់ដោះស្រាយវិបត្តិនៅក្នុងរដ្ឋ Rakhine មុនពេលបញ្ហានេះ កាន់ធ្ងន់ធ្ងរ និងឈានដល់មហន្តរាយមនុស្សជាតិ ៕
© រក្សាសិទ្ធិដោយ thmeythmey.com
Tag:
