.png)
.jpg)
.jpg)
Milner ថា នឹងធ្វើជាហ្វេន Man Utd លើកដំបូងបំផុតក្នុងជីវិត នាជំនួប Manchester Derby
- ថ្ងៃពុធ ទី២៤ ខែមេសា ឆ្នាំ២០១៩ ម៉ោង ៨:២៩ នាទី ព្រឹក
James Milner ខ្សែបម្រើក្រុម Liverpool ថារូបគេនឹងក្លាយជាអ្នកគាំទ្រក្រុម Manchester United លើកដំបូងក្នុងជីវិតសម្រាប់ជំនួប Manchester Derby ទល់នឹងក្រុម Manchester City នៅរាត្រីថ្ងៃទី២៤ ខែមេសា។ ការជួបគ្នារវាងក្រុមយក្សក្នុងក្រុង Manchester នេះជាការប្រកួតដ៏សំខាន់សម្រាប់ Man Utd, Man City និង Liverpool។
ក្រុមបិសាចក្រហមនឹងបើកទ្វារកីឡដ្ឋាន Old Trafford ដើម្បីទទួលក្រុមមេឃខៀវក្នុងការប្រកួតក្របខណ្ឌ Premier League សប្តាហ៍ទី៣៥ នៅវេលាម៉ោង ២:០០នាទី អាធ្រាត្រ។
ជំនួបសំខាន់រវាងក្រុមទាំងពីរក៏នឹងជះឥទ្ធិផលដល់ក្រុមរបស់លោក Jurgen Klopp ផងដែរ ដ្បិត Liverpool ត្រូវប្រជែងពានលីគកំពូលអង់គ្លេសរដូវកាលនេះជាមួយ Man City។
Liverpool ដែលប្រកួតបាន៣៥លើក ស្ថិតនៅកំពូលតារាងបណ្តោះអាសន្ន ដោយនាំមុខក្រុមរបស់លោក Pep Gardiola ចំនួន ២ពិន្ទុ ប៉ុន្តែ Man City ទើបប្រកួតបាន៣៤លើកប៉ុណ្ណោះ។
ក្រុមលោក Klopp ត្រូវពឹងលើ Man Utd ជាចាំបាច់ដើម្បីរារាំង Man City សម្រាប់ជំនួបនេះ ក្នុងការជួយឲ្យ Liverpool នៅរក្សារកំពូលតារាង និងជួយក្រុមឈ្នះពាន Premier League លើកដំបូងចាំតាំងពីឆ្នាំ១៩៩០មក។
ក្រុមលោក Klopp ត្រូវពឹងលើ Man Utd ជាចាំបាច់ដើម្បីរារាំង Man City សម្រាប់ជំនួបនេះ ក្នុងការជួយឲ្យ Liverpool នៅរក្សារកំពូលតារាង និងជួយក្រុមឈ្នះពាន Premier League លើកដំបូងចាំតាំងពីឆ្នាំ១៩៩០មក។
Milner ដែលជាអតីតខ្សែបម្រើរបស់ក្រុម Man City តែបច្ចុប្បន្នជាសមាជិកក្រុមហង្សក្រហមបានប្រកាសថារូបគេនឹងគាំទ្រក្រុមរបស់លោក Ole Gunnar Solskjaer សម្រាប់ជំនួប Manchester Derby នេះ។
«នេះជាលើកដំបូងក្នុងជីវិតរបស់ខ្ញុំ ដែលខ្ញុំគាំទ្រ Man Utd។ ប៉ុន្តែខ្ញុំមិនមើលការប្រកួតនេះទេ ដែលវានាំឲ្យខាតបង់កំលាំងរបស់ខ្ញុំ ដោយទុកពេលធ្វើអ្វីផ្សេងវិញ។ ខ្ញុំនឹងដាក់ទូរសព្ទរបស់ខ្ញុំឲ្យឆ្ងាយពីខ្លួនរយៈពីរបីម៉ោងហើយចាំមើលលទ្ធផលតាមក្រោយ»។ នេះជាការអះអាងរបស់អតីតខ្សែបម្រើក្រុមជម្រើសជាតិអង់គ្លេស វ័យ៣៣ឆ្នាំ។
នៅសល់៣ប្រកួតចុងក្រោយ Liverpool ត្រូវប៉ះ Huddersfield Town, Newcastle United និង Wolverhampton Wanderers ខណៈ Man City បន្ទាប់ពីតទល់ជាមួយ Man Utd ហើយ ត្រូវជួប Burnley, Leicester City និង Brighton & Hove Albion។
ដោយឡែក Man Utd ក៏ត្រូវការឈ្នះជាចាំបាច់ដូចគូប្រជែង Man City ដែរ ក្រោយរងបរាជ័យយ៉ាងធ្ងន់ធ្ងរក្រោមថ្វីជើង Everton ដល់ទៅ ៤-០។ ដូច្នេះ សម្រាប់ជំនួបដ៏សំខាន់នេះ ម្ចាស់ជើងឯកលីគកំពូលអង់គ្លេស ២០សម័យត្រូវដណ្តើម៣ពិន្ទុឲ្យខាងតែបានដើម្បីជាទុនសម្រាប់ប្រជែងយកតំណែង Top4 ដើម្បីលេង Champions League រដូវកាលក្រោយ។
Man City ដែលរបូតពាន Champions League ទៅហើយក៏មានភារកិច្ចសំខាន់ដើម្បីដណ្តើពាន Premier League រដូវកាល ២០១៨-១៩ នេះ ជាមួយ Liverpool ដូចគ្នា៕
© រក្សាសិទ្ធិដោយ thmeythmey.com
Tag:
