បេក្ខជនឯករាជ្យ Macron សង្ឃឹមផ្តួលបេក្ខជនស្តាំនិយមជ្រុល Le Pen វគ្គផ្តាច់ព្រ័ត្រ 24, Apr 2017 , 11:09 am 8808
× ការបោះឆ្នោតប្រធានាធិបតីបារាំងជុំទីមួយបានបញ្ចប់ទៅនៅថ្ងៃអាទិត្យ។ បេក្ខជនពីររូបដែលឈ្នះមានអ្នកនយោបាយស្តាំនិយមជ្រុល Marine Le Pen និងអ្នកនយោបាយកណ្តាលនិយម Emmanuel Macron នឹងត្រូវប្រកួតគ្នានៅក្នុងការបោះឆ្នោតជុំទី២ថ្ងៃ ៧ខែឧសភាខាងមុខ។ បេក្ខជនដែលចាញ់ឆ្នោតហាក់ត្រៀមខ្លួនហើយដើម្បីជួយគាំទ្រលោក Macron ដើម្បីឈានទៅដណ្តើមតំណែងប្រធានាធិបតីនៅខែក្រោយនេះ។
សំឡេងឆ្នោត ៩៦ ភាគរយនៃការបោះឆ្នោតប្រធានាធិបតីបារាំងនាជុំទីមួយត្រូវបានរាប់ចប់សព្វគ្រប់នៅយប់ថ្ងៃអាទិត្យ។ ដូចការស្ទង់មតិកន្លងមកដែរ បេក្ខជនប្រធានាធិបតីពីររូបដែលជាប់ជុំទីមួយមានដូចជាលោកស្រី Marine Le Pen ជាអ្នកនយោបាយស្តាំនិយមជ្រុលនិងអតីតរដ្ឋមន្ត្រីសេដ្ឋកិច្ចបារាំងលោក Emmanuel Macron។
បើយោងតាមលទ្ធផលបោះឆ្នោតដែលស្រង់ដោយសារព័ត៌មាន France 24 អ្នកនយោបាយកណ្តាលនិយមលោក Emmanuel Macron បានទទួលសំឡេង ២៣,៩ ភាគរយ ខណៈអ្នកនយោបាយស្តាំនិយមជ្រុល Marine Le Pen បានទទួលសំឡេងគាំទ្រ ២១,៤ ភាគរយ។
ចំណែកបេក្ខជនផ្សេងទៀតដូចជាលោក ហ្វ្រង់ស្វ័រ ហ្វីយ៉ុង (Francois Fillon) និងលោកJean-Luc Melenchon បានទទួលសំឡេងប្រហាក់ប្រហែលគ្នាពោលគឺជិត២០ភាគរយប៉ុណ្ណោះ។
១.Marine Le Pen ជាបេក្ខជនប្រធានាធិបតីដើម្បីប្រជាជន?
ក្រោយបោះឆ្នោត លោកស្រី Marine Le Pen បានចេញមុខប្រកាសជ័យជម្នះរបស់ខ្លួន ដោយលោកស្រីអះអាងថា វាជាជំហានដ៏អស្ចារ្យដើម្បីឆ្ពោះទៅកាន់តំណែងប្រធានាធិបតី។ ហើយវាជាលទ្ធផលប្រវត្តិសាស្ត្រមួយសម្រាប់លោកស្រីដែរ។ បើតាមលទ្ធផលបោះឆ្នោត លោកស្រីបានទទួលសំឡេងគាំទ្រពីប្រជាជនជិត ៧លាននាក់ឯណោះ ហើយវាជាសំឡេងគាំទ្រដ៏ច្រើនដែលបក្សលោកស្រីមិនធ្លាប់ទទួលបានកន្លងមកឡើយ។
យ៉ាងណាក៏ដោយ ប្រធានបក្សរណសិរ្សជាតិដែលមាននិន្នាការប្រឆាំងជនអន្តោប្រវេសន៍និងប្រឆាំងអឺរ៉ុបរូបនេះបានហៅខ្លួនឯងថាជា «បេក្ខជនប្រធានាធិបតីដើម្បីប្រជាជន» និង ផ្ញើសារមានលក្ខណៈប្រជាឧបាយ ទៅកាន់ប្រជាជនបារាំងផងដែរថា អនាគតបារាំងរស់ឬស្លាប់អាស្រ័យលើប្រជាជនបារាំងដែលដែលជាអ្នកបោះឆ្នោត។
គេដឹងច្បាស់ថា គោលនយោបាយស្នូលរបស់បេក្ខជនម្នាក់នេះមិនសូវខុសគ្នាពីនយោបាយលោក ដូណាល់ ត្រាំឡើយ គឺប្រឆាំងជនអន្តោប្រវេសន៍ដើម្បីប្រយោជន៍សេដ្ឋកិច្ចនិងការពារសន្តិសុខ។ ហើយមិនត្រឹមតែប៉ុណ្ណ៉ោះលោកស្រីក៏មាននិន្នាការប្រឆាំងដំណើរសមាហរណកម្មសហភាពអឺរ៉ុប និងស្ថាប័នអឺរ៉ុបដែលមានលក្ខណៈការិយាធិបតេយ្យនោះ។
បេក្ខជន Marine Le Pen បានសន្យារួចរាល់ហើយថា លោកស្រីនឹងចាប់ផ្តើមកំណត់ទំនាក់ទំនងថ្មីជាមួយសហភាពអឺរ៉ុបបើសិនជាលោកស្រីជាប់ឆ្នោត។ លោកស្រីនឹងចាប់ផ្តើមចរចាជាមួយស្ថាប័នព្រុចសែលដើម្បីទាមទារអំណាចមួយចំនួនដើម្បីសម្រេចកិច្ចការផ្ទាល់ខ្លួនជាពិសេសកំណត់ព្រំដែន និងអំណាចអធិបតេយ្យផ្សេងទៀតដែរ។ ក្នុងករណីដែលអឺរ៉ុបមិនអាចបំពេញតាមអ្វីដែលលោកស្រីទាមទារ លោកស្រីនឹងធ្វើប្រជាមតិនាំបារាំងចេញពីអឺរ៉ុប និងតំបន់ចាយលុយអឺរ៉ូថែមទៀត។
២. Emmanuel Macron ជាក្តីរំពឹងចុងក្រោយរបស់បារាំងនិងអឺរ៉ុប?
ចំណែកបេក្ខជនដែលជាអ្នកនយោបាយកណ្តាលនិយម Emmanuel Macron វ័យ៣៩ឆ្នាំដែលជាអតីតរដ្ឋមន្ត្រីសេដ្ឋកិច្ចបារាំង ក៏បានផ្តល់សុន្ទរកថាទៅកាន់អ្នកគាំទ្ររបស់ខ្លួនផងដែរ ក្រោយពេលដែលលទ្ធផលចេញជាផ្លូវការ។ លោកបានអំពាវនាវឲ្យប្រជាជនបារាំងដែលមិនទាន់សម្រេចចិត្តឲ្យគាំទ្រលោកក្នុងការបោះឆ្នោតជុំទីពីរខែក្រោយ។
លោក Emmanuel Macron ជាបេក្ខជនដែលគាំទ្រសហភាពអឺរ៉ុប, មានគោលដីបន្តជំរុញសមាហរណកម្មសេដ្ឋកិច្ចបារាំងជាមួយពិភពលោក និងបង្កើនទុនវិនិយោគក្នុងវិស័យសាធារណៈផងដែរ។ គេមើលឃើញថា អ្នកនយោបាយម្នាក់នេះជាក្តីសង្ឃឹមរបស់បារាំងនិងរបស់អឺរ៉ុបផងដែរ ក្នុងបរិបទបច្ចុប្បន្នដែលចលនាប្រជាឧបាយនិងចរន្តប្រឆាំងសាកលភាវូបនីយកម្មកើនឡើងនោះ។ ដូច្នេះហើយបើសិនជាលោកជាប់ឆ្នោតនៅពេលខាងមុខវាជាដំណឹងល្អសម្រាប់បារាំងផងនិងសម្រាប់អឺរ៉ុបទាំងមូលផង។
មកដល់ពេលបច្ចុប្បន្ននេះ គ្រប់គ្នាបន្តចាំមើលថា លោក Macron អាចនឹងយកឈ្នះគូប្រជែងនៅជុំទីពីរនិងជាជុំចុងក្រោយឬអត់? យោងតាមទីភ្នាក់ងារព័ត៌មាន AFP លោក Macron សង្ឃឹមច្រើនដើម្បីផ្តួលបេក្ខជនស្តាំនិយមជ្រុល Marine Le Pen នៅថ្ងៃ ៧ ឧសភា។ នេះក៏ដោយសារគោលនយោបាយរបស់លោកផង ហើយលោកក៏ទទួលបានការគាំទ្រច្រើនពីបណ្តាអ្នកនយោបាយបារាំងផងដែរ។
ដូចឃើញស្រាប់ បេក្ខជនដែលចាញ់ក្នុងជុំទីមួយមានទាំង លោក ហ្វ្រង់ស្វ័រ ហ្វីយ៉ុង និងលោក Jean-Luc Melenchon ផងនោះបានប្រកាសគាំទ្រលោក Macron ក្នុងការឈានទៅប្រកួតក្នុងការបោះឆ្នោតជុំទីពីរដើម្បីប្រជែងលោកស្រី Marine Le Pen នោះ។
ប៉ុន្តែគ្រប់យ៉ាងនៅតែមិនច្បាស់លាស់នៅឡើយ ព្រោះសូម្បីតែលោកដូណាល់ ត្រាំដែលគ្រប់គ្នាមិនដែលរំពឹងថាជាប់ឆ្នោតបានក្លាយជាប្រធានាធិបតីអាមេរិកទី ៤៥ ទៅហើយ។ ចុះទម្រាំលោកស្រី Marine Le Pen អ្នកណាអាចទាយដឹង?
© រក្សាសិទ្ធិដោយ thmeythmey.com