បទចម្រៀងល្បីល្បាញរបស់អ្នកស្រី ឈុន វណ្ណា មានដូចជា អូនស្រឡាញ់តែបងម្នាក់, ប្រុសនេះខូចណាស់, បឹងហ្គាវ៉ាន់សូឡូ, ប្រុសមុខខ្មូរ, ទទាយំឆ្លង, ឱ! ស្វាយចន្ទី, ដើរលេងក្នុងសួន, ឱ!ផ្ការំចេក, លាហើយរាជធានី, បរប៉ៃលិន, ព្រះពាយផាត់ក្លិន, វាលអើយវាលធំ, យក្ខិនី, ស្រីណាប្រច័ណ្ឌប្តី, ខៅអ៊ីដាង ជាដើម។ [សារព័ត៌មាន ThmeyThmey សូមអភ័យចំពោះកំហុសឆ្គងលើចំណងជើងបទចម្រៀងមួយចំនួន ក្នុងករណីប្រាស់ចាកពីប្រភពដើម។ យើងខ្ញុំនឹងកែតម្រូវប្រសិនបើឃើញឯកសារណាមួយជាក់លាក់]។
ទាក់ទងនឹងការបាត់បង់ជីវិតអ្នកស្រី ឈុន វណ្ណា ព្រឹទ្ធាចារ្យ ស្វាយ សរ តន្ត្រីករជើងចាស់ដ៏ល្បីល្បាញ បង្ហាញនូវអារម្មណ៍សោកស្តាយយ៉ាងខ្លាំង ដោយលោកចាត់ទុកថា ជាការបាត់បង់ធនធានមនុស្សដ៏សំខាន់ ដែលមិនអាចត្រឡប់មកវិញបានឡើយ។
ថ្លែងប្រាប់សារព័ត៌មាន ThmeyThmey តាមទូរសព្ទ ព្រឹទ្ធាចារ្យ ស្វាយ សរ ដែលនៅតែបន្តបង្រៀនតន្ត្រីដល់យុវជនជំនាន់ក្រោយ បានរៀបរាប់ថា៖ «ខ្ញុំមិនអាចបំភ្លេចទិដ្ឋភាពដែលខ្ញុំ និងអ្នកស្រី វណ្ណា ធ្លាប់ធ្វើការជាមួយគ្នាក្នុងរង្វង់វិស័យសិល្បៈបានឡើយ ជាពិសេសពេលដែលខ្ញុំលេងភ្លេងតាមរោងការ រោងបុណ្យ ជាមួយគាត់»។
ព្រឹទ្ធាចារ្យ ស្វាយ សរ។ រូបថត Capture ពីក្នុងកិច្ចសម្ភាសរវាងលោក ជាមួយវិទ្យុមិត្តភាពកម្ពុជា-ចិន
ដោយសារតែមមាញឹកក្នុងការបង្រៀន ព្រឹទ្ធាចារ្យ ស្វាយ សរ គ្រាន់តែបានអះអាងប្រាប់ត្រួសៗថា ការបាត់បង់អ្នកស្រី ឈុន វណ្ណា ប្រៀបដូចជាការបាត់វិញ្ញាណមួយផ្នែករបស់គាត់។ លោករៀបរាប់ថា៖ «សូម្បីខ្ញុំបើករូបថតមើល ក៏ខ្ញុំយំ ពីព្រោះស្រណោះមនុស្សដែលតែងតែនៅក្បែរគ្នា ជួបគ្នា មានមនោសញ្ចេតនាជាមួយគ្នា រាប់អានគ្នាដូចជាបងប្អូនបង្កើត អ៊ីចឹងខ្ញុំនៅតែចងចាំរូបភាពនេះទុក និងគិតដល់គាត់ ប៉ុន្តែបានត្រឹមតែស្តាយ ដោយសារមនុស្សស្លាប់ទៅហើយ មិនអាចរស់ឡើងវិញទេ»។
យោងតាមឯកសារស្រាវជ្រាវមួយ ដែលផ្សាយដោយ ទំព័រហ្វេសប៊ុក Amazing Cambodia អ្នកស្រី ឈុន វណ្ណា ប្រឡូកក្នុងវិស័យចម្រៀងតាំងពីអាយុ១០ឆ្នាំមក ក្នុងជំនាន់ជាមួយ អ្នកស្រី ឈួន ម៉ាឡៃ, ម៉ៅ សារ៉េត, សូ សាវឿន និងអ្នកម្នាង សៀង ឌី ជាដើម។
នាអំឡុងឆ្នាំ១៩៦០ គាត់បានក្លាយជាតារាចម្រៀងប្រចាំក្រសួងឃោសនាការ ហើយបន្តចូលរួមក្នុងក្រុមតន្ត្រីយោធាភិរម្យ។ នៅសម័យខ្មែរក្រហម អ្នកស្រី ឈុន វណ្ណា ត្រូវបានជម្លៀសពីភ្នំពេញទៅស្វាយរៀង ដោយលាក់ឈ្មោះពិតប្រាកដរបស់ខ្លួន។
ឯកសារដដែលបានរៀបរាប់ថា អ្នកស្រី ឈុន វណ្ណា បានភៀសខ្លួនទៅជំរុំខៅអ៊ីដាង ហើយបានបន្តទៅរស់នៅសហរដ្ឋអាមេរិកនៅឆ្នាំ១៩៨១ ។ គាត់រស់នៅក្នុងស្ថានភាពជាស្ត្រីមេម៉ាយដែលមានកូនបីនាក់។
សារព័ត៌មាន ThmeyThmey ព្យាយាមស្វែងរកឯកសារ និងប្រភពបន្ថែមទៀត ទាក់ទងនឹងដំណើរជីវិតចុងក្រោយរបស់អ្នកស្រី ឈុន វណ្ណា៕