ជាតិ
បទវិភាគ
នយោបាយជាតិ
ឯកឧត្តម កឹម សុខា នៅក្នុងកិច្ចប្រជុំសភា កាលពីខែមករា បន្ទាប់ពីឯកឧត្តមធ្លាក់ពីតំណែងជាអនុប្រធានទី ១ នៃរដ្ឋសភា។
×![]()
នៅថ្ងៃសុក្រស្អែកទី ៧ ខែតុលា រដ្ឋសភានឹងបើកសម័យប្រជុំពេញអង្គលើកទី ៧ និងនីតិកាលទី ៥ ក្រោយពីឈប់សម្រាករយៈពេល ៣ ខែ។ តួអង្គសំខាន់ដែលអ្នកតាមដានស្ថានការណ៍នយោបាយរង់ចាំមើលនៅក្នុងកិច្ចប្រជុំនោះ គឺវត្តមានតំណាងរាស្ត្រគណបក្សសង្គ្រោះជាតិ ជាពិសេសគឺឯកឧត្តម កឹម សុខា អតីតអនុប្រធានទី ១ នៃរដ្ឋសភា ដែលត្រូវតំណាងរាស្ត្រគណបក្សប្រជាជនដកចេញពីតំណែង។ 
តាំងពីអំឡុងពិធីបុណ្យភ្ជុំបិណ្ឌ និងក្រោយពិធីបុណ្យមកដល់ថ្ងៃនេះ ស្ថានភាពនយោបាយ ហាក់មានសភាពធូរស្រាល ពោលគឺការវាយប្រហារគ្នារវាងគណបក្សប្រជាជនកម្ពុជា និងគណបក្សសង្គ្រោះជាតិហាក់មានភាពស្ងប់ស្ងាត់។ ធូរស្រាលដោយសារ ទាំងប្រមុខមេដឹកនាំបក្សកាន់អំណាច ទាំងមេដឹកនាំគណបក្សប្រឆាំង សុទ្ធតែផ្ញើសារឲ្យមន្ត្រី និងអ្នកគាំទ្ររៀងៗខ្លួន ឲ្យរក្សាភាពអត់ធ្មត់ កុំវាយប្រហារគ្នា។ លើសពីនេះ កាលពីថ្ងៃទី៤ ខែតុលា ប្រធានគណៈកម្មការនៃរដ្ឋភាខាងគណបក្សសង្គ្រោះជាតិ បានចូលរួមប្រជុំគណៈកម្មាធិការអចិន្ត្រៃយ៍នៃរដ្ឋសភា ក៏ជាកត្តារួមចំណែកបន្ធូរភាពតានតឹងនយោបាយដែរ។
កាលពីថ្ងៃទី ៥ ខែតុលា ប្រធានស្តីទីគណបក្សសង្គ្រោះជាតិឯកឧត្តម កឹម សុខា ដែលឃុំខ្លួនឯងក្នុងទីស្នាក់ការបក្សអស់រយៈពេលជិត ៤ ខែហើយនោះ បានចេញពីទីស្នាក់ការបក្សលើកដំបូងទៅចុះឈ្មោះបោះឆ្នោតនៅការិយាល័យស្ថិតនៅសង្កាត់ចាក់អង្រែលើ។ ការចេញពីស្នាក់ការបក្សរបស់ឯកឧត្តម កឹម សុខា ទៅចុះឈ្មោះបោះឆ្នោតបានជោគជ័យ ដោយគ្មានការចាប់ខ្លួនពីសំណាក់កងកម្លាំងប្រដាប់អាវុធ ជាសញ្ញាវិជ្ជមានមួយសម្រាប់ស្ថានការណ៍នយោបាយកម្ពុជា ដែលគណបក្សទាំងពីរមើលមុខគ្នាមិនចំអស់រយៈពេលរាប់ខែមកហើយ។
គម្រោងកិច្ចប្រជុំរដ្ឋសភានៅថ្ងៃទី ៧ ខែតុលា ត្រូវអ្នកវិភាគនយោបាយវាយតម្លៃថា ស្ថានភាពនយោបាយនឹងកាន់តែល្អប្រសើរបន្ថែមទៀត ប្រសិនបើតំណាងរាស្ត្រគណបក្សសង្គ្រោះជាតិ ជាពិសេសគឺឯកឧត្តម កឹម សុខា សម្រេចចូលប្រជុំរដ្ឋសភានោះ។ អ្នកតាមដាននយោបាយ មានសុទិដ្ឋិនិយមថា កាលៈទេសៈបច្ចុប្បន្ន គណបក្សសង្គ្រោះជាតិទំនងជាត្រូវដើរតួជាអ្នកថ្នមសភាពការណ៍ ដូច្នេះតំណាងរាស្ត្រគណបក្សសង្គ្រោះជាតិ ដែលមានឯកឧត្តម កឹម សុខា ផងនោះ នឹងចូលប្រជុំសភានៅព្រឹកថ្ងៃសុក្រ។ ផ្ទុយទៅវិញ ប្រសិនបើតំណាងរាស្ត្រគណបក្សប្រឆាំងមិនចូលប្រជុំសភាទេ ភាពអាប់អួនយោបាយនឹងវិលមកវិញជាមិនខាន ដោយសារប្រធានគណបក្សកាន់អំណាច សម្តេច ហ៊ុន សែន ធ្លាប់ប្រកាសថា ការចរចានយោបាយអាចកើតមាន បើតំណាងរាស្ត្រគណបក្សសង្គ្រោះជាតិចូលធ្វើការនៅសភា។
លោក អេង ឆៃអ៊ាង មន្ត្រីជាន់ខ្ពស់គណបក្សសង្គ្រោះជាតិ បានថ្លែងនៅក្នុងបទសម្ភាសន៍ជាមួយជាមួយសារព័ត៌មានថ្មីៗថា បានត្រៀមខ្លួន ដើម្បីចូលប្រជុំសភានៅព្រឹកថ្ងៃសុក្រទី ៧ ខែតុលា។ តែលោក បញ្ជាក់ថា គម្រោងនេះអាចនឹងប្រែប្រួលទៅវិញ ទៅតាមស្ថានការណ៍ជាក់ស្តែង។ លោក ឆៃអ៊ាង មិនហ៊ានអះអាងថា ឯកឧត្តម កឹម សុខា ប្រធានស្តីទីគណបក្សសង្គ្រោះជាតិ នឹងចូលប្រជុំសភាស្អែកឬយ៉ាងណានោះឡើយ។ ក៏ប៉ុន្តែករណីឯកឧត្តម កឹម សុខា នេះ មន្ត្រីគណបក្សសង្គ្រោះជាតិមួយរូបទៀត គឺ លោក យ៉ែម បុញ្ញឫទ្ធិ ឲ្យសារព័ត៌មានថ្មីៗដឹងដែរថា ឯកឧត្តម កឹម សុខា អាចនឹងចូលប្រជុំរដ្ឋសភា បើតំណាងរាស្ត្រគណបក្សសង្គ្រោះជាតិដទៃទៀត ចូលប្រជុំសភា ព្រោះលោកថាឯកឧត្តម កឹម សុខា ក៏ជាតំណាងរាស្ត្រដែរ៕
© រក្សាសិទ្ធិដោយ thmeythmey.com
