ជាតិ
សម្តេច ហ៊ុន សែន ចូលរួមរំលែកទុក្ខចំពោះមរណភាពម្តាយបង្កើតរបស់លោកស្រី ជូឡុង សូមូរ៉ា រូបភាពពីហ្វេសប៊ុក Sophorn Lary II
× ភ្នំពេញ៖ នៅម៉ោងជិត១២យប់ នាថ្ងៃទី២៤ ខែវិច្ឆិកា សម្តេច ហ៊ុន សែន បានចេញលិខិតមួយ ដើម្បីសម្តែងសមានចិត្តក្នុងការចូលរួមរំលែកទុក្ខចំពោះមរណភាពរបស់លោកស្រី ញឹក ជូឡុង-មាសកេត សមភ័ក្រ ដែលត្រូវជាម្តាយបង្កើតរបស់លោកស្រី ជូឡុង សូមូរ៉ា និងជាម្តាយក្មេករបស់ឯកឧត្តម សម រង្ស៊ី។ លិខិតខាងលើ ត្រូវបានសម្តេច ហ៊ុន សែន បង្ហោះនៅលើទំព័រហ្វេសប៊ុក នៅមុននេះបន្តិច។
ខ្លឹមសារនៃលិខិតចូលរួមរំលែកទុក្ខ ដែលសម្តេច ហ៊ុន សែន ផ្ញើជូនលោកស្រី ជូឡុង សូមូរ៉ា បានសរសេរដូច្នេះថា៖«ភរិយាខ្ញុំ និងរូបខ្ញុំផ្ទាល់ ទើបបានទទួលដំណឹងប្រកបដោយសេចក្តីតក់ស្លុតនៃមរណភាពដ៏គួរឲ្យសោកស្តាយរបស់ឧបាសិកា ញឹក ជូឡុង-មាសកេត សមភ័ក្រ ដែលជាម្តាយបង្កើតជាទីគោរពស្រឡាញ់របស់លោកជំទាវ (ជូឡុង សូមូរ៉ា)។ យើងខ្ញុំ យល់ណាស់អំពីទុក្ខសោករបស់បុត្រា បុត្រី ដែលបាត់បង់នូវអ្នកមានគុណជាទីស្រឡាញ់របស់ខ្លួន។ ភរិយាខ្ញុំ និងរូបខ្ញុំផ្ទាល់ សូមចូលរួមរំលែកទុក្ខដោយស្មោះចំពោះមរណភាពនេះ នៅក្នុងកាយវិការ ដែលយើងជាជាតិខ្មែរដូចគ្នា។ សូមលោកជំទាវ ទទួលនូវមនោសញ្ចេតនាដោយស្មោះពីភរិយាខ្ញុំ និងរូបខ្ញុំផ្ទាល់»។
សូមបញ្ជាក់ថា លោកស្រី ញឹក ជូឡុង-មាសកេត សមភ័ក្រ បានទទួលមរណភាព ដោយជរាពាធ ក្នុងជន្មាយុ ៩៧ឆ្នាំ នៅម៉ោង២រសៀល នាថ្ងៃទី២៤ ខែវិច្ឆិកា ឆ្នាំ២០១៦។ នេះបើតាមលោក អេង ឆៃអ៊ាង មន្ត្រីជាន់ខ្ពស់របស់គណបក្សសង្គ្រោះជាតិ ដែលបានផ្សព្វផ្សាយដំណឹងនេះ នៅលើទំព័រហ្វេសប៊ុករបស់លោក។
លោកស្រី ញឹក ជូឡុង-មាសកេត សមភ័ក្រ ជាភរិយារបស់សម្តេច ញឹក ជូឡុង ដែលជាឥស្សរជនជាន់ខ្ពស់របស់កម្ពុជាមួយរូប កាលពីអតីតកាល។ សម្តេច ញឹក ជូឡុង ជាអ្នកមានភក្តីភាព និងដង្ហែតាមអតីតព្រះមហាក្សត្រ នរោត្តម សីហនុ ដើម្បីទាមទារឯករាជ្យពីអាណានិគមបារាំង៕
Tag:
ហ៊ុន សែន
ញឹក ជូឡុង មាសកេត
© រក្សាសិទ្ធិដោយ thmeythmey.com