អន្តរជាតិ
ជាភ្ញៀវទីមួយរបស់ Duterte នាយករដ្ឋមន្ត្រីអាបេ ប្រកាសផ្ដល់ជំនួយជាង៨ពាន់លានដុល្លារ
×![]()
ដោយ: តន ចាន់រិទ្ធារ៉ា
នាយករដ្ឋមន្ត្រីជប៉ុន ស៊ិនហ្សូ អាបេ គឺជាភ្ញៀវកិត្តិយសដំបូងគេ ដែលត្រូវបានទទួលដោយលោក Rodrigo Duterte តាំងពីលោកក្លាយជាប្រធានាធិបតីហ្វីលីពីនកាលពីពាក់កណ្ដាលឆ្នាំ២០១៦ ។ ជាភ្ញៀវទីមួយរបស់លោកប្រធានាធិបតី Duterte នាយករដ្ឋមន្ត្រី អាបេ ក៏មិនមកដោយដៃទទេដែរ ដោយលោកយកជំនួយយ៉ាងច្រើនសន្ធឹកសន្ធាប់សម្រាប់ម្ចាស់ផ្ទះហ្វីលីពីនដែរ។ លោក អាបេ បានប្រកាសផ្ដល់ទឹកប្រាក់ដល់ទៅ៨,៦៦ពាន់លានដុល្លារជាជំនួយសម្រាប់រដ្ឋាភិបាលក្រុងម៉ានីល។
តាមការអញ្ជើញរបស់ប្រធានាធិបតី Rodrigo Duterte នាយករដ្ឋមន្ត្រីជប៉ុន ស៊ិនហ្សូ អាបេ បានមកទស្សនកិច្ចផ្លូវការនៅទឹកដីហ្វីលីពីន។ ទស្សនកិច្ចនេះរបស់នាយករដ្ឋមន្ត្រីជប៉ុន កើតឡើងចំពេលដែលមានការប្រែប្រួលភូមិសាស្ត្រនយោបាយនៅក្នុងតំបន់ និងដើម្បីពង្រឹងឥទ្ធិពលជប៉ុនក្នុងតំបន់ឡើងវិញ ខណៈដែលចិនកំពុងតែពង្រីកឥទ្ធិពលរបស់ខ្លួនយ៉ាងខ្លាំង ហើយហ្វីលីពីនផ្ទាល់ ក៏បានងាកទៅរកចិនរួចហើយដែរ។
លោកនាយករដ្ឋមន្ត្រី អាបេ បានចាត់ទុកការទស្សនកិច្ចរបស់លោកក្នុងនាមជាភ្ញៀវបរទេសទីមួយរបស់ប្រធានាធិបតី Duterte ថាជាមហាកិត្តិយសរបស់លោក។ លោក អាបេ និយាយថា លោកបានជ្រើសរើសហ្វីលីពីន ជាគោលដៅទស្សនកិច្ចទីមួយសម្រាប់ឆ្នាំ២០១៧ ហើយវាបង្ហាញពីសារៈសំខាន់នៃទំនាក់ទំនងទ្វេភាគីជប៉ុន និងហ្វីលីពីន។
បើតាមសារព័ត៌មាន Rappler ជាកាដូសម្រាប់ហ្វីលីពីន នាយករដ្ឋមន្ត្រីជប៉ុន ក៏បានប្រកាសផ្ដល់ជំនួយដល់ចំនួន៨,៦៦ពាន់លានដុល្លារសម្រាប់រយៈពេល៥ឆ្នាំ។ ទឹកប្រាក់សន្ធឹកសន្ធាប់នេះ នឹងបានមកពីកម្មវិធីជំនួយអភិវឌ្ឍផ្លូវការ (ODA) និងពីការវិនិយោគរបស់ឯកជនលើការកសាងហេដ្ឋារចនាសម្ព័ន្ធផ្លូវថ្នល់ជាដើម។ មិនតែប៉ុណ្ណោះ លោក អាបេ ក៏បានសន្យាសាងសង់មណ្ឌលស្ដារសម្បទា សម្រាប់ប្រើប្រាស់ក្នងយុទ្ធនាបង្ក្រាបគ្រឿងញៀនរបស់លោក Duterte ផងដែរ។
អ្វីដែលគួរឲ្យចាប់អារម្មណ៍នោះ ប្រធានាធិបតី Duterte ក៏បាននាំប្រមុខរដ្ឋាភិបាលជប៉ុន ទៅកាន់ស្រុកកំណើតនៅឯទីក្រុង Davao ផងដែរ។ ក្នុងដំណើរនៅថ្ងៃទី១៣ ខែមករា លោក Duterte ក៏បាននាំលោក អាបេ ទៅលេងផ្ទះរបស់លោកទៀតផង។ នាយករដ្ឋមន្ត្រីជប៉ុន បានចំណាយពេលជិតមួយម៉ោងនៅផ្ទះរបស់លោក Duterte ហើយលោក Duterte ក៏បានរៀបចំអាហារពេលព្រឹកបែបហ្វីលីពីនឲ្យនាយករដ្ឋមន្ត្រី អាបេ ពិសារដែរ។
ការមកដល់ទឹកដីហ្វីលីពីនរបស់នាយករដ្ឋមន្ត្រីជប៉ុន កើតឡើងស្របពេលដែលប្រធានាធិបតីហ្វីលីពីន បានចាប់ផ្ដើមងាកឆ្ងាយពីអាមេរិក ដែលជាសម្ព័ន្ធមិត្តចាស់វស្សារបស់ហ្វីលីពីន និងជប៉ុន។ ហ្វីលីពីន ក្រោមការដឹកនាំរបស់លោក Duterte បែរជាងាកទៅរកចិន និងរុស្ស៊ី ដែលជាគូប្រជែងរបស់អាមេរិក។ ចិន និងរុស្ស៊ី ក៏មិនបានខកឱកាសល្អដែរ ដោយខំប្រឹងទាក់ទាញហ្វីលីពីន ឲ្យមកជិតស្និទ្ធខ្លួន តាមរយៈការសន្យាផ្ដល់ជំនួយ និងកិច្ចសហប្រតិបត្តិការស្អិតល្មូត៕
Tag:
ហ្វីលីពីន
Rodrigo Duterte
ជប៉ុន
ស៊ិនហ្សូ អាបេ
© រក្សាសិទ្ធិដោយ thmeythmey.com
