មុនពិធីបើកវេទិកាសេដ្ឋកិច្ចពិភពលោកនៅទីក្រុងDavos នៃប្រទេសស្វីស អង្គការOxfam បានលើកឡើង ថា មនុស្ស ៨នាក់មានទ្រព្យសម្បត្តិស្មើប្រជាជនពាក់កណ្តាលលើពិភពលោក។ អង្គការនេះព្រមានថា វាបង្ហាញពីកម្រិតខ្ពស់នៃវិសមភាពសង្គម និងជាសញ្ញាមួយគ្រោះថ្នាក់។
ថ្ងៃចន្ទទី ១៦មករា មុនការមកដល់នៃវេទិកាសេដ្ឋកិច្ចពិភពលោក Davos អង្គការ Oxfam បានចេញរបាយការណ៍មួយដែលព្រមានពីការកើនឡើងនៃកម្រិតវិសមភាពសង្គម ដែលកំពុងគំរាមកំហែងនិងអាចធ្វើឲ្យសង្គមបែកបាក់ផង។ អង្គការនេះចង្អុលបង្ហាញថា មនុស្សតែ៨ នាក់ប៉ុណ្ណោះមានទ្រព្យសម្បត្តិសរុបស្មើទ្រព្យសម្បត្តិដែលប្រជាជនពាក់កណ្តាលនៃប្រជាជនសរុបលើពិភពលោកមាន។
បើតាមទស្សនាវដ្តី Forbes មនុស្ស ៨នាក់នោះនោះមានទ្រព្យសម្បតិ្តស្មើប្រជាជ ៣, ៦ពាន់លាននាក់នៃប្រជាជនសរុបលើពិភពលោក ដោយ ៦នាក់ជាជនជាតិអាមេរិក ម្នាក់មកពីអេស្ប៉ាញ និងម្នាក់ទៀតមកពីម៉ិកស៊ិក។ ពួកគេទាំងនោះមានដូចជា ម្ចាស់ក្រុមហ៊ុន Microsoft លោក Bill Gates, សហស្ថាបនិកហ្វេសប៊ុក Mark Zuckerberg, ស្ថាបនិក Amazon លោក Jeff Bezos, លោក Warren Buffett, សេដ្ឋីអេស្ប៉ាញ លោក Amancio Ortega, សេដ្ឋីម៉ិកស៊ិក Carlos Slim Helu, លោក Larry Ellison និងលោក Michael Bloomberg។
ទំហំទ្រព្យសម្បត្តិមនុស្ស ៨នាក់ ស្មើទ្រព្យសម្បត្តិមនុស្សពាក់កណ្តាលពិភពលោកនេះបង្ហាញឲ្យឃើញពីគម្លៀតរវាងអ្នកមាននិងអ្នកក្រ ហើយវាក៏គំរាមកំហែងដល់សង្គមមនុស្សលើពិភកលោកទាំងមូលដែរ។
ពាក់ព័ន្ធបញ្ហាប្រឈមនេះ របាយការណ៍អង្គការ Oxfam បានពន្យល់ដោយលើកយកបញ្ហាការចាកចេញពីសហភាពអឺរ៉ុបរបស់ចក្រភពអង់គ្លេស, ការទទួលជ័យជម្នះរបស់ ដូណាល់ ត្រាំ ក្នុងការបោះឆ្នោតប្រធានាធិបតី ក៏ដូចជាការស្រងាកចិត្តខ្លាំងរបស់ប្រជាជនទូទៅចំពោះនយោបាយក្នុងស្រុកជាឧទាហរណ៍។ វាបង្ហាញឲ្យឃើញច្បាស់ប្រជាជនភាគច្រើនមិនអាចអត់ទ្រាំចំពោះប្រព័ន្ធសេដ្ឋកិច្ចដែលអាចបង្កើតឲ្យមានបញ្ហាគម្លៀតសង្គមធំ និង អនុញ្ញាតឲ្យ ក្រុមមនុស្សភាគតិចទាញយកប្រយោជន៍ច្រើនសន្ធឹកបែបនេះឡើយ។
របាយការណ៍អង្គការ Oxfam ក៏បានអំពាវនាវឲ្យមានការបង្កើនកម្រិតពន្ធចំពោះអ្នកមានទ្រព្យសម្បត្តិស្តុកស្តម្ភនិងក្រុមហ៊ុនធំៗ ក្នុងបរិបទដែលមានគម្លៀតខ្លាំងរវាងអ្នកមាននិងអ្នកក្រ។ ក្រៅពីនេះ Oxfam ក៏លើកសំណើរឲ្យមានការបង្កើតកិច្ចព្រមព្រៀងរួមគ្នាមួយដើម្បីបញ្ចប់រាល់ការប្រកួតប្រជែងគ្នារវាងប្រទេសនានលើពិភពលោកក្នុងការកាត់បន្ថយកម្រិតពន្ធនោះ។
គេរំពឹងថា បញ្ហាវិសមភាពសង្គមនឹងក្លាយជាប្រធានបទសំខាន់បំផុតមួយក្នុងវេទិកាសេដ្ឋកិច្ចពិភពលោកនេះ ដោយកិច្ចប្រជុំនេះនឹងមានបណ្តាមេដឹកនាំ អ្នកជំនួញ និងភាគីពាក់ព័ន្ធ ៣០០០នាក់ចូលរួមនោះ៕