អន្តរជាតិ
អតីតប្រធានាធិបតីមីយ៉ាន់ម៉ា ថេន សេន ទទួលពាន«អ្នកកសាងសន្តិភាព និងប្រជាធិបតេយ្យ»
× អតីតប្រធានាធិបតីមីយ៉ាន់ម៉ា លោក ថេន សេន នៅថ្ងៃទី១៥ ខែមករា បានទទួលពានខ្ពស់បំផុតដែលមានងារជា«មនុស្សជាតិសកល»ពីវិទ្យាស្ថានស្រាវជ្រាវរបស់ជប៉ុន ដ្បិតលោក បានប្រឹងប្រឹងចូលរួមកែទម្រង់ប្រទេស និងដំណើរការលទ្ធិប្រជាធិបតេយ្យក្នុងពេលដែលលោក កាន់តំណែងដឹកនាំប្រទេសនោះ។
ថ្លែងក្នុងពិធីទទួលពានពីវិទ្យាស្ថានស្រាវជ្រាវសេដ្ឋកិច្ចសម្រាប់អាស៊ាន និងអាស៊ីបូព៌ា(ERIA)នៅក្នុងប្រទេសជប៉ុន លោក ថេន សេន បានលើកឡើងយ៉ាងដូច្នេះថា៖«ក្នុងនាមជាប្រធានាធិបតី ខ្ញុំ ចង់ឲ្យប្រទេសរបស់ខ្ញុំក្លាយជាប្រទេសដែលមានសន្តិភាព និងវិបុលភាព និងប្រជាធិបតេយ្យ។ បង្កើតអនាគតភ្លឺស្វាងដល់ក្មេងជំនាន់ក្រោយ និងប្រែក្លាយប្រទេសឲ្យទៅជាប្រទេសដែលមានការអភិវឌ្ឍ ដែលអាចចែករំលែកធនធានទៅកាន់អាស៊ានផងដែរ»។ នេះបើយោងសេចក្តីប្រកាសព័ត៌មានរបស់ ERIA នៅថ្ងៃទី១៥ មករា។
ក្នុងវេទិកាដែលមានវត្តមានចូលរួមពីអតីតអគ្គលេខាធិការអាស៊ានលោក Surin Pitsuwan និងអ្នកចូលរួមដែលជាបញ្ញាវ័ន្ត និងអ្នកការទូត៣៥០នាក់នោះ អតីតប្រធានាធិបតីមីយ៉ាន់ម៉ា ក៏បានអះអាងពីសមិទ្ធផលដឹកនាំរបស់លោកទៀតថា ការវិវត្តនៃដំណើរការប្រជាធិបតេយ្យនៅក្នុងប្រទេសមីយ៉ាន់ម៉ា បានជំរុញឲ្យមានការទទួលស្គាល់ពីសហគមន៍អន្តរជាតិ និងការបញ្ចប់ទណ្ឌកម្មទៅលើមីយ៉ាន់ម៉ាផង។ នេះបើយោងសេចក្តីប្រកាសព័ត៌មានដដែល ដែលបានដកស្រង់សម្តីលោក ថេន សេន ដែលបាននិយាយទៀតថា មីយ៉ាន់ម៉ា បានចូលរួមចំណែកក្នុងការកសាងសន្តិភាព និងវិបុលភាពនៅក្នុងអាស៊ាន នៅពេលដែលមីយ៉ាន់ម៉ា ធ្វើជាប្រធានអាស៊ានឆ្នាំ២០១៤នោះ៕
© រក្សាសិទ្ធិដោយ thmeythmey.com