អន្តរជាតិ
លោក Duterte បដិសេធសំណើផ្គត់ផ្គង់មីស៊ីលពីជប៉ុន ព្រោះមិនចង់ឃើញសង្គ្រាមលោកលើកទី៣
× ប្រធានាធិបតីហ្វីលីពីន លោក រ៉ូឌ្រីហ្គូ ឌើទើតេ បានបដិសេធសំណើរបស់នាយករដ្ឋមន្ត្រីជប៉ុនលោក ស៊ីនហ្សូ អាបេ ដែលចង់ផ្តល់មីស៊ីលឲ្យហ្វីលីពីន។ ការណ៍ដែលលោកប្រធានាធិបតី មិនទទួលយកសំណើនេះ ក៏ព្រោះតែលោក មិនចង់ឃើញសង្គ្រាមលោកលើកទីបីនោះទេ។
ថ្លែងនៅក្នុងកម្មវិធីជួបជុំមួយជាមួយនឹងក្រុមសភាពាណិជ្ជកម្មហ្វីលីពីននៅយប់ថ្ងៃទី១៤ មករា លោកប្រធានាធិបតី រ៉ូឌ្រីហ្គូ ឌើទើតេ បានបញ្ជាក់យ៉ាងដូច្នេះថា៖«ប្រសិនបើយើង ផ្តើមសង្គ្រាមលោកលើកទីបី នោះ ពិភពលោក នឹងត្រូវបញ្ចប់ហើយ។ តាមពិត ខ្ញុំ បានប្រាប់លោកនាយករដ្ឋមន្ត្រី អាបេ ថា ខ្ញុំ មិនត្រូវការមីស៊ីលនោះទេ។ ខ្ញុំ ចង់ឃើញប្រទេសហ្វីលីពីន គ្មានវត្តមានរបស់យោធាបរទេស»។ នេះបើយោងតាមការចុះផ្សាយរបស់សារព័ត៌មានហ្វីលីពីន Philippines Star នៅថ្ងៃទី១៥ មករា។
អ្វីគួរកត់សម្គាល់នោះ សំណើផ្តល់មីស៊ីលរបស់ជប៉ុន ធ្វើឡើងក្រោយពី រុស្សី ក៏បានស្នើក្នុងផ្គត់ផ្គត់នាវាមុជទឹកដល់ហ្វីលីពីនកាលពីពេលថ្មឺៗនេះផងដែរ ក៏ប៉ុន្តែសំណើពេលនោះ ក៏បរាជ័យដូចគ្នា ដោយរដ្ឋមន្ត្រីការពារជាតិហ្វីលីពីន អះអាងថា មិនមានលទ្ធភាព។ យ៉ាងណាក៏ដោយ ការបដិសេធសំណើបន្តបន្ទាប់នេះ ក៏ស្របជាមួយនឹងគោលនយោបាយការបរទេសឯករាជ្យរបស់លោកប្រធានាធិបតី រ៉ូឌ្រីហ្គូ ឌើទើតេ ដ្បិតលោក មិនចង់ឃើញវត្តមានទាហានបរទេសនៅក្នុងទឹកដីហ្វីលីពីនទៀតនោះ។
សូមជម្រាបផងដែរថា លោកនាយករដ្ឋមន្ត្រីជប៉ុន ស៊ីនហ្សូ អាបេ នៅថ្ងៃទី១៣ មករាកន្លងទៅ បានបំពេញទស្សនកិច្ចទៅកាន់ហ្វីលីពីនជាលើកដំបូងក្នុងរដ្ឋបាលថ្មីរបស់លោកប្រធានាធិបតី រ៉ូឌ្រីហ្គូ ឌើទើតេ។ បើទោះបីជាចេតនាក្នុងការផ្តល់មីស៊ីលរបស់ជប៉ុន ត្រូវបានបដិសេធដោយហ្វីលីពីន ក៏ដោយ ជប៉ុន បានផ្តល់ជំនួយជាច្រើនផ្សេងទៀតដល់ហ្វីលីពីនផងដែរ។
តាមរយៈដំណើរទស្សនកិច្ចនោះ លោកនាយករដ្ឋមន្ត្រីជប៉ុន បានប្រកាសផ្ដល់ជំនួយចំនួន៨,៦៦ពាន់លានដុល្លារសម្រាប់រយៈពេល៥ឆ្នាំ។ ទឹកប្រាក់សន្ធឹកសន្ធាប់នេះ នឹងបានមកពីកម្មវិធីជំនួយអភិវឌ្ឍផ្លូវការ (ODA) និងពីការវិនិយោគរបស់ឯកជនលើការកសាងហេដ្ឋារចនាសម្ព័ន្ធផ្លូវថ្នល់ជាដើម។ មិនតែប៉ុណ្ណោះ លោក អាបេ ក៏បានសន្យាសាងសង់មណ្ឌលស្ដារសម្បទា សម្រាប់ប្រើប្រាស់ក្នងយុទ្ធនាបង្ក្រាបគ្រឿងញៀនរបស់លោក Duterte ផងដែរ៕
© រក្សាសិទ្ធិដោយ thmeythmey.com