ជាតិ
សេដ្ឋកិច្ច
លោក គួច ម៉េងលី ឆ្ងល់ថា ហេតុអ្វីត្រូវបង់ពន្ធលើសម្ភារជំនួយនាំចូលពីបរទេស?
× ភ្នំពេញ៖ លោកវេជ្ជបណ្ឌិត គួច ម៉េងលី ប្រធានមូលនិធិ ម៉េងលី ជេ. គួចដែលជាផ្នែកមួយ នៃក្រុមហ៊ុន ម៉េងលី ជេ. គួច គ្រុប បានត្អូញត្អែរពីផលលំបាក ពេលដែលលោកនាំសម្ភារអំណោយ ដូចជា សៀវភៅ និងគ្រែអ្នកជំងឺចូលក្នុងប្រទេសម្ដងៗ។ លោកបង្ហាញការខក ចិត្តចំពោះការយកពន្ធលើការនាំចូលសម្ភារទាំងនេះ ដ្បិតសម្ភារទាំងនេះ គឺជាអំណោយពីក្រៅប្រទេស ដែលប្រគល់ជូនមូលនិធិរបស់លោក ដើម្បីផ្ដល់ជូនដោយឥតគិតថ្លៃដល់មន្ទីរពេទ្យរដ្ឋ បណ្ណាល័យ និងអង្គការនានា។
ថ្លែងក្នុងសន្និសីទកាសែតស្ដីពីការបណ្ដុះបណ្ដាលចំណេះដឹងផ្នែកហិរញ្ញវត្ថុនៅវិទ្យាស្ថាន និងសាលារៀនអន្តរទ្វីប អាមេរិកាំង នៅថ្ងៃទី១៦ខែមករា លោក គួច ម៉េងលី បានថ្លែងឲ្យដឹងថា លោកជួបការលំបាកក្នុងការនាំជំនួយពីបរទេស ជាសម្ភារ និងគ្រែអ្នកជំងឺ ចូលក្នុងប្រទេសកម្ពុជា ដោយលោកត្រូវចំណាយលើការដឹកជញ្ជូនហើយ លោកត្រូវតម្រូវឲ្យបង់ពន្ធទៀតក្នុងពេលកន្លងមក។
លោក គួច ម៉េងលី បានថ្លែងប្រាប់អ្នកសារព័ត៌មាននៅក្រោយសន្និសីទកាសែតខាងលើទៀតថា ការអនុវត្តរបស់មន្ត្រីថ្នាក់ក្រោមចំពោះការលើកលែងពន្ធលើសម្ភារអំណោយហាក់មិនបានត្រឹមត្រូវតាមច្បាប់។ លោកបន្តថា លោកចង់ឲ្យមានការបើកចំហការនាំចូលសម្ភារជំនួយ ដើម្បីផលប្រយោជន៍ប្រជាជនកម្ពុជា។ សម្រាប់លោកវេជ្ជបណ្ឌិត រដ្ឋាភិបាលនៃប្រទេសស្វីស បានបង្ហើបថា គេនឹងផ្តល់ជំនួយជាគ្រែអ្នកជំងឺមកបន្ថែមទៀត ប៉ុន្តែបើសិនជា ការនាំចូលសម្ភារទាំងនេះ ត្រូវតម្រូវឲ្យបង់ពន្ធ នោះគេមិនផ្តល់ឲ្យមកកម្ពុជាទៀតទេ។
លោក គុណ ញឹម អគ្គនាយកនៃអគ្គនាយកដ្ឋានគយ និងរដ្ឋាករបានថ្លែងប្រាប់សារព័ត៌មាន ថ្មីៗថាសម្ភារដែលនាំចូលសម្រាប់ធ្វើអំណោយ គឺរដ្ឋត្រូវបង់ពន្ធជំនួស ដែលហៅថាពន្ធអាករបន្ទុករដ្ឋ។ ដូច្នេះ អ្នកនាំចូលមិនត្រូវតម្រូវឲ្យបង់ពន្ធនោះទេ ប៉ុន្តែត្រូវបំពេញបែបបទជាមុនសិន។ លោកលើក ឧទាហរណ៍ថា បើសម្ភារអំណោយនោះជាសៀវភៅ អ្នកនាំចូលត្រូវដាក់ពាក្យសុំទៅក្រសួងអប់រំ យុវជន និងកីឡា និងក្រសួងសេដ្ឋកិច្ចនិងហិរញ្ញវត្ថុ។
បើសិនជាមានមន្ត្រីទាមទារថវិកាលើកការនាំចូលសម្ភារជាជំនួយ ដូចការលើកឡើងដូចលោកវេជ្ជបណ្ឌិត គួច ម៉េងលី បានលើកឡើង លោក លោកអគ្គនាយក គុណ ញឹម ឆ្លើយតបយ៉ាងដូច្នេះ៖«យើងអត់មានគោលការណ៍អ៊ីចឹងទេ។ ខ្ញុំមិនដឹងថា មន្ត្រី (មន្ត្រីទារប្រាក់ក្រៅផ្លូវច្បាប់) នោះនៅកន្លែងណាទេ មន្ត្រីនៅក្រសួងអប់រំ ឬមន្ត្រីនៅអង្គភាពគយ? នៅអង្គភាពគយ បើសិនជាមានគោលការណ៍ (អនុញ្ញាតឲ្យនាំចូល) ពីរដ្ឋមន្ត្រី ពីថ្នាក់លើមកថា ពន្ធអាករជាបន្ទុករដ្ឋ នោះមិនមានត្រូវបង់ពន្ធអ្វីនោះទេ»៕
© រក្សាសិទ្ធិដោយ thmeythmey.com