ព័រទុយហ្គាល់ស្នើបើកបង្រៀនភាសាខ្លួន ក្នុងកម្រិតឧត្តមសិក្សា នៅកម្ពុជា

ជាតិ

ព័រទុយហ្គាល់ស្នើបើកបង្រៀនភាសាខ្លួន ក្នុងកម្រិតឧត្តមសិក្សា នៅកម្ពុជា

20, Jan 2017 , 7:59 am

រូបភាព

រូបថតហ្វេសប៊ុក ជេត ជាលី

ដោយ: ថ្មីៗ

ភ្នំពេញ៖ លោក Francisco Vaz Patto ឯកអគ្គរដ្ឋទូតប្រទេសព័រទុយហ្គាល់ថ្មីប្រចាំកម្ពុជា បានស្នើសុំលោក ជេត ជាលី សាកលវិទ្យាធិការនៃសាកលវិទ្យាល័យភូមិន្ទភ្នំពេញ បើកបង្រៀនភាសាព័រទុយហ្គាល់ (Portuguese) នៅកម្ពុជា។

លោក ជេត ជាលី សាកលវិទ្យាធិការ RUPP បានឲ្យដឹងថា ឯកអគ្គរដ្ឋទូតព័រទុយហ្គាល់ បានសន្យាផ្តល់គ្រូបង្រៀនថ្នាក់ភាសាព័រទុយហ្គាល់នៅកម្ពុជាទៀតផង នាពេលថ្មីៗនេះ។

លោក ជេត ជាលី បានបន្ថែមថា លោក និងឯកអគ្គរដ្ឋទូតប្រទេសព័រទុយហ្គាល់ បានពិភាក្សាគ្នារួចថា ការបើកថ្នាក់ភាសានេះសម្រាប់តែនិស្សិតថ្នាក់សិក្សាអន្តរជាតិ (International Studies) និង ពាណិជ្ជកម្មអន្តរជាតិ (International Business) ពិសេសសិស្ស និស្សិតត្រៀមទៅសិក្សានៅព័រទុយហ្គាល់ផង។ សាកលវិទ្យាធិការ RUPP បានបង្ហាញពីបំណងរបស់ឯកអគ្គរដ្ឋទូតប្រទេសស្ថិតនៅប៉ែកនិរតី នៃសហភាពអឺរ៉ុប តាមគណនីហ្វេសប៊ុក នៅថ្ងៃនេះ។

មុនពេលកម្ពុជាបើកថ្នាក់បង្រៀនភាសារបស់ប្រទេសដែលស្ថិតនៅលើឧបទ្វីប Iberian ជាប់ប្រទេសអេស្ប៉ាញនេះ សាកលវិទ្យាធិការ RUPP បានបង្ហើបបញ្ហាប្រឈមមួយចំនួន រួមមាន គ្រូបង្រៀន បន្ទប់ និងសម្ភារ:សិក្សា។ យ៉ាងណា លោកបញ្ជាក់ថា លោកនឹងបន្តធ្វើការលើរឿងនេះលម្អិតទៀត ដើម្បីជាប្រយោជន៍សិស្ស និស្សិតកម្ពុជា។

តាមលោក ជេត ជាលី បច្ចុប្បន្ន មនុស្សជាង ៣០០លាននាក់ប្រើភាសាព័រទុយហ្គាល់ និងប្រទេស ១០ បានយកភាសាព័រទុយហ្គាល់ជាភាសាផ្លូវការ៕